नालासोपाऱ्यात तरुणीची तक्रार: धर्मांतरासाठी दबाव, मारहाण आणि अत्याचाराचा आरोप

नालासोपारा येथे एका तरुणीने गंभीर आरोप करत पोलीस ठाण्यात तक्रार दिली आहे. आधी मैत्रीतून ओळख वाढवली, मग प्रेमाच्या जाळ्यात ओढले, त्यानंतर धर्मांतरासाठी दबाव टाकला, मारहाण केली आणि लैंगिक अत्याचार केले, असे तिचे म्हणणे आहे. तिने १२ ऑक्टोबर रोजी नालासोपारा पोलीस ठाण्यात ही तक्रार नोंदवली.

या तक्रारीत मुख्य आरोपी म्हणून आरिफ शेख याचे नाव आहे. त्याची आई रुक्साना शेख आणि मावस भाऊ साहिल खान यांच्यावरही आरोप करण्यात आले आहेत. पोलिसांना दिलेल्या जबाबात तरुणीने सांगितले की, आरोपींकडून तिच्यावर धर्मांतरासाठी दबाव आणला गेला, तिला मारहाण झाली आणि तिच्यावर लैंगिक अत्याचारही करण्यात आले.

पीडितेच्या म्हणण्यानुसार, तिची आरिफ शेखशी ओळख एका मैत्रिणीमार्फत झाली. ओळख वाढल्यानंतर आरिफने तिला प्रेमाच्या जाळ्यात ओढले. त्याने आपली आई रुक्साना शेख ही अॅस्ट्रोलॉजर असल्याचे सांगून तिची रुक्सानाशी भेट घडवून आणली. रुक्सानाने तिची आई मरण पावली असून घरात भूत आहे, तसेच घरातलीच माणसे तिला मारून टाकतील, अशी भीती दाखवल्याचा आरोप आहे. त्यानंतर तिला आरोपीच्या घरी राहण्यास भाग पाडले, असे तिने तक्रारीत म्हटले आहे.

१ एप्रिल २०२५ रोजी ती आरोपीच्या घरी राहायला गेली. तिथे गेल्यानंतर लग्नाचे आमिष दाखवून आरिफने तिच्यावर वारंवार लैंगिक अत्याचार केल्याचा आरोप तिने केला आहे.

५ मे २०२५ रोजी आरिफ आणि पीडिता दुसऱ्या ठिकाणी भाड्याने राहू लागले. तिथे फक्त हिंदू नागरिकांनाच खोल्या दिल्या जात असल्याने आरिफने स्वतःला पीडितेचा भाऊ असल्याचे भासवले आणि तिच्यासोबत राहू लागला, असा दावा करण्यात आला आहे. तिने विरोध केला की आरिफ तिला मारहाण करायचा, असेही तिने सांगितले. जुलै २०२५ मध्ये आरिफचा मावस भाऊ साहिल खान यानेही तिच्यावर जबरदस्ती करण्याचा प्रयत्न केल्याचा आरोप आहे. तिने त्याला विरोध केल्यावर आरिफ आणि साहिल या दोघांनी मिळून तिला मारहाण केली, असे तक्रारीत नमूद आहे.

धर्मांतरासाठी दबाव टाकताना तिला गोमांस खाण्यास आणि हिजाब घालण्यास सांगितले जात होते, असा आरोप आहे. नकार दिला तर मारहाण होत असल्याचेही तिने पोलिसांना सांगितले. आरिफने अनेक हिंदू तरुणींना अशाच प्रकारे लक्ष्य केले, असा दावा तिने केला आहे. मुलींचे अश्लील फोटो काढून त्यांच्याकडून पैसे उकळणे आणि लैंगिक अत्याचार करणे असे प्रकार सुरू असल्याचेही तिचे म्हणणे आहे. आरिफने ७० ते ८० हिंदू मुलींना लक्ष्य केल्याचे आपल्यासमोर सांगितले, असा दावा पीडितेने केला आहे. नवरात्रोत्सव आणि गणेशोत्सवाच्या काळात हिंदू तरुणींना लक्ष्य केले जाते, असाही तिचा आरोप आहे.

आरिफ हा तरुणींना जाळ्यात ओढणाऱ्या मोठ्या टोळीशी संबंधित आहे, असे पीडितेने म्हटले आहे. पोलीस या आरोपांची चौकशी करत आहेत. आरोपींचे इतर कोणाशी संबंध आहेत का, अशी आणखी प्रकरणे आहेत का आणि पीडितेने केलेले आरोप कितपत खरे आहेत, याचा तपास पोलिसांकडून होणे अपेक्षित आहे. या प्रकरणात आणखी पीडित महिला किंवा तरुणी तक्रार देतात का, याकडेही लक्ष लागले आहे.