वैजापूरच्या नॅचरल डेअरीचा परवाना निलंबित, ९४ पैकी फक्त १५ गुण; पनीर, क्रीम, तुपाचा साठा नष्ट
छत्रपती संभाजीनगर जिल्ह्यातील वैजापूर येथील नॅचरल डेअरीवर अन्न व औषध प्रशासनाने (एफडीए) कारवाई केली. अन्न परवाना तात्काळ निलंबित करण्यात आला असून ४२ हजार ८८० रुपयांचा दुग्धजन्य पदार्थांचा साठा नष्ट करण्यात आला.
छत्रपती संभाजीनगर जिल्ह्यातील वैजापूर येथे दुग्धजन्य पदार्थ तयार करणाऱ्या नॅचरल डेअरीवर अन्न व औषध प्रशासनाने (एफडीए) कारवाई केली आहे. छत्रपती संभाजीनगरमध्ये पुन्हा एकदा दुग्धजन्य पदार्थ तयार करणाऱ्या डेअरीत अन्न सुरक्षा नियमांची अक्षरशः पायमल्ली होत असल्याचे प्रशासनाच्या तपासणीत उघड झाले, असे प्रशासनाने म्हटले आहे. त्यानंतर डेअरीचा अन्न परवाना तात्काळ निलंबित करण्यात आला.
यशवंत कॉलनी, रामगिरी नगर (प्लॉट क्र. १) येथे ही डेअरी आहे. २ ऑक्टोबर रोजी अन्न सुरक्षा अधिकारी प्रज्ञा सुरसे यांच्या पथकाने तिथे अचानक धाड टाकली. प्लांटमधील अस्वच्छता आणि नियमभंगाची स्थिती पाहता डेअरीला एफएसएसएआयच्या निकषांमध्ये ९४ पैकी केवळ १५ गुण मिळाले.
तपासणीदरम्यान प्लांटची फरशी अनेक ठिकाणी तुटलेली आढळली. दरवाजे उघडे होते आणि खिडक्यांना कीटक प्रतिबंधक जाळ्या नव्हत्या. प्लांटमध्ये वापरल्या जाणाऱ्या पाण्याचे पिण्यायोग्य असल्याबाबत मानकानुसार केलेला चाचणी अहवालही उपलब्ध नव्हता. विशेष म्हणजे, डेअरीत येणाऱ्या कच्च्या दुधाची प्राथमिक तपासणी केली जात नसल्याचे समोर आले. दूध ५ अंश सेल्सिअस किंवा त्यापेक्षा कमी तापमानात ठेवण्यासाठी आवश्यक असलेली यंत्रणा किंवा तापमान दर्शक तिथे नव्हता.
दुधातील भेसळ तपासणीच्या नोंदीही सापडल्या नाहीत. दूध साठवण्यासाठी स्टेनलेस स्टीलच्या टाक्यांचा वापर अपेक्षित असताना प्लास्टिकच्या कॅनचा वापर केला जात होता. सांडपाणी प्रक्रिया प्रकल्प सुरू नव्हता, उपकरणांच्या स्वच्छतेच्या नोंदी नव्हत्या आणि कीटक नियंत्रणाची योग्य अंमलबजावणी होत नव्हती, या त्रुटीही तपासणीत समोर आल्या.
दूध हाताळणाऱ्या कर्मचाऱ्यांकडे अॅप्रन, हातमोजे आणि डोक्यावरील टोपी नव्हती. वैयक्तिक स्वच्छतेचा अभाव होता आणि कर्मचाऱ्यांना अन्न सुरक्षेबाबत आवश्यक प्रशिक्षणही देण्यात आले नव्हते, असेही तपासणीत समोर आले.
या कारवाईत ५९ किलो पनीर (१८,८८० रुपये), ११ किलो क्रीम (४,४०० रुपये) आणि २८ किलो तूप (१९,६०० रुपये) असा एकूण ४२ हजार ८८० रुपयांचा दुग्धजन्य पदार्थांचा साठा जप्त करून नष्ट करण्यात आला.
नॅचरल डेअरीला एकूण ९४ पैकी केवळ १५ गुण मिळाले. प्लांटची स्वच्छता, पाण्याची गुणवत्ता, कच्च्या दुधाची तपासणी, तापमान नियंत्रण, भेसळ तपासणीच्या नोंदी, दूध साठवणूक, ईटीपी, कीटक नियंत्रण आणि कर्मचाऱ्यांची वैयक्तिक स्वच्छता अशा अनेक मूलभूत बाबींमध्ये त्रुटी आढळल्याने डेअरी 'नॉन-कम्प्लायन्स' ठरली.
अन्न सुरक्षा नियमांकडे दुर्लक्ष करणाऱ्या दुग्ध व्यावसायिकांवर यापुढेही प्रशासनाची करडी नजर राहणार आहे. नागरिकांच्या आरोग्याशी संबंधित बाबतीत कठोर कारवाई केली जाईल, असे सहआयुक्त श्रीकांत करकळे यांनी स्पष्ट केले.
