औषधांच्या नियमभंगाबद्दल मेगन शटवर दोन सामन्यांची बंदी

ऑस्ट्रेलियाची अनुभवी वेगवान गोलंदाज मेगन शट हिच्यावर क्रिकेट ऑस्ट्रेलियाने कारवाई केली आहे. डॉक्टरांनी लिहून दिलेल्या औषधांसंदर्भातील नियमांचा भंग केल्याबद्दल तिच्यावर दोन सामन्यांची बंदी घालण्यात आली आहे. क्रिकेट ऑस्ट्रेलियाने निवेदन काढून याला दुजोरा दिला.

मंडळाने स्पष्ट केले की ही घटना स्पर्धेबाहेर घडली आहे आणि तिचा कामगिरी सुधारणाऱ्या औषधांशी काहीही संबंध नाही. स्पोर्ट्स सायंस आणि स्पोर्ट्स मेडिसन मार्गदर्शक तत्त्वांनुसार डॉक्टरांनी लिहून दिलेल्या प्रिस्क्रिप्शन औषधांच्या बाबतीत हे उल्लंघन आहे. मेगनने औषधांच्या वापरासंबंधीच्या आवश्यकता पाळल्या नाहीत, असे मंडळाने म्हटले आहे.

ही घटना ऑस्ट्रेलियन संघाच्या बांगलादेश दौऱ्यापूर्वी घडली. ती स्पर्धेबाहेर असताना तिच्याकडून झालेले हे नियमांचे एकमेव उल्लंघन होते, असेही मंडळाने सांगितले. तसेच खेळाडूला लागेल ते सहकार्य देत राहू आणि राष्ट्रीय संघाचे प्रतिनिधित्व करताना खेळाडूंसाठी ठरवलेली मानके आणि जबाबदाऱ्या पाळण्याचे महत्त्व त्यांना समजावून सांगत राहू, असे मंडळाने म्हटले आहे.

क्रिकेट ऑस्ट्रेलियाच्या म्हणण्यानुसार ही बंदी आंतरराष्ट्रीय आणि देशांतर्गत क्रिकेट, दोन्हीसाठी सारखीच लागू होईल. त्यामुळे ३३ वर्षांची मेगन २२ ऑक्टोबर रोजी सिडनीतील नॉर्थ सिडनी ओव्हल येथे न्यूझीलंडविरुद्ध होणारा तिसरा आणि अंतिम टी२० सामना खेळू शकणार नाही. ३१ ऑक्टोबर रोजी ॲडलेड स्ट्रायकर्स आणि मेलबर्न स्टार्स यांच्यात होणारा डब्ल्यूबीबीएल २०२६ चा सलामीचा सामनाही ती खेळणार नाही.

तीन सामन्यांच्या टी२० मालिकेत ऑस्ट्रेलियाने आधीच २-० अशी आघाडी घेतली आहे. त्यामुळे अंतिम सामना जिंकून न्यूझीलंडवर क्लीन स्वीप पूर्ण करण्याचा संघाचा प्रयत्न असेल.

मेगन शटने ही कारवाई स्वीकारली आहे. नियम न पाळल्याबद्दल तिने माफी मागितली. सार्वजनिक रोषाबद्दल तिने खेद व्यक्त केला आणि मिळालेल्या पाठिंब्याबद्दल आभार मानले. स्पोर्ट्स सायंस आणि स्पोर्ट्स मेडिसनच्या मार्गदर्शक तत्त्वांचे पालन करण्याची आपली जबाबदारी होती आणि आपण ते करायला हवे होते, असे शटने सांगितले.

मेगन शटने ४ महिला कसोटी सामन्यांमध्ये एकूण ९ विकेट्स घेतल्या आहेत. कसोटीतील तिची सर्वोत्तम कामगिरी २६ धावांत ४ विकेट्स अशी आहे. ११४ एकदिवसीय सामन्यांत तिच्या नावावर एकूण १५८ विकेट्स आहेत, तर त्यातील सर्वोत्तम कामगिरी १९ धावांत ५ विकेट्स अशी आहे.

महिला टी-२० आंतरराष्ट्रीय क्रिकेटमध्ये तिने १२६ सामन्यांत एकूण १५२ विकेट्स घेतल्या आहेत. या प्रकारातील तिची सर्वोत्तम गोलंदाजी १५ धावांत ५ विकेट्स अशी आहे.