गौतम गंभीर 45 वर्षांचा; युवराज, रैना, शुक्ला आणि जेटली यांच्याकडून वाढदिवसाच्या शुभेच्छा

भारतीय क्रिकेट संघाचा माजी सलामीवीर आणि सध्याचा मुख्य प्रशिक्षक गौतम गंभीर बुधवारी 45 वर्षांचा झाला. वाढदिवसानिमित्त क्रिकेट विश्वातून त्याच्यावर मोठ्या प्रमाणात शुभेच्छांचा वर्षाव झाला.

भारतीय संघातील त्याचे जुने सहकारी युवराज सिंग आणि सुरेश रैना यांनी, तसेच BCCI चे उपाध्यक्ष राजीव शुक्ला आणि दिल्ली आणि डिस्ट्रिक्ट क्रिकेट असोसिएशनचे (DDCA) अध्यक्ष रोहन जेटली यांनी 'GG' ला वाढदिवसाच्या शुभेच्छा दिल्या.

युवराजने Instagram वर शुभेच्छा दिल्या. तो म्हणतो की, GG, तुला ठाऊक आहे की, मी नेहमीच तुझ्यासोबत आहे व माझी इच्छा आहे की, तू आणखीन बळकट व्हावे. वाढदिवसाच्या खूप खूप शुभेच्छा भाई. खूप पुढे जा आणि आम्हाला तुझ्यावर खूप गर्व आहे. खूप खूप प्रेम.

सुरेश रैनाने एक्सवर शुभेच्छा देताना लिहिले की, मैदानावरील एक फायटर, ह्रदयापासून एक विजेता आणि एक अशी व्यक्ती जो नेहमीच भारतीय क्रिकेटसाठी 'खंबीर'पणे उभा राहतो. तुला चांगले आरोग्य लाभो. आनंदी रहा आणि तू पुढील प्रवासात आणखीन काही विक्रम आपल्या नावे करो. प्रेरणा देत रहा व नेतृत्त्व करत रहा.

राजीव शुक्ला यांनी आपल्या शुभेच्छांमध्ये लिहिले की, क्रिकेटप्रती तुमची प्रचंड आवड, स्पर्धात्मक वृत्ती आणि भारतीय क्रिकेटप्रती असलेली अढळ बांधिलकी आम्हाला नेहमीच प्रेरणा देत राहील. भारतीय क्रिकेटचा विकासात योगदान देत रहा. तुझ्यासाठी येणारे वर्ष अधिक शानदार राहोत.

रोहन जेटली यांनीही प्रसारमाध्यमांशी संवाद साधताना गंभीरला शुभेच्छा दिल्या. ते म्हणाले की, वाढदिवसाच्या शुभेच्छा गौतम गंभीर. तुझ्या चांगले आरोग्य, आनंद आणि सलग यशाबाबत देवाकडे प्रार्थना करतो. दिल्लीकरांना आपला मुलगा व भारतीय क्रिकेटमधील त्याच्या अमुल्य योगदानाबाबत नेहमीच अभिमान असेल. तू भविष्यातील पीढ्यांना प्रेरणा देत आहेस.

डावखुरा सलामीवीर असलेल्या गंभीरने 2003 ते 2016 या काळात भारतासाठी 58 टेस्ट, 147 वनडे आणि 37 टी-20 सामने खेळले. टेस्टमध्ये त्याने 9 शतके आणि 22 अर्धशतकांच्या मदतीने 4,154 धावा केल्या. वनडेत 11 शतके आणि 34 अर्धशतकांच्या जोरावर त्याच्या नावावर 5,238 धावा आहेत, तर टी-20 मध्ये 7 अर्धशतकांसह त्याने 932 धावा केल्या.

2007 चा टी-20 विश्वचषक आणि 2011 चा वनडे विश्वचषक भारताने जिंकला, त्या दोन्ही विजयांमध्ये गंभीरची भूमिका अविस्मरणीय ठरली. त्याने 2018 साली क्रिकेटच्या सर्व फॉरमेटमधून निवृत्ती घेतली.

आता गंभीर प्रशिक्षकाच्या रूपात भारतीय क्रिकेटमधील आपली दुसरी इनिंग खेळत आहे. 9 जुलै 2024 रोजी त्याची भारतीय संघाच्या मुख्य प्रशिक्षकपदी निवड झाली. त्याच्या मार्गदर्शनाखाली भारताने आयसीसी चॅम्पियन्स ट्रॉफी 2025 आणि टी-20 विश्वचषक 2026 जिंकला आहे. मुख्य प्रशिक्षक म्हणून त्याचा कार्यकाळ वनडे विश्वचषक 2027 पर्यंत आहे.