छत्रपती संभाजीनगरमध्ये विकलेल्या प्लॉटची दुसऱ्याच्या नावे नोंदणी; चार जणांवर गुन्हा दाखल

छत्रपती संभाजीनगरमध्ये एकाच प्लॉटची दोनदा नोंदणी करून फसवणूक केल्याच्या आरोपावरून सिटीचौक पोलीस स्टेशनमध्ये चार जणांविरुद्ध गुन्हा दाखल करण्यात आला आहे. विकलेला आणि ताब्यात असलेला प्लॉट २०२१ मध्ये मुलाच्या नावे नोंदणीकृत खरेदीखताने देण्यात आला होता. त्यानंतर २०२३ मध्ये त्याच प्लॉटची दुसऱ्याच्या नावे पुन्हा नोंदणी करण्यात आली, असा आरोप आहे. हा प्रकार १८ ऑगस्ट २०२१ ते १७ जानेवारी २०२३ दरम्यान घडल्याचे सांगण्यात आले.

या प्रकरणात तुळसाबाई पांडुरंग प्रधान (तक्षशिलानगर), विजय रमेश किर्तिकर (संसारनगर, क्रांतीचौक), गणेश चंबूलाल परदेशी (गड्डीगुडम, छावणी) आणि राजू पांडुरंग प्रधान (तक्षशिलानगर) यांच्याविरुद्ध गुन्हा नोंदवण्यात आला आहे. पौर्णिमा विश्वन्नाथ हिवराळे (४८, हायकोर्ट कॉलनी, सातारा परिसर) यांनी फिर्याद दिली आहे.

फिर्यादीनुसार, त्यांच्या वडिलांनी क्रांतीचौक परिसरात कर्मवीर दादासाहेब गायकवाड मागासवर्गीय गृहनिर्माण संस्था सुरू केली होती. फिर्यादीच्या आई-वडिलांनी ओळखीच्या तुळसाबाई प्रधान यांच्या नावे सोसायटीचा सिटी सर्व्हे नंबर १७९५२ मधील प्लॉट क्रमांक १७/१, क्षेत्र ४१.८२ चौरस मीटर, अलॉटमेंट करून दिला होता. हा प्लॉट १३ जुलै २००४ रोजी तुळसाबाई यांच्याकडून खरेदी करण्याचे फिर्यादीने ठरवले होते. त्या वेळी एक लाख रुपयांचा व्यवहार ठरला आणि प्लॉटचा ताबाही देण्यात आला, असे फिर्यादीत नमूद आहे.

रोख रकमेचे हप्ते असे दिल्याचे फिर्यादीत म्हटले आहे: १३ जुलै २००४ रोजी १९ हजार रुपये, १३ मे २००८ रोजी १२ हजार रुपये, २७ जानेवारी २००९ रोजी १२ हजार रुपये आणि ७ जुलै २०११ रोजी ५० हजार रुपये. या व्यवहारांच्या वेळी स्टॅम्प पेपरवर करारनामे करण्यात आले. पुढे २०१५ मध्ये तुळसाबाई प्रधान यांनी प्लॉटसाठी दहा लाख रुपये मागितले. त्यानंतर उर्वरित रक्कमही वेळोवेळी रोख दिल्याचा दावा फिर्यादीत केला आहे.

सर्व व्यवहार झाल्यानंतर १८ ऑगस्ट २०२१ रोजी प्लॉटचे नोंदणीकृत खरेदीखत करण्यात आले. हिवराळे यांनी हे खरेदीखत आपल्या मुलाच्या नावे करून घेतले. मात्र मुलगी प्रसूतीसाठी पुण्याला गेल्याने तिच्यासोबत राहण्यासाठी हिवराळे यांना पुण्याला जावे लागले आणि मालमत्ता पत्रकावर नाव लावण्याची प्रक्रिया राहून गेली. परत आल्यावर मुलाच्या नावे मालमत्ता पत्रकावर नोंद करण्यासाठी त्या जिल्हाधिकारी कार्यालयात गेल्या. तेव्हा ही मालमत्ता विजय किर्तिकर यांच्या नावे असल्याची माहिती मिळाल्याचे फिर्यादीत म्हटले आहे.

त्यानंतर हिवराळे यांनी मालमत्ता पत्रकाची प्रत घेतली. तसेच दुय्यम निबंधक कार्यालयातून विजय किर्तिकर यांच्या खरेदीखताची प्रत मिळवली. त्यातून १७ जानेवारी २०२३ रोजी दस्त क्रमांक ५०४/२०२३ अन्वये त्याच प्लॉटची किर्तिकर यांच्या नावे नोंदणी झाल्याचे लक्षात आले. फसवणूक झाल्याचे समजल्यावर हिवराळे यांनी सिटीचौक पोलीस स्टेशन गाठून तक्रार दिली आणि त्यावरून गुन्हा दाखल करण्यात आला. प्रकरणाचा पुढील तपास उपनिरीक्षक भागवत मुठाळ करत आहेत.