रणबीर कपूरची लेक राहा रोज सकाळी ऐकते अमिताभ बच्चन यांच्या आवाजातील हनुमान चालीसा

बॉलिवूड अभिनेता रणबीर कपूर सध्या त्याच्या आगामी 'रामायण' चित्रपटामुळे चर्चेत आहे. या चित्रपटात तो प्रभू रामाची भूमिका साकारणार आहे. नुकताच तो अभिनेत्री साई पल्लवी आणि अभिनेता रवी दुबे यांच्यासोबत 'कौन बनेगा करोडपती' या लोकप्रिय रिअॅलिटी शोमध्ये सहभागी झाला होता.

या कार्यक्रमात महानायक अमिताभ बच्चन यांच्याशी गप्पा मारताना रणबीरने पत्नी आलिया भट्ट आणि मुलगी राहा कपूर यांच्याबद्दल अनेक खास गोष्टी सांगितल्या. त्यातला एक खुलासा विशेष लक्ष वेधून घेणारा ठरला आहे.

'कौन बनेगा करोडपती'च्या मंचावर राहाच्या एका खास सवयीबद्दल बोलताना रणबीर म्हणाला, "माझ्या मुलीचा जन्म झाल्यापासून असा एकही दिवस गेलेला नाही, ज्या दिवशी आम्ही सकाळी तुम्ही गायलेली हनुमान चालीसा ऐकली नसेल." म्हणजेच अमिताभ बच्चन यांच्या आवाजातील हनुमान चालीसा रणबीर आणि आलिया आपल्या लेकीला ऐकवतात.

रणबीरचे हे बोलणे ऐकून अमिताभ बच्चन यांनाही आनंद झाला. त्यांनी प्रेमाने 'व्वा, काय छान गोष्ट आहे!' अशी प्रतिक्रिया दिली. हा खास किस्सा आता चर्चेत आला आहे.

याच कार्यक्रमात रणबीरने पत्नी आलिया भट्टसोबतच्या नात्यावरही भाष्य केले. त्याच्या मते, त्यांच्या नात्याचा पाया मैत्री आहे. प्रेम नात्याला जोडून ठेवते, विश्वास नात्याला मजबूत बनवतो आणि एकमेकांबद्दलचा आदर नातं टिकवून ठेवतो, असे रणबीरने सांगितले.

रणबीर आणि आलिया यांनी १४ एप्रिल २०२२ रोजी मुंबईतील घरी एका खासगी समारंभात लग्न केले. त्यानंतर ६ नोव्हेंबर २०२२ रोजी त्यांची मुलगी राहा हिचा जन्म झाला. दोघेही अनेकदा आपल्या मुलीबद्दलच्या खास गोष्टी सांगताना दिसतात.

दरम्यान, रणबीर कपूर सध्या नितेश तिवारी दिग्दर्शित आगामी 'रामायण' चित्रपटामुळेही चर्चेत आहे. हा चित्रपट दोन भागांत येणार असून त्यात रणबीर प्रभू रामाची भूमिका साकारणार आहे. अभिनेत्री साई पल्लवी सीतेच्या, यश रावणाच्या, तर रवी दुबे लक्ष्मणाच्या भूमिकेत दिसणार आहेत.

'रामायण: पार्ट वन' हा चित्रपट ५ नोव्हेंबर २०२६ रोजी जगभरातील चित्रपटगृहांमध्ये प्रदर्शित होणार असल्याचे सांगितले जात आहे. त्यामुळे रणबीरच्या या महत्त्वाकांक्षी चित्रपटाबद्दल चाहत्यांमध्ये उत्सुकता आहे.