राजुरात नातेवाईक महिलेवर घरातून सोने-रोकड लांबवल्याचा आरोप, गुन्हा दाखल

राजुरा येथील पेठवार्ड भागात राहणाऱ्या एका सेवानिवृत्त कर्मचाऱ्याच्या घरातून सोन्याचे दागिने व रोकड गायब झाल्याचा प्रकार समोर आला असून, या प्रकरणी घरी पाहुणी म्हणून आलेल्या नातेवाईक महिलेवरच चोरीचा संशय व्यक्त करण्यात आला आहे. राजुरा पोलीस ठाण्यात संशयित सुनिता परचाके हिच्याविरोधात भारतीय न्याय संहितेच्या कलम ३०५ अन्वये गुन्हा दाखल करण्यात आला आहे.

पेठवार्ड भागात भाड्याच्या घरात राहणारे ६० वर्षीय अशोक बापुराव कोवे हे महावितरणमधून (MSEB) सेवानिवृत्त झालेले कर्मचारी आहेत. २०२३ साली त्यांच्या पत्नीचे निधन झाले आणि मे २०२६ मध्ये त्यांच्या एकुलत्या एका मुलीचे लग्न झाल्यानंतर ते घरी एकटेच राहत होते. त्यांची मुलगी सुप्रिया दर आठवड्याला माहेरी येऊन वडिलांची विचारपूस करत असे आणि स्वतःचे तसेच आईचे दागिने सुरक्षिततेसाठी वडिलांच्याच घरी ठेवत असे.

गेल्या ९ सप्टेंबरला सासरी वायगावला परत जाण्यापूर्वी सुप्रियाने कानातील झुमके (३ ग्रॅम), दोन डोर्ले व १७ मणी असलेली पोत (१० ग्रॅम), पुरुषांची अंगठी (१५ ग्रॅम), नाकातील नथ (१ ग्रॅम) असे मिळून सुमारे २९ ग्रॅम सोन्याचे दागिने आणि ४० हजार रुपये रोकड असलेली पर्स घरातील धान्याच्या कोठीत ठेवून दिली होती.

सुप्रिया सासरी पोहोचल्यानंतर तिच्या मावशी, म्हणजेच संशयित सुनिता परचाके (रा. नोकारी/पालगाव, ता. कोरपना) हिने तिला फोन करून ती कुठे आहे याची विचारपूस केली. सुप्रियाने आपण सासरी परतल्याचे आणि वडील घरी एकटेच असल्याचे सांगितले. यानंतर १० सप्टेंबरला सकाळी सुमारे ९ वाजता सुनिता परचाके अशोक कोवे यांच्या घरी पोहोचली आणि जेवण बनवून देण्याच्या बहाण्याने स्वयंपाकघरात गेली. साधारण दोन तास घरात थांबून ती सकाळी ११ वाजण्याच्या सुमारास तिथून निघून गेली.

त्यानंतर दुसऱ्याच दिवशी, ११ सप्टेंबरला सकाळी ९ वाजता अशोक कोवे आंघोळीसाठी पाणी तापवायला गेले असता त्यांना धान्याच्या कोठीचे कुलूप उघडे असल्याचे दिसले. शंका आल्याने त्यांनी कोठी उघडून पाहिली असता त्यातील दागिन्यांची पर्स गायब असल्याचे लक्षात आले. त्यांनी लगेच मुलीला फोन करून घरी बोलावले. सुप्रिया घरी येऊन तपासणी केली असता ९ हजार रुपये किमतीचे झुमके, ३० हजार रुपये किमतीची पोत व डोर्ले, ४५ हजार रुपये किमतीची अंगठी आणि ३ हजार रुपये किमतीची नथ असे मिळून ८७ हजार रुपयांचे सुमारे २९ ग्रॅम सोने आणि पर्समधील १० हजार रुपये रोकड असा एकूण ९७ हजार रुपयांचा मुद्देमाल चोरीला गेल्याचे स्पष्ट झाले.

घरातील जवळची नातेवाईक असल्यानेच या प्रकरणी संशय व्यक्त करण्यास आणि तक्रार देण्यास काही दिवस विलंब झाला. अखेर २२ सप्टेंबरला अशोक कोवे यांनी राजुरा पोलीस ठाण्यात जाऊन घडलेला प्रकार सांगितला आणि तोंडी तक्रार नोंदवली. या तक्रारीच्या आधारे राजुरा पोलिसांनी सुनिता परचाके हिच्याविरोधात गुन्हा दाखल केला आहे. ठाणे अंमलदार नितीनकुमार चिंचोलकर यांच्या मार्गदर्शनाखाली पोलीस हवालदार अनुप डांगे हे या प्रकरणाचा पुढील तपास करत आहेत.