ॲक्शन सीनसाठी ब्रा न घालता शर्ट घालण्याची मागणी झाली, राधिका आपटेचा खुलासा

अभिनेत्री राधिका आपटे चित्रपटसृष्टीतील आपले अनुभव नेहमीच मोकळेपणाने सांगताना दिसते. नुकत्याच दिलेल्या एका मुलाखतीत तिने ॲक्शन चित्रपटाच्या शूटिंगदरम्यान आलेला एक विचित्र अनुभव सांगितला आणि त्यावरून आता चर्चा सुरू झाली आहे.

एका सीनसाठी ब्रा न घालता शर्टची बटणं उघडी ठेवावीत, अशी मागणी आपल्याकडे करण्यात आली होती, असा खुलासा राधिकाने केला. तिच्या म्हणण्यानुसार, तिला "ब्रा न घालता फक्त शर्ट घालून त्याची बटणं उघडी ठेवून ॲक्शन सीन करू शकतेस का?" असं विचारण्यात आलं होतं.

राधिकाने या मागणीला विरोध केला. तरीही अंतर्वस्त्रांमध्ये सीन करण्यासाठी तिच्यावर दबाव आणण्याचा प्रयत्न झाल्याचं तिने सांगितलं.

ॲक्शन सीनमध्ये अभिनेत्रीने प्रेक्षकांना आकर्षित करावं किंवा उत्तेजित करावं, अशी अपेक्षा ठेवली जाते. या मुद्द्यावरही राधिकाने आपलं मत मांडलं. तिच्या मते, एखादी भूमिका स्वीकारण्यापूर्वी ते पात्र आणि त्याचं चित्रण याबद्दल स्पष्ट माहिती मिळणं आवश्यक आहे.

एखाद्या पात्राला चित्रपटात विशिष्ट पद्धतीने दाखवायचं असेल, तर तो निर्णय सुरुवातीलाच सांगितला पाहिजे, असं राधिका म्हणाली. त्यानंतर ती भूमिका स्वीकारायची की नाही, हे ठरवण्याचा अधिकार अभिनेत्रीकडे असायला हवा, असंही तिचं म्हणणं आहे.

मात्र शूटिंगच्या अगदी दोन दिवस आधी वेगळ्याच प्रकारच्या दृश्याची मागणी केली जाते आणि त्यासाठी कपड्यांबाबत दबाव आणला जातो. अशा वेळी हा अनुभव त्रासदायक आणि मानसिकदृष्ट्या थकवणारा ठरतो, असं तिने स्पष्ट केलं. ऐनवेळी अशा मागण्या करण्यापेक्षा सुरुवातीलाच भूमिका आणि दृश्यांबद्दल स्पष्टता असावी, असं तिला वाटतं.

चित्रपटांच्या सेटवर इंटिमेट किंवा न्यूडिटी असलेल्या दृश्यांचं चित्रीकरण होतं, तेव्हा कलाकारांच्या मर्यादा आणि संमती यांचा आदर राखला जावा, यासाठी इंटीमसी कोऑर्डिनेटर्स काम करतात. मात्र ते असूनही कलाकारांवरचा दबाव पूर्णपणे संपलेला नाही, असं राधिकाने सांगितलं.

तिच्या म्हणण्यानुसार, इंटीमसी कोऑर्डिनेटर्सनी कलाकारांची बाजू घेतली किंवा निर्मात्यांच्या मागण्यांना विरोध केला, तर त्यांना कामावरून काढून टाकलं जाऊ शकतं. कलाकारांच्या हितासाठी काम करणाऱ्या कोऑर्डिनेटर्सनाही निर्मात्यांच्या दबावामुळे कामावरून काढण्यात आल्याचं तिने सांगितलं. काही वेळा त्यांनाही निर्मात्यांच्या सूचनांनुसार काम करावं लागतं. त्यामुळे या व्यवस्थेमुळे बदल झाला असला, तरी कलाकार पूर्णपणे सुरक्षित झाले आहेत, असं म्हणता येणार नाही, असं मत तिने व्यक्त केलं.

राधिका आपटेच्या या वक्तव्यामुळे चित्रपटसृष्टीतील कलाकारांची संमती, चित्रीकरणापूर्वी दृश्यांबाबत स्पष्टता आणि सेटवरचं सुरक्षित वातावरण या मुद्द्यांवर पुन्हा चर्चा सुरू झाली आहे.