सावलीत तीन गुराख्यांचा बळी घेणारा टी-१२२ वाघ पिंजऱ्यात अडकला

सावली : चंद्रपूर वनविभागाने अखेर टी-१२२ (T-122) या वाघाला पकडण्यात यश मिळवले आहे. सुमारे सहा वर्षांचा हा वाघ गेला महिनाभर सावली वनपरिक्षेत्रातील व्याहाड उपक्षेत्रात फिरत होता. सामदा, निलसनी, पेडगाव, सोनापूर आणि वाघोली-बुटी या भागात त्याची मोठी दहशत होती. वनविभागाच्या माहितीनुसार, त्याने तीन गुराख्यांचा बळी घेतला होता.

जंगलात गुरे चारायला गेलेल्या गुराख्यांवर या वाघाने जीवघेणे हल्ले केले होते. त्यामुळे गावकरी आणि गुराखी भीतीच्या छायेत होते. आता वाघ पकडला गेल्याने वनविभागाने आणि स्थानिक लोकांनी सुटकेचा निःश्वास सोडला आहे.

नागरिकांच्या सुरक्षेला प्राधान्य देऊन चंद्रपूर वनविभागाने २७ सप्टेंबर २०२६ पासून सावली वनपरिक्षेत्रात विशेष मोहीम सुरू केली होती. वाघ पकडण्यासाठी वनविभागाच्या इतिहासात पहिल्यांदाच ३० बाय ३० फूट आकाराचा खास मोठा पिंजरा वापरला गेला आणि हा प्रयोग यशस्वी ठरला.

वाघासारखा मोठा हिंस्त्र प्राणी सहजासहजी पिंजऱ्यात अडकत नाही. अशा मोहिमांसाठी महिनोन्महिने साधने, माणसे आणि मोठा खर्च लागतो. यावर मार्ग काढण्यासाठी चंद्रपूर प्रादेशिकचे वनपरिक्षेत्र अधिकारी घनश्याम नायगमकर आणि ब्रह्मपुरी विभागाचे जीवशास्त्रज्ञ राकेश अहूजा यांनी आपल्या दीर्घ अनुभवातून आणि कल्पकतेतून या पिंजऱ्याची संकल्पना आणि डिझाईन तयार केले होते.

मुख्य वनसंरक्षक रामानुजम आणि विभागीय वन अधिकारी राजन तलमले यांच्या मार्गदर्शनाखाली, तसेच सहायक वनसंरक्षक विकास तरसे आणि सावलीचे वनपरिक्षेत्र अधिकारी विनोद धुर्वे यांच्या नेतृत्वाखाली ही मोहीम राबवली गेली. या कठीण आणि धाडसी मोहिमेसाठी ९ गरुडा सीसीटीव्ही, २० ट्रॅप कॅमेरे आणि ३ लाईव्ह कॅमेरे लावले होते. ५० ते ६० वनकर्मचारी आणि मजुरांनी चोवीस तास पहारा दिला.

ईको-प्रो संस्थेचे अध्यक्ष बंडूजी धोतरे, मानद वन्यजीव रक्षक मुकेश भांदककर, जीवशास्त्रज्ञ अक्षय नारनवरे, पशुसंवर्धन विभागाचे सेवानिवृत्त सहायक आयुक्त डॉ. छोनकर, क्षेत्र सहाय्यक मारुती पुल्लेवाड आणि शूटर प्रदीप कोडापे यांनीही यात सहभाग घेतला. डॉ. छोनकर निवृत्त असूनही त्यांनी वनविभागाला मोलाची साथ दिली. संबंधित क्षेत्राचे वनरक्षक, मूलचे एसटीपीएफ (STPF) पथक, चंद्रपूरचे आरआरयू (RRU) पथक आणि पीआरटी (PRT) चमू यांनीही नियोजनबद्ध, शिस्तीने आणि एकत्र प्रयत्न केले.

या सगळ्यांच्या सामूहिक आणि अहोरात्र मेहनतीमुळेच हा धोकादायक वाघ पकडता आला, अशी माहिती सावलीचे प्रादेशिक वनपरिक्षेत्र अधिकारी व्ही. सी. धुर्वे यांनी दिली. या यशामुळे गुराखी आणि गावकऱ्यांना मोठा दिलासा मिळाला आहे.