गुजगव्हानच्या अशोका बारजवळ मारहाण; जखमी तरुण नागपूरच्या एम्समध्ये अजूनही बेशुद्ध

शेगाव बु. पोलीस स्टेशनमध्ये अशोका बार मारहाण प्रकरणी गुन्हा दाखल झाला आहे. गुजगव्हान येथील बारच्या गेटसमोर एका तरुणाला मारहाण झाल्याची तक्रार आहे. श्यामसुंदर गायकवाड (रा. खानगाव, ता. चिमूर) असे जखमी तरुणाचे नाव असून, त्याच्यावर नागपूरच्या एम्स रुग्णालयात उपचार सुरू आहेत. तक्रारीनुसार ही घटना ४ ऑक्टोबर रोजी घडली.

जखमीचे वडील शालिक चंपत गायकवाड (वय ६२) यांच्या तक्रारीवरून नेरी येथील रोशन कामडी (वय २८) याच्याविरुद्ध भारतीय न्याय संहितेच्या कलम १०९(१) अन्वये गुन्हा नोंदवण्यात आला आहे. पोलीस उपनिरीक्षक सुमित कांबळे या प्रकरणाचा तपास करत आहेत.

पोलीस सूत्रांकडून मिळालेल्या माहितीनुसार, श्यामसुंदर हा ४ ऑक्टोबर २०२६ रोजी सकाळी निमढेला येथे एका मयताच्या कार्यक्रमासाठी गेला होता. त्याच दिवशी दुपारी पाचच्या सुमारास पंचम रामटेके आणि सदिप नैताम यांनी त्याला दुचाकीवरून खानगाव येथील घरी आणून सोडले. त्यावेळी त्याच्या डोक्याला, चेहऱ्याला आणि पायाच्या अंगठ्याला गंभीर दुखापत झालेली होती. त्याचा अपघात झाला आहे, असे सांगून ते दोघे निघून गेले.

कुटुंबीयांनी तातडीने चारचाकी वाहनाची सोय करून त्याला उपचारासाठी आधी वरोरा आणि नंतर चंद्रपूर येथील शासकीय रुग्णालयात नेले. प्रकृती अत्यंत चिंताजनक असल्याने डॉक्टरांच्या सल्ल्यानुसार त्याला नागपूर येथील एम्स रुग्णालयात दाखल करण्यात आले. तो आजही बेशुद्ध अवस्थेत असून त्याच्यावर उपचार सुरू आहेत.

दरम्यान, ६ ऑक्टोबर रोजी शालिक गायकवाड गावात परतले. ७ ऑक्टोबरच्या सायंकाळी प्रत्यक्षदर्शी आकाश पाटील याने या प्रकरणातील खरी हकीकत सांगितली, असे पोलीस सूत्रांनी म्हटले आहे. त्यानुसार ४ ऑक्टोबर रोजी दुपारी चारच्या सुमारास गुजगव्हान येथील अशोका बारच्या गेटजवळ नेरीचा रहिवासी रोशन कामडी (वय २८) याने श्यामसुंदरसोबत जोरदार भांडण केले. आरोपीने श्यामसुंदरच्या शर्टची कॉलर व गच्ची पकडून त्याला बेदम मारहाण केली, असे सांगितले जाते. त्यानंतर श्यामसुंदर शेतातील बंड्याकडे निघून गेला, तर आरोपी रोशन कामडी जवळच उभा होता.

अपघाताचा बनाव रचून श्यामसुंदरला घरी पोहोचवण्यात आले असले, तरी जुन्या भांडणाच्या कारणावरून आरोपीने जीवे मारण्याच्या उद्देशानेच ही बेदम मारहाण केल्याचे समोर आले, असे या माहितीत म्हटले आहे.

या माहितीनंतर जखमी तरुणाचे वडील शालिक गायकवाड यांनी ८ ऑक्टोबर रोजी शेगाव बु. पोलीस स्टेशनमध्ये जाऊन तोंडी तक्रार नोंदवली. त्यांच्या तक्रारीवरून पोलिसांनी आरोपी रोशन कामडी याच्याविरुद्ध गुन्हा नोंदवला असून, पोलीस उपनिरीक्षक सुमित कांबळे या प्रकरणाचा पुढील सखोल तपास करत आहेत.