एमबीबीएस प्रवेशामुळे अथर्वच्या आयुष्याला ज्ञानरूपी अर्थ
गोंडपिपरी येथील उद्योजक ओम बोनगीरवार यांचा मुलगा अथर्व ओम बोनगीरवार याने नीट परीक्षेत उल्लेखनीय कामगिरी केली आहे. त्याच्या जोरावर त्याला कानपूर येथील प्रतिष्ठित डॉ. बी. एस. कुशवाह मेडिकल कॉलेजमध्ये एमबीबीएस अभ्यासक्रमासाठी प्रवेश मिळाला आहे. या यशामुळे अथर्वच्या आयुष्याला खऱ्या अर्थाने ज्ञानरूपी अर्थ मिळाला असून, बोनगीरवार कुटुंबात तसेच संपूर्ण गोंडपिपरी तालुक्यात आनंदाचे वातावरण आहे.
अथर्वने पाचवीपासून दहावीपर्यंतचे शिक्षण घरापासून लांब राहून बुलढाणा येथील प्रतिष्ठित सहकार विद्या मंदिर येथे पूर्ण केले. त्यानंतर अकरावी आणि बारावीचे शिक्षण घेत असताना त्याने नांदेड येथील IIB इन्स्टिट्यूटमधून नीट परीक्षेची तयारी केली.
सातत्याने केलेला अभ्यास, मेहनत आणि योग्य नियोजन यांच्या जोरावर त्याने NEET परीक्षेत चांगले गुण मिळवले. याच उल्लेखनीय कामगिरीमुळे कानपूर येथील डॉ. बी. एस. कुशवाह मेडिकल कॉलेजमध्ये एमबीबीएससाठी प्रवेशाचा रस्ता मोकळा झाला.
वैद्यकीय क्षेत्रात करिअर करायचे हे स्वप्न अथर्वने उराशी बाळगले होते आणि त्यासाठी तो सतत मेहनत करत राहिला. शाळेच्या दिवसांपासूनच अभ्यासात सातत्य ठेवून त्याने नीट परीक्षेसाठी कठोर परिश्रम घेतले. शेवटी त्या मेहनतीला यश आले असून, आता 'डॉक्टर' होण्याच्या दिशेने त्याची वाटचाल सुरू झाली आहे.
या यशाचे खास महत्त्व म्हणजे बोनगीरवार कुटुंबातील पहिला डॉक्टर होण्याचा मान अथर्वला मिळणार आहे. त्यामुळे घरच्यांसाठी हा क्षण खूप अभिमानाचा आणि आनंदाचा ठरला आहे.
अथर्वचे वडील ओम बोनगीरवार, आई दीपाली बोनगीरवार, आजोबा अरुण श्रीहरी बोनगीरवार आणि आजी स्वर्गीय करुणा बोनगीरवार यांच्या संस्कारांचा आणि प्रोत्साहनाचा अथर्वच्या यशात मोठा वाटा आहे. त्याच्या यशाबद्दल नातेवाईक, मित्रपरिवार, शिक्षक आणि गोंडपिपरी तालुक्यातील अनेक मान्यवरांनी त्याचे अभिनंदन केले असून, पुढच्या शिक्षणाच्या वाटचालीसाठी त्याला शुभेच्छा दिल्या आहेत.
अथर्वच्या यशामुळे बोनगीरवार कुटुंबात आनंदाचे वातावरण आहे. त्याने वैद्यकीय क्षेत्रात उत्तुंग भरारी घ्यावी आणि पुढे चांगला डॉक्टर म्हणून समाजाची सेवा करावी, अशा शुभेच्छांचा वर्षाव त्याच्यावर होत आहे.
