'रामायण'चा दुसरा भाग थेट 2028 च्या दिवाळीत येण्याची शक्यता, व्हीएफएक्ससाठी हवा जास्त वेळ

नितेश तिवारी दिग्दर्शित 'रामायण' हा सध्या बॉलिवूडमधला सगळ्यात मोठा सिनेमा मानला जातो. अनेकजण या सिनेमाची आतुरतेने वाट पाहत आहेत. रणबीर कपूर रामाच्या भूमिकेत, तर साई पल्लवी सीतेच्या भूमिकेत दिसणार आहे. आता या सिनेमाच्या दुसऱ्या भागाबद्दल एक मोठी अपडेट समोर आली आहे आणि ती ऐकून चाहत्यांना धक्का बसला आहे.

आधी असं ठरलं होतं की सिनेमा दोन भागांत येईल. पहिला भाग 2026 मध्ये आणि दुसरा भाग त्यानंतर बरोबर एका वर्षाने, म्हणजे 2027 च्या दिवाळीत. त्यामुळे प्रेक्षकांना फार वाट पाहावी लागणार नव्हती. पहिल्या भागाचं नाव 'रामायण: राइज ऑफ अ लीजेंड' असं आहे. तो 5 नोव्हेंबरला थिएटरमध्ये येणार आहे आणि त्यात कोणताही बदल झालेला नाही.

मात्र आता मिळालेल्या माहितीनुसार, निर्माते नमित मल्होत्रा यांनी दुसरा भाग 2027 मध्ये न आणता थेट 2028 च्या दिवाळीत आणायचं ठरवलं आहे. म्हणजे दोन भागांमध्ये एका वर्षाचं नाही, तर दोन वर्षांचं अंतर पडणार आहे.

हा निर्णय का घेतला, याचं कारणही मोठं आहे. घाई कशासाठी करायची, असा प्रश्न निर्मात्यांना पडला. सूत्रांच्या म्हणण्यानुसार 'रामायण' हा नमित मल्होत्रा यांच्यासाठी नुसता एक सिनेमा नाही, तर त्यांचं स्वप्न आहे. हा सिनेमा त्यांना जागतिक दर्जाचा बनवायचा आहे. हॉलिवूडच्या 'अवतार' आणि 'ॲव्हेंजर्स' सारखा व्हीएफएक्स त्यांना या सिनेमात हवा आहे आणि कुठल्याही बाबतीत तडजोड करायची नाही.

दुसऱ्या भागातच खरी रामायणाची गोष्ट सुरू होणार आहे. युद्ध, रावण, वानरसेना हे सगळं दुसऱ्या भागात असणार आहे. त्यासाठी प्रचंड व्हीएफएक्सचं काम करावं लागेल. शूटिंग, एडिटिंग आणि ग्राफिक्सला खूप वेळ लागतो. घाईत सिनेमा खराब करण्यापेक्षा वेळ घेऊन चांगला सिनेमा बनवलेला बरा, असं निर्मात्याचं म्हणणं आहे. प्रत्येक सीनवर आणि प्रत्येक फ्रेमवर बारकाईने काम करण्यासाठी त्यांना जास्त वेळ हवा आहे. भारतीय प्रेक्षकांनी आजपर्यंत असा सिनेमा पाहिला नसेल, असा अनुभव त्यांना द्यायचा आहे.

दोन भागांमध्ये दोन वर्षांचं अंतर असल्यामुळे आता पहिल्या भागावर जास्त जबाबदारी आली आहे. पहिल्या भागात राम, सीता आणि इतर पात्रांची ओळख होणार आहे. कथेची सुरुवात कशी झाली, हे त्यात दाखवलं जाईल.

पहिला भाग लोकांना आवडला आणि बॉक्स ऑफिसवर चालला, तरच लोक दुसऱ्या भागासाठी दोन वर्ष थांबतील. त्यामुळे 5 नोव्हेंबरला येणारा पहिला भाग कसा असतो आणि लोकांना तो आवडतो का, हे पाहणं महत्त्वाचं ठरेल.

अजून तरी निर्मात्यांनी 2028 ची तारीख अधिकृतपणे जाहीर केलेली नाही. पण दिवाळी 2028 हेच त्यांचं लक्ष्य आहे. थोडं थांबावं लागेल, पण चांगला सिनेमा मिळेल अशी आशा आहे.