व्हिडीओला हवेत चांगले व्ह्यूज? एडिटिंग करताना लक्षात ठेवा या टिप्स

सोशल मीडियावर व्हिडीओ शेअर करण्यापूर्वी तो एडिट करून घेणं आवश्यक असतं, कारण त्यामुळे तुम्हाला जास्त व्ह्यूज मिळू शकतात. सहसा असं दिसतं की साध्या व्हिडीओपेक्षा जबरदस्त एडिट केलेल्या व्हिडीओला जास्त चांगले व्ह्यूज मिळतात. म्हणूनच एडिटिंग करताना प्रत्येक छोट्या गोष्टीकडे लक्ष ठेवणं अतिशय गरजेचं असतं. तुम्हालाही सोशल मीडियावर जबरदस्त एडिट केलेला व्हिडीओ अपलोड करायचा असेल, तर काही टिप्स लक्षात ठेवणं गरजेचं आहे. त्यामुळे तुमचा व्हिडीओ अधिक आकर्षक बनू शकतो.

पहिली गोष्ट म्हणजे मोशन ग्राफिक्स. व्हिडीओ अधिक आकर्षक दिसावा म्हणून तुम्ही त्यांचा वापर करू शकता. यात स्क्रीनवरचा टेक्स्ट, लोगो, ॲनिमेशन आणि वेगवेगळ्या प्रकारचे विजुअल इफेक्ट्स येतात. लोअर थर्ड टायटलच्या मदतीने स्क्रीनच्या खालच्या भागात एखाद्या व्यक्तीचं नाव किंवा महत्त्वाची माहिती जोडता येते. हे करण्यासाठी तुम्ही वेगवेगळे सॉफ्टवेअर वापरू शकता.

दुसरी गोष्ट म्हणजे जुनं फुटेज पुन्हा वापरणं. प्रत्येक व्हिडीओसाठी नवीन फुटेज शूट करायलाच हवं, असं काही नाही. आधी रेकॉर्ड केलेल्या व्हिडीओ क्लिप B-roll म्हणून पुन्हा वापरता येतात. B-roll म्हणजे अशी पूरक दृश्यं, जी मुख्य व्हिडीओला आधार देतात. मुख्य व्हिडीओला ए-रोल म्हणतात. यामुळे व्हिडीओमध्ये वैविध्य येतं आणि एडिटिंगसाठी लागणारा वेळही वाचतो.

तिसरी गोष्ट म्हणजे ऑडिओ एडिटिंगकडे दुर्लक्ष न करणं. व्हिडीओत चांगल्या फोटोंसोबत स्पष्ट आवाजही हवा. बॅकग्राउंड म्युझिक, संभाषण आणि साउंड इफेक्ट्स यांचा आवाज योग्य पातळीवर ठेवायला हवा. संभाषणाचा आवाज इतका स्पष्ट असावा की बघणाऱ्यांना ते अगदी सहज समजेल. म्युझिक आणि साउंड इफेक्ट्स व्हिडीओच्या विषयाशी जुळणारे असले पाहिजेत.

चौथी गोष्ट म्हणजे सबटायटल आणि कॅप्शन. हल्ली सोशल मीडियावर लोक आवाज बंद ठेवून व्हिडीओ बघणं जास्त पसंत करतात. अशावेळी व्हिडीओमधल्या सबटायटल आणि कॅप्शनमुळे व्हिडीओचा विषय समजायला जास्त मदत होते. ज्यांना ऐकायला त्रास होतो, त्यांनाही तुमचा व्हिडीओ अगदी सहज समजू शकतो. अनेक प्लॅटफॉर्म ऑटोमॅटिक कॅप्शनची सोय देतात, त्यामुळे कॅप्शन लिहिताना फार विचार करावा लागत नाही.

शेवटी एडिटिंग सॉफ्टवेअरचा मुद्दा. व्हिडीओ एडिट करण्यासाठी सॉफ्टवेअर निवडण्यासोबतच त्याची फीचर्स लक्षात घेणंही गरजेचं आहे. ॲडोबी प्रीमियर प्रो मध्ये मल्टी-कॅमेरा एडिटिंग आणि फुटेज स्टॅबिलायझेशनसारखी वैशिष्ट्यं आहेत. फायनल कट प्रो हाही एडिटिंगसाठी एक लोकप्रिय पर्याय आहे, तर DaVinci Resolve मध्ये कलर ग्रेडिंग आणि स्वयंचलित सबटायटलिंगसारख्या सुविधा मिळतात. नवशिक्यांनी ॲपलच्या iMovie सारख्या मोफत सॉफ्टवेअरपासून सुरुवात करायला हरकत नाही.