शेंगा विकणारा 'फल्ली' एमडी तस्करीत कोट्यवधींचा धनी, नागपुरात १७ साथीदारांवर गुन्हे

नागपुरात रस्त्याच्या कडेला भुईमुगाच्या शेंगांचा ठेला लावून दिवसाला जेमतेम ३०० रुपये कमावणारा विशाल उर्फ 'फल्ली' पृथ्वीलाल गुप्ता (२५) आता एमडी या अमली पदार्थाच्या कोट्यवधींच्या व्यवहारात अडकला आहे. शेंगांच्या पुड्या बांधणारे त्याचे हात पुढे अमली पदार्थांच्या पुड्या वाटू लागले.

पोलीस तपासातून समोर आले आहे की, झटपट पैसा कमावण्याच्या हव्यासातून त्याने बेरोजगार तरुणांची फळी उभी केली. नागपूर आणि आजूबाजूच्या परिसरात अमली पदार्थांच्या पुरवठ्याची साखळी तयार केली. अवघ्या पाच वर्षांत त्याने अमली पदार्थांची खरेदी, विक्री आणि पुरवठा करणारे कोट्यवधींचे साम्राज्य उभे केल्याचे तपासात दिसते.

मुलाने काम करून घराला हातभार लावावा, या अपेक्षेने वडिलांनी त्याला शेंगांचा ठेला लावून दिला होता. पण ठेल्यावर येणाऱ्या काही लोकांच्या ओळखीतून तो अमली पदार्थांच्या बेकायदा व्यवहारांकडे वळला. सुरुवातीला अमली पदार्थ इकडून तिकडे नेण्याचे आणि त्यात इतर पदार्थ मिसळण्याचे काम करण्यासाठी त्याला दोन ते तीन हजार रुपये मिळायचे, असे तपासात पुढे आले आहे. झटपट पैशांची सवय लागल्यावर शेंगांचा ठेला मागे पडला आणि त्याने कथितरीत्या गुन्हेगारीचा रस्ता धरला.

पोलिसांच्या तपासानुसार, फल्लीने हळूहळू स्वतःची यंत्रणा उभी केली. राजस्थान आणि मध्य प्रदेशातून अमली पदार्थ नागपुरात आणून स्थानिक ग्राहकांपर्यंत पोहोचवण्यासाठी त्याने बेरोजगार तरुणांना आपल्या जाळ्यात ओढले. गुन्हे शाखेचे वरिष्ठ पोलीस निरीक्षक विनायक गोल्हे आणि त्यांच्या पथकाने या कथित साखळीचा माग काढून कारवाई केली. या प्रकरणात त्याच्या सुमारे १७ साथीदारांविरुद्ध गुन्हे दाखल आहेत, तर ६ जणांना अटक झाली आहे.

फल्लीकडे व्यवहारांच्या नोंदी असलेली एक डायरी असल्याचेही तपासात समोर आले आहे. या नोंदींतून अमली पदार्थांचे पुरवठादार, ग्राहक आणि पैशांच्या देवाणघेवाणीचे धागेदोरे मिळण्याची शक्यता आहे. पोलिसांच्या नजरेतून सुटण्यासाठी तो वारंवार मोबाइल संच आणि सिमकार्ड बदलत होता, त्यामुळे त्याच्या हालचालींचा माग काढणे पोलिसांसाठी आव्हान ठरले. फरार झाल्यानंतर त्याने बालमैत्रीण सहेली उर्फ सोनू हिच्यासह कोराडी मंदिरात दर्शन घेतले आणि मग तो तामिळनाडूच्या दिशेने निघाला.

तपासात अशी योजना असल्याचे समोर आल्याची माहिती आहे की, राजस्थानातून आणलेल्या सुमारे दीड कोटी रुपयांच्या एमडीमध्ये इतर पदार्थ मिसळून त्याचे प्रमाण वाढवायचे आणि नागपुरात विकून अडीच ते तीन कोटी रुपये मिळवायचे. मात्र या कथित व्यवहाराचा संपूर्ण तपशील आणि त्यातली आर्थिक उलाढाल तपासातून स्पष्ट होणार आहे.

फल्ली शक्यतो स्वतः समोर न येता वेगवेगळे मोबाइल संच आणि क्रमांक वापरून साथीदारांच्या संपर्कात राहत होता, असे पोलीस तपासात निष्पन्न झाल्याचे सांगण्यात येते. त्याची बालमैत्रीण सहेली उर्फ सोनू आर्थिक व्यवहार सांभाळत होती, असा पोलिसांचा दावा आहे. त्यामुळे पैशांची देवाणघेवाण, पुरवठादार आणि ग्राहकांची साखळी उलगडण्यासाठी तिची चौकशी महत्त्वाची ठरणार आहे.