बारामतीत तयार होणार मोटोजीझी Trip 500, एप्रिलिया 457 चे इंजिन मिळणार

इटलीची प्रसिद्ध मोटरसायकल कंपनी मोटोजीझी यांनी आपली नवी मिडलवेट रोडस्टर बाईक Trip 500 सादर केली आहे. भारतीय ऑटोमोबाईल क्षेत्रासाठी ही खास बातमी आहे, कारण या बाईकचे प्रोडक्शन महाराष्ट्रातील बारामती येथील पियाजिओच्या प्लांटमध्ये केले जाणार आहे. याच प्लांटमध्ये एप्रिलिया RS 457 आणि Tuono 457 या बाईक्स तयार होतात.

युरोपमध्ये या बाईकची विक्री 2027 च्या सुरुवातीला सुरू होणार आहे. त्याआधी 3 ते 8 नोव्हेंबरदरम्यान मिलान शहरात होणाऱ्या EICMA 2026 प्रदर्शनात ही बाईक लोकांना पाहायला मिळणार आहे.

इंजिनबद्दल सांगायचे तर, एप्रिलिया RS 457 आणि Tuono 457 मध्ये वापरले जाणारे 457cc लिक्विड-कूल्ड पॅरलल-ट्विन इंजिनच Trip 500 मध्येही दिले आहे. हे इंजिन जवळपास 48 hp पॉवर देते. एप्रिलिया RS 457 मध्ये हेच इंजिन 47.6 hp पॉवर आणि 43.5 Nm टॉर्क देते. पण Trip 500 मध्ये कमी RPM वर सहज टॉर्क मिळावा, या दृष्टीने इंजिनचे ट्युनिंग केले आहे. सोबत 6-स्पीड गिअरबॉक्स आहे. युरोपमधील A2 लायसन्सच्या नियमांनुसारही या बाईकची पॉवर ठेवण्यात आली आहे.

डिझाइनच्या बाबतीत कंपनीने आपल्या पारंपरिक ट्रान्सव्हर्स V-Twin इंजिनपासून वेगळा मार्ग घेतला आहे. बाईकला गोल LED हेडलॅम्प, मेटल फ्युल टँक, ब्लॅक फिनिश इंजिन आणि अलॉय व्हील्स आहेत. हेडलॅम्पवर कंपनीचे ईगल चिन्ह दिसते, तर सीटवर The Trip अशी खास एम्ब्रॉयडरी आहे. फ्युल टँकची क्षमता 15 लिटर आहे.

या रोडस्टरचे वजन 180 किलो आणि सीट हाइट 790mm आहे. टेक्नोलॉजीच्या बाबतीत Ride-by-Wire थ्रॉटल, तसेच Road, Sport आणि Rain असे 3 रायडिंग मोड्स मिळतात. यामध्ये 3.6-इंच गोल TFT डिस्प्ले असून स्मार्टफोन कनेक्टिव्हिटी आणि पिक्टोग्राम नेव्हिगेशनचीही सोय आहे. क्विकशिफ्टर हे फीचर अॅक्सेसरी म्हणून मिळणार आहे. शिवाय बॅकलिट स्विचगियर आणि फुल LED लाइटिंग दिली आहे.

मोटोजीझी Trip 500 Black Metropolis, Green Grove आणि Red Beat या 3 रंगांमध्ये विकली जाणार आहे. The Opening नावाची खास एडिशनही सादर केली जाणार आहे.

बाईकचे प्रोडक्शन महाराष्ट्रात होणार असले, तरी ती भारतात विक्रीसाठी आणली जाणार का, याबद्दल कंपनीने काहीही सांगितलेले नाही. त्यामुळे भारतातील बाईकप्रेमींचे लक्ष आता कंपनीच्या पुढच्या निर्णयाकडे लागले आहे.