राजवर्धन शिंदे सोमेश्वरचे नवे अध्यक्ष, संग्राम सोरटे उपाध्यक्ष; दोघांची बिनविरोध निवड

श्री सोमेश्वर सहकारी साखर कारखान्याच्या अध्यक्षपदी राजवर्धन शिंदे यांची, तर उपाध्यक्षपदी संग्राम सोरटे यांची बिनविरोध निवड झाली. राज्यात अग्रगण्य मानल्या जाणाऱ्या या कारखान्याच्या राजमाता जिजाऊ सभागृहात संचालक मंडळाची विशेष बैठक बोलावण्यात आली होती. अध्यक्ष आणि उपाध्यक्ष निवडण्यासाठीच ही बैठक होती आणि त्यातच ही निवड पार पडली.

अध्यक्षपदासाठी ज्येष्ठ संचालकांसोबतच अनेक तरुण चेहऱ्यांचीही चर्चा सुरू होती. मात्र उपमुख्यमंत्री सुनेत्रा पवार आणि खासदार पार्थ पवार यांनी पूर्वीच्या अध्यक्षपदाचा अनुभव लक्षात घेतला. वाल्हे गटातून मोठ्या मताधिक्याने निवडून आलेल्या राजवर्धन शिंदे यांना त्यांनी संधी दिली.

राष्ट्रवादीचे युवा नेते जय पवार यांच्या उपस्थितीत ही निवड झाली. राष्ट्रवादी काँग्रेसचे पुणे जिल्हाध्यक्ष संभाजी होळकर, राजेंद्र कोरेकर आणि तालुकाध्यक्ष संदीप बांदल यांनी शिंदे यांचे नाव सुचवले. सुनेत्रा पवार आणि पार्थ पवार यांनी अध्यक्षपदासाठी शिंदे यांचीच शिफारस केली होती. उपाध्यक्षपदासाठी त्यांनी संग्राम सोरटे यांचे नाव दिले. निवडणूक निर्णय अधिकारी दिग्विजय आहेर आणि सहाय्यक निवडणूक निर्णय अधिकारी प्रमोद दुरगुडे यांनी दोन्ही पदांसाठी एकेकच नाव आल्याने शिंदे आणि सोरटे यांच्या बिनविरोध निवडीची घोषणा केली.

राजवर्धन शिंदे हे बारामती तालुक्यातील मुरूम गावचे आहेत. त्यांनी यापूर्वी बारामती तालुका सहकारी दूध उत्पादक संघाचे उपाध्यक्ष आणि अध्यक्ष म्हणून काम पाहिले आहे. २००५ ते २००७ या काळात ते कारखान्याचे बिनविरोध अध्यक्ष होते. २०१० ते २०१३ या कालावधीतही त्यांनी सोमेश्वर कारखान्याचे अध्यक्षपद सांभाळले. सन २०२१ ते २०२६ या काळात ते संचालक होते. बारामती तालुका राष्ट्रवादी काँग्रेसचे अध्यक्ष म्हणूनही त्यांनी उल्लेखनीय काम केले. या प्रदीर्घ अनुभवाच्या जोरावर त्यांना पुन्हा अध्यक्षपदाची संधी मिळाली.

निवडीनंतर बोलताना शिंदे म्हणाले, "दिवंगत अजितदादांमुळे मला सहकार क्षेत्रात काम करण्याची संधी मिळाली. त्यांच्या कामाची पद्धत पाहून मला शिकता आले. दादांच्या नंतर त्यांच्या कुटुंबासोबत भक्कमपणे उभे राहता आले याचा आनंद आहे. येणाऱ्या काळात सोमेश्वरच्या विक्रमी भावाची परंपरा कायम ठेवू. सध्या दुष्काळी परिस्थिती असली तरी मला या परिस्थितीत काम करण्याचा अनुभव आहे. त्यामुळे संचालक मंडळ, अधिकारी, कामगार आणि सभासद यांच्या सहकार्याने हा हंगाम यशस्वीपणे पार पाडू."

उपाध्यक्षपदी ओबीसी प्रवर्गातील संग्राम सोरटे यांना संधी देऊन सुनेत्रा पवार यांनी सामाजिक समीकरण साधले, असे बोलले जात आहे. सोरटे हे ब वर्ग संस्था प्रतिनिधी या प्रवर्गातून दुसऱ्यांदा मोठ्या मताधिक्याने निवडून आले आहेत. नवनाथ उद्योग समूहाच्या माध्यमातून त्यांना सहकार आणि शेती क्षेत्राचा मोठा अनुभव आहे. अनेक सहकारी संस्था, पतसंस्था आणि दूध उत्पादक संस्था त्यांनी यशस्वीपणे चालवल्या आहेत. अजित पवार यांचे निष्ठावंत कार्यकर्ते म्हणून त्यांच्याकडे पाहिले जाते. त्यांना उपाध्यक्षपद देऊन सुनेत्रा पवार यांनी ओबीसी समाजाला न्याय दिल्याचेही बोलले जात आहे.

निवडीनंतर सोरटे म्हणाले की, याप्रसंगी स्वर्गीय अजितदादांची आठवण आल्याशिवाय राहत नाही. मात्र येणाऱ्या काळात कारखान्याचा कारभार पारदर्शक आणि काटकसरीने करू. हितासाठी चोवीस तास काम करण्याची आमची तयारी आहे, असेही त्यांनी सांगितले.

नवनिर्वाचित अध्यक्ष राजवर्धन शिंदे आणि उपाध्यक्ष संग्राम सोरटे हे दोघेही गेल्या संचालक मंडळातही होते. राजमाता जिजाऊ सभागृहातील बैठकांमध्ये ते नेहमी एकमेकांच्या शेजारी बसायचे. आता शेजारी बसणारे हेच दोन संचालक कारखान्याचे अध्यक्ष आणि उपाध्यक्ष झाले, हा योगायोग असल्याचे बोलले जात आहे.