एनटीएची नवी हेल्पलाईन सेवा सुरू, परीक्षार्थींसाठी दोन नंबर जारी

नीट यूजी, यूजीसी नेट, सीयूईटी आणि जेईई मेन यांसारख्या मोठ्या स्पर्धा परीक्षा एनटीएतर्फे घेतल्या जातात. या परीक्षांना बसणाऱ्या अनेक विद्यार्थ्यांसाठी एक दिलासा देणारी बातमी आहे. एनटीएने अधिकृत हेल्पलाईन सेवा सुरू केली आहे.

परीक्षेचा अर्ज भरताना होणाऱ्या चुका, पेमेंटच्या अडचणी, प्रवेश पत्र डाऊनलोड करताना येणारे अडथळे आणि परीक्षेच्या तारखांबाबत होणारा गोंधळ दूर करणे, हा या सेवेचा उद्देश आहे. सोशल मीडियावर पसरणाऱ्या खोट्या बातम्या आणि फसवणुकीपासून विद्यार्थ्यांना वाचवण्यासाठीही एजन्सीने दोन प्रमुख सपोर्ट नंबर जारी केले आहेत.

पहिला नंबर २४x७ टोल-फ्री हेल्पलाईनचा असून तो 1800-180-4747 हा आहे. हा क्रमांक २४ तास सुरू राहील आणि उमेदवार त्यावर परीक्षेशी संबंधित कोणताही प्रश्न विचारू शकतात. सध्या हा क्रमांक प्रायोगिक तत्वावर सुरू करण्यात आला आहे.

दुसरा नंबर डेली हेल्प डेस्कचा असून तो 011-69227700 हा आहे. हा नंबर दररोज सकाळी ८ वाजल्यापासून रात्री १० वाजेपर्यंत सुरू राहील.

कोणत्या अडचणींसाठी संपर्क साधता येईल, तेही सांगण्यात आले आहे. ऑनलाईन अर्ज करताना तांत्रिक अडचण आल्यास, फी भरल्यानंतरही स्टेटस अपडेट न झाल्यास किंवा पेमेंट फेल होत असल्यास उमेदवार या नंबरवर फोन करू शकतात. प्रवेश पत्र डाउनलोड होत नसेल किंवा दिलेल्या माहितीत चूक असेल, तरीही संपर्क साधता येईल. परीक्षा केंद्राचा पत्ता, परीक्षेची तारीख किंवा शिफ्टची वेळ याबाबत काही गोंधळ असल्यासही मदत घेता येईल.

दुसरीकडे, एनटीएने सायबर भामट्यांबाबत कडक शब्दांत इशारा दिला आहे. परीक्षेच्या दिवसांत गुण वाढवून देणे, पेपर लीक करणे किंवा ॲप्लिकेशन फॉर्म दुरुस्त करणे अशा नावाखाली उमेदवारांना फसवण्याचा प्रयत्न केला जातो. हे थांबवण्यासाठी हा इशारा जारी करण्यात आला आहे.

उमेदवारांनी त्यांचा पासवर्ड किंवा वन टाईम पासवर्ड (OTP) कोणत्याही अनोळखी व्यक्तीला सांगू नये, असे आवाहन एनटीएने केले आहे. एनटीएचा कोणताही अधिकारी किंवा प्रतिनिधी फोन कॉलवर पासवर्ड, बँक तपशील किंवा ओटीपी कधीही मागत नाही, असेही स्पष्ट करण्यात आले आहे.

कोणत्याही अपडेटसाठी फक्त एजन्सीच्या अधिकृत संकेतस्थळावर, म्हणजे nta.ac.in वर, किंवा संबंधित परीक्षेच्या विशेष पोर्टलवरच विश्वास ठेवावा, असेही एनटीएने सांगितले आहे. त्यामुळे विद्यार्थ्यांनी हे दोन्ही हेल्पलाईन नंबर आपल्या फोनमध्ये सेव्ह करून ठेवावेत.