पेसा आरक्षणाविरोधात पालघरमध्ये कंत्राटी शिक्षकांचे आमरण उपोषण, दोन आंदोलकांची प्रकृती खालावली

पालघर जिल्ह्यातील कंत्राटी शिक्षकांनी सोमवारपासून (दि. २६) बेमुदत आमरण उपोषण सुरू केले आहे. लोकप्रतिनिधी आणि शासन यांचे लक्ष वेधून घ्यावे, यासाठी हे आंदोलन सुरू करण्यात आले आहे. रात्री उपोषणकर्त्यांपैकी दोघांची प्रकृती खालावली, त्यामुळे त्यांना उपचारासाठी रुग्णालयात दाखल करावे लागले.

या आंदोलनात ९० कंत्राटी शिक्षक सहभागी झाले आहेत. त्यांपैकी सुवर्णा साळुंखे आणि मनस्वी पाटील यांची तब्येत बिघडल्याने त्यांना खासगी रुग्णालयात नेण्यात आले होते. मनस्वी पाटील यांच्यावर उपचार झाल्यानंतर त्या पुन्हा उपोषणस्थळी आल्या आहेत. सुवर्णा साळुंखे यांच्यावर मात्र गंधे रुग्णालयात उपचार सुरू आहेत.

हे सर्व शिक्षक पालघर जिल्ह्यात मानधन तत्त्वावर काम करणारे कंत्राटी शिक्षक आहेत. ओबीसी, एस्सी, एनटी, व्हीजेएनटी, एसबीसी आणि इतर सर्व बिगर आदिवासी प्रवर्गातील हे उमेदवार नोकरीसाठी पात्र आहेत. तरीही पेसा आरक्षणाचा फटका त्यांना बसला आहे. आपल्याला नोकरीत कायम करावे, अशी त्यांची मागणी आहे.

खासदार डॉ. हेमंत सवरा यांच्या निवासस्थानासमोर २१ ऑगस्टपासून हे आंदोलन सुरू आहे. तिथे धरणे धरून ६६ दिवस झाले, तरी न्याय मिळालेला नाही, असे आंदोलकांचे म्हणणे आहे. शासनाच्या पातळीवर फक्त चर्चा आणि आश्वासने दिली जातात, त्यापलीकडे कोणताही ठोस निर्णय होत नाही. म्हणूनच धरणे आंदोलनातून काही साध्य न झाल्याने या स्थानिक शिक्षकांनी सोमवारपासून बेमुदत उपोषणाचा मार्ग स्वीकारला आहे.

पेसा आरक्षणाचा प्रश्न सन २०१४ पासून तयार झालेला आहे. पालघरसह महाराष्ट्रातील पेसा जिल्ह्यांमध्ये ओबीसी, एस्सी, एनटी, व्हीजेएनटी, एसबीसी आणि इतर सर्व बिगर आदिवासी समाजांचे क व ड श्रेणीतील १७ संवर्गांतील नोकऱ्यांमधले संविधानिक आरक्षण शून्य झाले आहे. शिक्षक हा संवर्गही याच १७ संवर्गांपैकी एक असून तोदेखील बाधित झाला आहे.

या अन्यायाविरोधात आतापर्यंत पालघर जिल्ह्यात अनेक आंदोलने झाली आहेत आणि काही अजूनही सुरू आहेत. तरीही ओबीसी, एस्सी, एनटी, व्हीजेएनटी, एसबीसी आणि इतर बिगर आदिवासी समाजाला अजून न्याय मिळालेला नाही. महाराष्ट्रात सध्या शिक्षक भरती मोठ्या प्रमाणावर सुरू आहे. पालघर या पेसा जिल्ह्यातही ही भरती सुरू आहे. अशा वेळी नोकरीसाठी पात्र असूनही आपल्याला डावलले जात आहे, अशी या कंत्राटी शिक्षकांची भावना आहे.