परभणीतील ५२ ऐतिहासिक वारसा स्थळांच्या प्रदर्शनाचे विभागीय आयुक्त जी. श्रीकांत यांच्या हस्ते उद्घाटन

परभणी, दि. १७ - छत्रपती संभाजीनगर विभागाचे विभागीय आयुक्त जी. श्रीकांत यांनी परभणीतील जिल्हाधिकारी कार्यालयात १५ व १६ ऑक्टोबर २०२६ या दोन दिवसांत आयोजित केलेल्या ऐतिहासिक वारसा कार्यशाळेला भेट दिली. कार्यशाळेत कोणते उपक्रम राबवले गेले, याची माहिती त्यांनी यावेळी घेतली.

जिल्हा प्रशासनाने परभणी जिल्ह्यातील एकूण ५२ ऐतिहासिक वारसा स्थळांची माहिती गोळा करून एक प्रदर्शन तयार केले आहे. या प्रदर्शनाचे उद्घाटन जी. श्रीकांत यांच्या हस्ते झाले. या प्रदर्शनाच्या माध्यमातून जिल्ह्यातील ५२ वारसा स्थळांची माहिती एकाच ठिकाणी उपलब्ध करून देण्यात आली आहे.

परभणी जिल्ह्याला समृद्ध ऐतिहासिक व सांस्कृतिक वारसा लाभला आहे. जिल्ह्यातील ऐतिहासिक वास्तू, पुरातत्त्वीय स्थळे आणि सांस्कृतिक वारशाचे महत्त्व सर्वसामान्य नागरिकांपर्यंत पोहोचवणे, या स्थळांचे जतन व संवर्धन करणे आणि पर्यटनाच्या माध्यमातून जिल्ह्याच्या विकासाला चालना देणे, या उद्देशाने कार्यशाळेचे आयोजन करण्यात आले होते.

या प्रदर्शनामुळे जिल्ह्याच्या ऐतिहासिक वैभवाची ओळख निर्माण होईलच, शिवाय या स्थळांच्या पर्यटनविषयक क्षमतेला चालना मिळण्यास मदत होणार आहे.

कार्यशाळेत सहभागी झालेल्या प्रशिक्षणार्थींना विभागीय आयुक्त श्री. श्रीकांत यांच्या हस्ते प्रातिनिधिक स्वरूपात प्रमाणपत्रांचे वाटप करण्यात आले. यावेळी त्यांनी सहभागी प्रशिक्षणार्थींचे कौतुक केले. ऐतिहासिक वारशाचा अभ्यास, त्याचे दस्तऐवजीकरण, जतन व संवर्धन यासाठी अशा उपक्रमांचे महत्त्व त्यांनी अधोरेखित केले.

या कार्यशाळेमुळे ऐतिहासिक वारसा स्थळांचा अभ्यास करणारे अभ्यासक, संशोधक, विद्यार्थी आणि पर्यटन क्षेत्रात काम करू इच्छिणाऱ्या व्यक्तींना प्रोत्साहन मिळणार आहे. जिल्ह्यातील ऐतिहासिक स्थळांना पर्यटनाच्या नकाशावर ठळक स्थान मिळवून देण्यासाठी हा उपक्रम महत्त्वाचा ठरणार आहे.

या कार्यक्रमाला जिल्हाधिकारी श्री. संजयसिंह चव्हाण, जिल्हा परिषदेच्या मुख्य कार्यकारी अधिकारी श्रीमती नतिषा माथुर, पोलीस अधीक्षक श्री. पंकज कुमावत, पुरातत्त्व विभाग, छत्रपती संभाजीनगरचे सहाय्यक संचालक श्री. अनिल गोटे, अपर जिल्हाधिकारी श्रीमती शोभा जाधव, निवासी उपजिल्हाधिकारी श्रीमती अनुराधा ढालकरी आणि जिल्हा आपत्ती व्यवस्थापन अधिकारी श्री. पवन खंडके उपस्थित होते. त्यांच्यासह संबंधित अधिकारी, अभ्यासक व प्रशिक्षणार्थीही हजर होते.

जिल्ह्यातील ऐतिहासिक वारशाचे जतन व संवर्धन करून पर्यटनाच्या माध्यमातून त्याला व्यापक ओळख मिळवून देण्याच्या दृष्टीने जिल्हा प्रशासनाचा हा उपक्रम महत्त्वाचे पाऊल ठरत आहे.