पासपोर्ट कार्यालयांच्या धर्तीवर राज्यातील ६० मुद्रांक कार्यालये आधुनिक होणार: बावनकुळे

राज्यातील मुद्रांक शुल्क विभागाची कार्यालये आता पासपोर्ट कार्यालयांच्या धर्तीवर आधुनिक करण्यात येणार आहेत. पहिल्या टप्प्यात राज्यभरातील ६० कार्यालये आधुनिक करण्याचा निर्णय घेण्यात आला असून, या कार्यालयांत शासकीय अधिकारी कार्यरत राहतील, तर पायाभूत सुविधा आणि मनुष्यबळाच्या व्यवस्थेसाठी खासगी क्षेत्राचा सहभाग घेतला जाणार आहे. यानंतरच्या टप्प्यात राज्यातील उर्वरित कार्यालयांचाही यात समावेश केला जाईल, अशी माहिती महसूलमंत्री चंद्रशेखर बावनकुळे यांनी दिली.

अमरावती आणि नागपूर जिल्ह्याचे पालकमंत्री असलेले बावनकुळे मंगळवारी नागपुरात प्रसार माध्यमांशी बोलत होते. नोंदणी विभाग अधिक आधुनिक आणि तंत्रज्ञानाधारित बनवण्यासाठी कृत्रिम बुद्धिमत्तेचा म्हणजेच एआयचा वापर सुरू करण्यात आला आहे. नोंदणी कार्यालयांत नागरिकांना भेडसावणाऱ्या अडचणी दूर करून अधिक चांगली, गतिमान आणि आधुनिक यंत्रणा उभी करण्याचा शासनाचा प्रयत्न असल्याचे त्यांनी सांगितले. नागरिकांना सेवा सुलभपणे मिळावी यासाठी नोंदणी विभागाच्या कामकाजात मोठ्या प्रमाणावर आधुनिक तंत्रज्ञान वापरले जाणार आहे.

राज्यातील दुष्काळसदृश परिस्थितीबाबत त्याच दिवशी होणाऱ्या मंत्रिमंडळ बैठकीत सविस्तर चर्चा होणार असल्याचेही बावनकुळे यांनी सांगितले. मदत व पुनर्वसन विभागाचे मंत्री किंवा सचिव राज्यातील परिस्थिती आणि आवश्यक उपाययोजनांची माहिती मंत्रिमंडळासमोर मांडतील. मुख्यमंत्री देवेंद्र फडणवीस स्वतः परिस्थितीवर लक्ष ठेवून असून, शेतकऱ्यांना मदत देण्याबाबत सरकारची भूमिका सकारात्मक आहे. यापूर्वी २०१७-१८ मध्ये अशाच दुष्काळी परिस्थितीत निर्णय घेण्यात आले होते, त्याच धर्तीवर आजच्या चर्चेनंतर परिस्थितीचा आढावा घेऊन योग्य तो निर्णय घेतला जाईल, असे बावनकुळे यांनी स्पष्ट केले.

SIR संदर्भात काँग्रेसने निवडणूक आयोगाची भेट घेतल्याच्या मुद्द्यावर बावनकुळे यांनी विरोधकांवर टीका केली. प्रत्येक बूथवर सर्व राजकीय पक्षांच्या प्रतिनिधींना काम करण्याची संधी असते. एखाद्या मतदाराचे नाव यादीत कमी-जास्त झाले असेल किंवा नोंदवायचे राहिले असेल, तर त्याची नोंद करून घेण्याची संधी ३० तारखेपर्यंत उपलब्ध आहे, असे ते म्हणाले. सर्व पक्षांच्या बूथस्तरीय पदाधिकाऱ्यांना ही प्रक्रिया राबवण्याची मुभा असूनही जाणीवपूर्वक गैरसमज पसरवून हा विषय बदनाम करण्याचा प्रयत्न होत आहे, असा आरोप त्यांनी केला. निवडणूक आयोगाची भेट हा निव्वळ राजकीय स्टंट असून प्रत्यक्षात नियमावलीनुसार आवश्यक ती दुरुस्ती करण्याची संधी उपलब्ध असल्याचेही त्यांनी नमूद केले.

दुष्काळाच्या मुद्द्यावरून विरोधकांकडून होणाऱ्या टीकेला उत्तर देताना बावनकुळे म्हणाले, की विरोधी पक्षाने आपली भूमिका ठरवावी, सत्ताधारी पक्ष म्हणून जनतेला न्याय देणे हे आमचे काम आहे. देवेंद्र फडणवीस यांच्या नेतृत्वाखालील राज्य सरकार शेतकऱ्यांच्या पाठीशी ठामपणे उभे असून, परिस्थितीचा सखोल आढावा घेऊन आवश्यक ती मदत देण्याचा सरकारचा प्रयत्न असल्याचे त्यांनी सांगितले. दुष्काळाची वस्तुस्थिती पंतप्रधान नरेंद्र मोदी यांच्यासमोर मांडण्यासाठी त्यांची भेट घ्यावी, केंद्र सरकारने यापूर्वीही अनेकदा दुष्काळी काळात राज्यांना मदत केली असल्याने अशा भेटीतून सकारात्मक प्रतिसाद मिळेल, असेही ते म्हणाले.

पंतप्रधान नरेंद्र मोदी यांच्यावरील टीकेबाबत प्रतिक्रिया देताना बावनकुळे यांनी सांगितले, की पंतप्रधानांची मिमिक्री करणे किंवा त्यांच्याबाबत अशा प्रकारे टीका-टिप्पणी करणे देशातील जनतेला मान्य होणार नाही. मोदी यांनी भारताची जागतिक पातळीवरील प्रतिमा उंचावली असून अनेक देशांनी त्यांना सर्वोच्च नागरी पुरस्कारांनी सन्मानित केले आहे, असे ते म्हणाले. राहुल गांधी यांनी पंतप्रधानांवर टीका करताना संयम बाळगण्याची गरज आहे, अशी टीका जनता स्वीकारणार नाही, असे बावनकुळे यांनी नमूद केले. राजस्थानमध्येही असेच वातावरण निर्माण करण्याचा प्रयत्न झाला होता, मात्र तेथे भाजपला जनतेने स्पष्ट जनादेश दिला होता, असा दावाही त्यांनी केला.