आरबीआयमध्ये फार्मासिस्टच्या २२ पदांची भरती; तासाला ६०० रुपये वेतन

भारतीय रिझर्व्ह बँकेने (RBI) कंत्राटी तत्त्वावर फार्मासिस्टच्या २२ पदांसाठी भरती जाहीर केली आहे. ही भरती मुंबई आणि नवी मुंबई येथील आरबीआयच्या दवाखान्यांमध्ये केली जाणार आहे. या भरतीत निवड झालेल्या उमेदवारांना तासांनुसार वेतन दिले जाईल, म्हणजेच कामाच्या तासांच्या हिशोबाने त्यांना पैसे मिळतील.

उमेदवाराला प्रतितास ६०० रुपये मिळतील. एखाद्याने दिवसाला ५ तास काम केले, तर त्याला दिवसाला ३,००० रुपयांपर्यंत वेतन मिळू शकते. मात्र या भरतीत कोणतेही भत्ते दिले जाणार नाहीत. नियुक्ती एका वेळी जास्तीत जास्त २४० दिवसांसाठी कंत्राटी तत्त्वावर असेल आणि गरजेनुसार उमेदवारांना कामासाठी बोलावले जाईल. या कामामुळे कायमस्वरूपी किंवा तात्पुरत्या पदावर हक्क निर्माण होणार नाही, असे बँकेने स्पष्ट केले आहे.

अर्ज करणाऱ्या उमेदवाराकडे मॅट्रिक किंवा त्याच्या समकक्ष शैक्षणिक पात्रता असणे आवश्यक आहे. त्यासोबत मान्यताप्राप्त संस्थेचा फार्मसीमधील डिप्लोमा किंवा बी. फार्म. पदवी असणे गरजेचे आहे. उमेदवाराची फार्मसी अधिनियम, १९४८ अंतर्गत नोंदणी असावी. याशिवाय महाराष्ट्र राज्य फार्मसी परिषदेकडे नोंदणी असणे ही महत्त्वाची अट आहे. उमेदवाराकडे दोन वर्षांचा कामाचा अनुभवही असावा. सरकारी बँक किंवा सरकारी संस्थेत काम केलेल्या उमेदवारांना प्राधान्य दिले जाईल.

निवड कशी होणार, याबद्दलही बँकेने माहिती दिली आहे. उमेदवाराची शैक्षणिक पात्रता आणि विविध बँक दवाखान्यांपासून त्याच्या राहत्या जागेचे अंतर पाहून निवड केली जाईल. सरकारी संस्था किंवा आरबीआयमधील कामाचा अनुभवही विचारात घेतला जाईल. प्राथमिक छाननीनंतर पात्र उमेदवारांना मुलाखतीसाठी बोलावले जाईल. त्यानंतर त्यांची वैद्यकीय तपासणी आणि कागदपत्रांची पडताळणी होईल.

इच्छुक उमेदवारांना ३ नोव्हेंबर २०२६ रोजी सायंकाळी ५ वाजेपर्यंत ऑफलाइन पद्धतीने अर्ज करता येईल. अर्ज टपालाने पाठवता येईल किंवा प्रत्यक्ष उपस्थित राहूनही देता येईल. अर्ज सीलबंद लिफाफ्यात पाठवायचा असून त्या लिफाफ्यावर "मुंबई येथे निश्चित प्रतितास मानधनावर कंत्राटी तत्त्वावर फार्मासिस्ट पदासाठी अर्ज" असे लिहावे.

अर्ज क्षेत्रीय संचालक, मानव संसाधन व्यवस्थापन विभाग, भरती कक्ष, भारतीय रिझर्व्ह बँक, मुंबई क्षेत्रीय कार्यालय, शहीद भगतसिंग रोड, फोर्ट, मुंबई - ४००००१ या पत्त्यावर पाठवावा. अर्ज अधिसूचनेतील अ‍ॅनेक्सचर-१ मध्ये दिलेल्या नमुन्यातच भरावा लागेल. इतर कोणत्याही नमुन्यातील अर्ज नाकारला जाईल.