Devendra Fadnavis on Rahul Gandhi : 'राहुल गांधींनी पक्ष सोडून स्टँडअप कॉमेडियन व्हावं'; मोदींच्या मिमिक्रीवर

काँग्रेस नेते राहुल गांधी यांच्या मध्य प्रदेशातील 'छात्रो की गूंज' या कार्यक्रमात एका तरुणाने पंतप्रधान नरेंद्र मोदी यांची मिमिक्री केली आणि त्यावरून राजकीय वातावरण चांगलंच तापलं. या घटनेनंतर भाजप नेत्यांनी राहुल गांधींवर जोरदार टीका सुरू केली. आता मुख्यमंत्री देवेंद्र फडणवीस यांनीही याच मुद्द्यावरून राहुल गांधींना लक्ष्य केलं आहे.

नागपुरातील एका कार्यक्रमानंतर पत्रकारांशी बोलताना फडणवीस यांनी राहुल गांधींवर खोचकपणे टीका केली. ते म्हणाले, "मला असं वाटत आहे की, त्यांना आता हेच काम उरलं आहे. त्यांनी आता पक्ष सोडून स्टँडअप कॉमेडियनचं काम करावं. त्यांनी ते केल्यास त्यांना चांगला रोजगार मिळेल." यासोबतच फडणवीस यांनी काँग्रेस पक्षावरही निशाणा साधला. "इथे तर त्यांच्या पक्षाला बेरोजगार करून ठेवलं आहे," असा टोला त्यांनी लगावला.

याच कार्यक्रमात फडणवीस यांनी नागपुरातील एका सोलर मॉड्युल निर्मिती कारखान्याबद्दलही सविस्तर माहिती दिली. या कारखान्यात अत्याधुनिक पद्धतीने सोलर मॉड्युल तयार केले जात असून, या माध्यमातून सोलर क्षेत्रात चीनसोबत स्पर्धा करण्याच्या दिशेने काम सुरू असल्याचं त्यांनी सांगितलं. 2024 मध्ये या प्रकल्पाचं भूमिपूजन झालं होतं आणि तेव्हापासून आतापर्यंत या कारखान्यात सुमारे 5 हजार कामगार काम करत आहेत, असं फडणवीस यांनी नमूद केलं. बदलत्या महाराष्ट्रासह विदर्भ आणि नागपूरच्या औद्योगिक इकोसिस्टमचं हे एक उदाहरण असल्याचंही त्यांनी यावेळी सांगितलं.

बुटीबोरीमध्ये सध्या अतिरिक्त जागेची मागणी मोठ्या प्रमाणात वाढली असल्याचं सांगत फडणवीस यांनी तिथे नवीन औद्योगिक क्षेत्र विकसित करण्याच्या दृष्टीने सुरू असलेल्या हालचालींची माहिती दिली. महिंद्रा कंपनीला सुमारे एक हजार एकर जागा देण्यात आली असून, पुढील दोन ते तीन महिन्यांत तिथे प्रत्यक्ष काम सुरू करण्याचा मानस असल्याचं त्यांनी सांगितलं. यासोबतच सावनेरमध्ये सुमारे 5 हजार एकर जागा अधिग्रहित करण्याची प्रक्रिया सध्या सुरू असल्याचं त्यांनी स्पष्ट केलं. यातून राज्यात मोठ्या प्रमाणात गुंतवणूक येईल आणि स्थानिक लोकांना रोजगाराच्या संधीही निर्माण होतील, असा दावा फडणवीस यांनी यावेळी केला.

मात्र या सगळ्या औद्योगिक मुद्द्यांपेक्षा राहुल गांधींवरील फडणवीस यांची टीकाच सध्या जास्त चर्चेत आहे. मोदींच्या मिमिक्रीवरून सुरू झालेला हा वाद आता महाराष्ट्राच्या राजकारणातही पोहोचला आहे, आणि त्यावर भाजप नेत्यांकडून सातत्याने प्रतिक्रिया येत आहेत.