अपडेटनंतर फोन रिस्टार्ट केला नाही, तर स्पीड आणि परफॉर्मंसवर परिणाम होऊ शकतो

स्मार्टफोन हे असं गॅझेट आहे, जे आपल्या प्रत्येक कामात मदत करतं. कॉल, मेसेज, फोटो, सर्चिंग आणि ऑनलाईन पेमेंट अशा सगळ्याच ठिकाणी फोन लागतोच. लहान असो वा मोठं, प्रत्येक कामासाठी आपण स्मार्टफोनवर अवलंबून असतो. त्यामुळे आपली कामं नीट व्हायची असतील, तर फोनचा परफॉर्मंस चांगला असणं अतिशय गरजेचं आहे. तो स्मूद आणि योग्य पद्धतीने चालावा म्हणून वेळोवेळी सॉफ्टवेअर अपडेट करावं लागतं.

कंपनीकडून नवीन सिस्टिम अपडेट आलं की यूजर्स ते आपल्या फोनमध्ये इंस्टॉल करतात. अनेकदा ही सगळी प्रोसेस बॅकग्राऊंडमध्ये आपोआप होते आणि अपडेट पूर्ण झाल्यावर डिव्हाईस स्वतःच रिस्टार्ट होतं. पण काहीवेळा काही सामान्य अपडेटनंतर स्मार्टफोन आपोआप रिबूट होत नाही. अनेक यूजर्स याकडे दुर्लक्ष करतात आणि फोन स्वतःहून रिस्टार्ट न करताच वापरत राहतात. त्यामुळे फोनच्या स्पीड आणि परफॉर्मंसवर परिणाम होऊ शकतो, कारण प्रत्येक अपडेटनंतर किमान एकदा फोन रिस्टार्ट करणं गरजेचं असतं.

आता रिस्टार्ट का करायचा, ते पाहू. अपडेटनंतर फोन रिस्टार्ट किंवा रिबूट केला की फोनच्या अंतर्गत प्रणालीला नवीन सुरुवात मिळते. अपडेट इंस्टॉल होत असताना डिव्हाईसमध्ये अनेक टेंपररी फाईल्स जमा होतात आणि त्यामुळे स्टोरेज आणि मेमरी फुल होते. फोन रिस्टार्ट किंवा रिबूट केला की या टेंपररी फाईल्स आपोआप डिलीट होतात.

शिवाय फोनची रॅम पूर्णपणे रिकामी होते आणि प्रोसेसर पुन्हा नव्याने काम करू लागतो. त्यामुळे फोनची स्पीड आधीपेक्षा चांगली होते, तसंच फोन हँग होणं किंवा ॲप्स क्रॅश होणं अशा समस्या दूर होतात. टेक एक्सपर्ट्सचं मत आहे की, कोणत्याही मोठ्या सॉफ्टवेअर अपडेटनंतर फोन रिस्टार्ट करावा, कॅशे मेमरी क्लिअर करावी आणि नेटवर्क सेटिंग्स एकदा तपासाव्यात.

हा नियम फक्त एका प्रकारच्या फोनसाठी नाही. अँड्रॉईड फोन आणि आयफोन या दोन्हींसाठी तो लागू होतो. एवढंच नाही, तुम्ही टॅब्लेट, लॅपटॉप, डेस्कटॉप पीसी, स्मार्ट टीवी किंवा हँडहेल्ड गेमिंग कंसोल वापरत असाल, तर अपडेटनंतर ही डिव्हाईसही रिबूट करणं गरजेचं आहे.

अनेक दिवस गॅझेट्स बंद न करता सतत वापरत राहिलं, तर बॅकग्राऊंडमधल्या प्रोसेसवर परिणाम होऊ शकतो. त्याचा थेट फरक बॅटरीच्या वापरावर आणि सिस्टिमच्या स्पीडवर पडतो. याउलट अपडेटनंतर डिव्हाईस एकदा बंद केलं की नवीन सॉफ्टवेअरमधली सगळी फीचर्स आणि बदल सिस्टिममध्ये नीट ॲडजस्ट होतात.