रत्नागिरी: परतीच्या प्रवासात ट्रॅफिकचे विघ्न; दुहेरी वाहतुकीमुळे मुंबई-गोवा महामार्गावर वाहनांची प्रचंड गर्दी
गणेशोत्सवानंतर कोकणातून मुंबईकडे परतणाऱ्या चाकरमान्यांना इंदापूर परिसरातील प्रचंड ट्रॅफिक कोंडीचा फटका बसला असून, यात रुग्णवाहिकाही अडकल्याची प्राथमिक माहिती आहे.
गणपती बाप्पाच्या विसर्जनानंतर रत्नागिरी आणि सिंधुदुर्ग या तळ कोकणातील लाखो चाकरमानी मुंबईच्या दिशेने परतीच्या प्रवासाला निघाले आहेत. गणेशोत्सवाचा उत्साह संपून बाप्पाला निरोप दिल्यानंतर आपापल्या कामाच्या ठिकाणी परतण्यासाठी हे चाकरमानी वाटेला लागले आहेत. मात्र मुंबई-गोवा महामार्गावरील इंदापूर परिसरात लागलेल्या भीषण ट्रॅफिक कोंडीमुळे या प्रवाशांच्या गाड्यांना जागच्या जागी ब्रेक लागला. ऐन परतीच्या प्रवासात उद्भवलेल्या या अडचणीमुळे प्रवासी आणि त्यांचे कोकणातील नातेवाईक दोघेही चिंतेत सापडले आहेत.
मुंबईच्या दिशेने निघालेली आपली माणसं सुखरूप पोहोचतात की नाही, या काळजीने कोकणातील घरातील मंडळी सतत फोनवरून खुशाली विचारत आहेत. इंदापूर भागात वाहतूक पोलीस आणि सरकारी यंत्रणा ही कोंडी सोडवण्यासाठी शर्थीचे प्रयत्न करत आहेत, पण हा महामार्ग नेमका कधी मोकळा होणार, याचीच सगळ्यांना प्रतीक्षा आहे. एकाच रस्त्यावरून दोन्ही बाजूंची म्हणजे मुंबईकडे जाणारी आणि मुंबईहून येणारी अशी दोन्ही दिशांची वाहतूक एकाच वेळी सुरू ठेवण्यात आल्याने ही कोंडी आणखी गंभीर बनली.
मुंबईकडे जाणारी वाहने एकाच वेळी तीन ते चार रांगांमध्ये घुसल्यामुळे परिस्थिती पूर्णपणे हाताबाहेर गेली. काही ठिकाणी तर वाहने तासन् तास जागेवरून हलतच नव्हती. यातील सर्वात गंभीर बाब म्हणजे या कोंडीत काही रुग्णवाहिकाही अडकल्याची प्राथमिक माहिती पुढे आली आहे. गंभीर रुग्णांना घेऊन जाणाऱ्या रुग्णवाहिकांना पुढे जाण्यासाठी वाट मिळत नसल्याने रुग्णांच्या नातेवाईकांची अवस्था अत्यंत बिकट झाली होती. या रुग्णवाहिकांना कोंडीतून मार्ग काढणे शक्य होत नव्हते, यामुळे रुग्णांच्या कुटुंबीयांचा जीव टांगणीला लागला होता. योग्य नियोजनाअभावी या कोंडीचा मोठा फटका सर्वांना बसला.
सोमवार, २१ सप्टेंबर रोजी इंदापूर ते कोसिंबळे या मार्गावर वाहतूक व्यवस्थेचा पुरता बोजवारा उडाल्याचे चित्र दिसले. मुंबईकडे जाणाऱ्या मार्गावर तब्बल १० किलोमीटरपर्यंत वाहनांच्या रांगा लागल्या होत्या. यामुळे मुंबईकडे निघालेल्या चाकरमान्यांसोबतच माणगाव आणि महाडच्या दिशेने जाणाऱ्या स्थानिक वाहनचालकांनाही मोठा मनस्ताप सहन करावा लागला. या भागातून नियमित प्रवास करणाऱ्या स्थानिक नागरिकांनाही याचा तितकाच त्रास झाला.
सणासुदीच्या दिवसांत म्हणजे गणेशोत्सवाच्या काळात रस्त्यावरील वाहनांची संख्या मोठ्या प्रमाणात वाढली, पण त्या तुलनेत योग्य नियोजन नसल्यामुळे ही समस्या निर्माण झाली. वाहने एकमेकांच्या अगदी जवळ अडकल्याने प्रवाशांना तासनतास एकाच जागी उभे राहावे लागले. यामुळे चाकरमान्यांच्या आनंदी प्रवासाचा हिरमोड झाला असून महामार्गावरील या दुरवस्थेबद्दल संताप व्यक्त होत आहे. कोंडी वाढत असतानाच काही घाईगडबडीत असलेल्या बेशिस्त वाहनचालकांनी नियम धाब्यावर बसवून ओव्हरटेकिंग सुरू केले, त्यामुळे रस्त्यावरील गोंधळ आणि कोंडी आणखी वाढली.
ही बातमी प्रकाशित झाली आहे पण थेट मालिका सुरू झालेली नाही. डेस्कने अपडेट दाखल करताच तो इथे दिसेल.
