'दशमी'मधून लक्ष्मीपासून चंडिकेपर्यंतचा प्रवास: गौरी इंगवले यांनी मांडले मनोगत

'दशमी' हा चित्रपट लवकरच प्रदर्शित होत आहे. त्यात मुख्य भूमिकेत आहेत अभिनेत्री गौरी इंगवले. आतापर्यंत त्यांनी केलेल्या भूमिकांपेक्षा लक्ष्मीची ही भूमिका खूपच वेगळी आहे. सध्या नवरात्र सुरू आहे आणि ही भूमिका करताना महिलांच्या समस्या अधिक चांगल्या प्रकारे समजून घेता आल्या, असे त्या सांगतात. एका साध्या मुलीला चंडिका का व्हावे लागते, याची कहाणी म्हणजे 'दशमी'. याच निमित्ताने गौरी यांनी 'माझ्यातील दुर्गा'मध्ये मनापासून गप्पा मारल्या.

लक्ष्मीपासून चंडिकेपर्यंतचा हा प्रवास कलाकार म्हणून कसा होता, असे विचारल्यावर गौरी इंगवले म्हणाल्या, 'ही लक्ष्मीची भूमिका करणे हे खूप मोठे आव्हान होते. लक्ष्मी प्रत्येक घरात असते, पण ती चंडिकेचे रूपही घेऊ शकते. नवरात्रीत दुर्गादेवीची जशी ९ रूपे असतात, तशी ती प्रत्येक महिलेत पाहायला मिळतात. या भूमिकेत ती मला साकारता आली, म्हणून मी स्वतःला भाग्यवान समजते.'

समाजात सध्या ज्या गोष्टी घडत आहेत, त्या अत्यंत त्रासदायक आहेत, असे त्यांनी सांगितले. घरात मुलगी जन्माला आली की आपण लक्ष्मी आली असे म्हणतो, पण समाजात तिला दुर्गेचे रूप घ्यावे लागते, कारण तसे प्रसंग तिच्याबरोबर घडत असतात. दुर्दैवाने चंडिका व्हावेच लागते, असे सांगून त्या म्हणाल्या की, लक्ष्मीपासून चंडिकेपर्यंतचा प्रवास करताना खूप काही शिकायला मिळाले.

प्रेक्षकांकडून मिळालेली सर्वात छान दाद कोणती, असा प्रश्न आल्यावर गौरी मनापासून हसल्या. कामाचे कौतुक होत आहे, याचा आनंद आहे, असे त्या म्हणाल्या. आतापर्यंत खूपच सौम्य भूमिका केल्या होत्या आणि आता अगदी वेगळी भूमिका केल्यामुळे सगळ्या स्तरांतून प्रेम मिळत आहे. दोन-तीन वेळा कौतुक केल्यानंतर काही जण भेटले आणि माझे नाव गौरी असल्यामुळे आपल्या मुलीचे नावही गौरी ठेवावे असे म्हणाले. ती आपल्यासाठी सर्वात मोठी दाद आहे, असे त्या सांगतात.

आजकाल समाजात जे काही चालले आहे, त्यातून खूप राग आणि संताप येतो, असे गौरी यांनी सांगितले. हा चित्रपट पाहिल्यावर आपल्या कामातून एका जरी मुलीला प्रेरणा मिळाली, ती अधिक मजबूत झाली आणि समाजावर कामाचा प्रभाव पडला, तर आपल्याला अधिक चांगले वाटेल, असे त्यांनी म्हटले.

पडद्यावर हातात शस्त्र घेऊन किंवा अन्यायाविरुद्ध उभे राहताना वैयक्तिक पातळीवर काय बदल जाणवला, यावर त्या लगेच म्हणाल्या, 'हो, पडद्यावर मी हातात शस्त्र घेऊन उभी राहते. पण अभिनेत्री म्हणून मला खूप ऊर्जा मिळाली. अभिनय करताना स्वतःला समजून घ्यावे लागते आणि या चित्रपटातून मी ते समजून घेतले. लक्ष्मी जे काही सहन करते, ते तितक्याच उत्कटतेने येण्यासाठी मला ते जाणवून घेणे महत्त्वाचे होते. महिलांनी अन्यायाविरुद्ध आवाज उठवणे खूप गरजेचे आहे. हा चित्रपट पाहिल्यावर हातात शस्त्र नसले तरी ती ऊर्जा मुलींना मिळेल, असा मला विश्वास वाटतो.'

आजची दुर्गा कशी आहे, या प्रश्नावर त्यांनी पूर्वीची स्त्री आणि आजच्या महिला यांच्यात खूप चांगला फरक वाटतो, असे सांगितले. पूर्वी महिला एका चौकटीत राहायच्या. आता मुली अत्यंत मजबूत झाल्या आहेत. सगळ्याच महिला प्रत्येक कामात पुरुषाच्या खांद्याला खांदा लावून उभ्या राहतात आणि स्वतःचा स्वाभिमानही जपतात, हे अधिक अभिमानास्पद आहे, असे त्या म्हणाल्या.

खऱ्या आयुष्यातील पहिली दुर्गा कोण, असे विचारल्यावर गौरी म्हणाल्या, 'प्रत्येकाच्या आयुष्यात पहिली दुर्गा आणि पहिली देवी आपली आई असते. माझीही आई माझी दुर्गा आहे. पण प्रत्येक महिलेकडून मी संकटांशी लढायला आणि मजबूत राहायला शिकते आहे, असे मला वाटते.'

मुलींवरील अत्याचार पाहता प्रत्येक मुलीने मानसिक आणि शारीरिकदृष्ट्या सक्षम असणे किती गरजेचे आहे, यावर त्या स्पष्टपणे म्हणाल्या, 'सुरक्षितता खूपच महत्त्वाची आहे. रात्र झाल्यावर मनात एक भीती असतेच. कितीही नाही म्हटले तरी हे नाकारता येत नाही. सुरक्षेसाठी प्रत्येकीला कधी ना कधी दुर्गा व्हावेच लागते. वेळोवेळी योग्य निर्णय घेत पुढे जाणे आणि दुर्गावतार धारण करणे आजच्या जगात खूपच महत्त्वाचे वाटते.'

याचे उदाहरण म्हणून त्यांनी आपली बहीण शैला कुलकर्णी यांचे नाव घेतले. त्या पहिल्या महिला Action दिग्दर्शक आहेत आणि महाराष्ट्र पोलीस विभागासह महिला संरक्षणासाठी प्रशिक्षण देतात. त्यांच्याकडून आपण बरेच ऐकले आणि शिकले आहे, असे गौरी यांनी सांगितले. या चित्रपटाच्या निमित्ताने गौरी यांना दुर्गेचे रूप कायमचे कळले आहे, असे म्हणायला हरकत नाही.