पोप लिओ यांच्या उजव्या फुफ्फुसावर शस्त्रक्रिया, ॲडेनोकार्सिनोमाचे निदान; २० ऑक्टोबरपर्यंत कार्यक्रम रद्द

जगातील सुमारे १४० कोटी (१.४ अब्ज) कॅथोलिक ख्रिश्चनांचे सर्वोच्च धर्मगुरू पोप लिओ यांना फुफ्फुसाचा कर्करोग झाल्याची बातमी समोर आली आहे. त्यामुळे जगभरात चिंतेचे वातावरण आहे. ७१ वर्षीय पोप लिओ यांच्या उजव्या फुफ्फुसात गाठ आढळली. अलीकडेच झालेल्या शस्त्रक्रियेदरम्यान डॉक्टरांना या ट्यूमरची माहिती मिळाली. व्हॅटिकनने जारी केलेल्या अधिकृत वैद्यकीय बुलेटिननुसार, त्यांच्या उजव्या फुफ्फुसाचा बाधित भाग शस्त्रक्रियेद्वारे यशस्वीपणे काढून टाकण्यात आला आहे.

पोप लिओ अवघ्या १७ महिन्यांपूर्वी, मे २०२५ मध्ये पोप फ्रान्सिस यांच्या निधनानंतर या सर्वोच्च पदावर विराजमान झाले होते.

होली सी प्रेस ऑफिसने प्रसिद्ध केलेल्या निवेदनानुसार, डॉ. लुइजी कार्बोन आणि प्रोफेसर स्टेफानो मार्गारिटोरा यांनी सांगितले की, पोप लिओ यांच्यावर मंगळवारी दुपारी जेमेली रुग्णालयात नियोजनानुसार छातीची शस्त्रक्रिया झाली. शल्यचिकित्सकांनी पोप यांच्या उजव्या फुफ्फुसाचा खालचा भाग काढला. शस्त्रक्रियेदरम्यान तपासलेल्या ऊतींनी, आधी केलेल्या चाचण्यांमध्ये संशय व्यक्त केल्यानुसार, "फुफ्फुसाचा ॲडेनोकार्सिनोमा" या निदानाला दुजोरा दिला. पोप सुमारे तीन तास ऑपरेशन थिएटरमध्ये होते, तर प्रत्यक्ष शस्त्रक्रिया सुमारे ९० मिनिटे चालली. डॉक्टरांच्या म्हणण्यानुसार शस्त्रक्रिया यशस्वी झाली आणि कोणतीही गुंतागुंत झाली नाही.

निवेदनानुसार, पोप लिओ शस्त्रक्रियेनंतर सामान्यपणे शुद्धीवर आले आणि थोड्या वेळ निरीक्षणात ठेवल्यानंतर रुग्णालयाच्या १०व्या मजल्यावरील आपल्या खोलीत परतले. त्यांची प्रकृती सध्या धोक्याबाहेर असून ते उपचारांना सकारात्मक प्रतिसाद देत आहेत.

वॉशिंग्टन येथील जॉर्जटाउन युनिव्हर्सिटी हॉस्पिटलच्या हिमेटोलॉजी-ऑन्कोलॉजी विभागाचे प्रमुख डॉ. स्टीफन लिऊ यांनी सांगितले की, फुफ्फुसाचा कर्करोग प्राथमिक टप्प्यात असेल आणि तो लिम्फ नोड्समध्ये किंवा शरीराच्या इतर भागांत पसरलेला नसेल, तर केवळ शस्त्रक्रिया करून बाधित भाग काढणे हा अत्यंत प्रभावी उपचार ठरू शकतो. मात्र अंतिम लॅब रिपोर्टमध्ये कर्करोग इतर अवयवांत पसरल्याचे दिसले, तर प्रकृती अधिक गंभीर होऊ शकते, असेही त्यांनी सांगितले. व्हॅटिकनच्या प्रेस ऑफिसने जारी केलेल्या सुरुवातीच्या अहवालात कर्करोगाचा टप्पा किंवा त्याचा प्रसार याबद्दल सविस्तर तांत्रिक माहिती दिलेली नाही. तरीही डॉक्टरांच्या पथकाने पोप यांच्या सध्याच्या प्रकृतीबाबत समाधान व्यक्त केले आहे.

शस्त्रक्रियेनंतर पोप लिओ यांना पूर्ण विश्रांतीची आणि वैद्यकीय निरीक्षणाची गरज आहे. त्यामुळे व्हॅटिकन प्रशासनाने त्यांचे सर्व नियोजित दौरे, विशेष धार्मिक सभा, राजनैतिक भेटी आणि सार्वजनिक दर्शन कार्यक्रम तात्काळ प्रभावाने रद्द केले आहेत. पोप लिओ २० ऑक्टोबरपर्यंत रुग्णालयातच राहून उपचार घेणार आहेत. व्हॅटिकनने जगभरातील भाविकांना त्यांच्या लवकर बरे होण्यासाठी प्रार्थना करण्याचे आवाहन केले असून, प्रकृतीतील सुधारणेबाबत वेळोवेळी वैद्यकीय बुलेटिन जारी करण्याचे आश्वासन दिले आहे.

पोप आजारी असताना कारभार कोण पाहणार, असा प्रश्न निर्माण झाला आहे. व्हॅटिकनच्या शतकानुशतके जुन्या नियमांनुसार आणि कॅनन लॉच्या चौकटीत, पोप हयात आणि पदावर असताना त्यांच्या जागी कोणताही अंतरिम उत्तराधिकारी किंवा कार्यवाहक पोप नेमण्याची तरतूद नाही. ज्या निर्णयांसाठी किंवा धोरणात्मक करारांसाठी पोप यांची थेट स्वाक्षरी किंवा मान्यता लागते, ते पोप पूर्ण बरे होईपर्यंत पुढे ढकलले जातील. मात्र व्हॅटिकनचे रोजचे काम थांबणार नाही. प्रशासकीय विभागांचे (क्युरिया) दैनंदिन कामकाज, आर्थिक बाबी आणि नियमित व्यवस्थापन नेहमीप्रमाणे सुरू राहील.

पोप लिओ यांनी आपल्या १७ महिन्यांच्या कार्यकाळात जागतिक शांतता, मानवी हक्क आणि ख्रिश्चन समुदायातील एकतेचा संदेश दिला आहे. त्यांच्या आजारपणाची बातमी समजताच कॅथोलिकच नव्हे, तर विविध धर्मांच्या नेत्यांनी आणि जागतिक राष्ट्रप्रमुखांनी लवकर बरे होण्यासाठी सदिच्छा संदेश पाठवले आहेत. व्हॅटिकन प्रशासनाने स्पष्ट केले आहे की वैद्यकीय सल्लागार मंडळाच्या हिरव्या कंदिलानंतरच पोप लिओ आपल्या सार्वजनिक कर्तव्यांवर पुन्हा रुजू होतील. सध्या सर्वांचे लक्ष २० ऑक्टोबरनंतर येणाऱ्या वैद्यकीय अहवालाकडे आणि रुग्णालयातून मिळणाऱ्या डिस्चार्जकडे लागले आहे.