नागपुरातील वाठोड्यात भाड्याच्या फ्लॅटमध्ये 500 रुपयांच्या नोटांसारखी छपाई, पुष्पम बंडानेवर गुन्हा दाखल

नागपुरातील वाठोडा भागात एका भाड्याच्या घरात 500 रुपयांच्या नोटांसारखी छपाई केल्याचा कथित प्रकार समोर आला आहे. घरमालकाने तक्रार केल्यावर वाठोडा पोलिसांनी तिथे छापा टाकला आणि हे सगळं उघड झालं. या घटनेमुळे शहरात एकच खळबळ उडाली आहे.

वाठोडा येथील थ्री स्टार को-ऑपरेटिव्ह सोसायटीत पहिल्या मजल्यावर हा फ्लॅट आहे. पोलिसांनी दिलेल्या माहितीनुसार, रमेश गंगाधर हरडे यांनी हा फ्लॅट 26 सप्टेंबर 2025 पासून पुष्पम बंडाने याला भाड्याने दिला होता. हरडे हे या फ्लॅटचे मालक आहेत. गेले दोन महिने भाडं मिळालं नव्हतं, म्हणून ते बंडाने याच्याशी संपर्क करायचा प्रयत्न करत होते. पण तीन दिवसांपासून त्याच्याकडून काहीच उत्तर येत नव्हतं.

अखेर 24 ऑक्टोबरला सकाळी सुमारे 11.30 वाजता रमेश हरडे भाडं मागायला फ्लॅटवर गेले. दरवाजा ठोठावूनही आतून कोणी बोललं नाही. तेव्हा त्यांनी दुसऱ्या मास्टर चावीने दरवाजा उघडला. आत सोफ्यावर 500 रुपयांच्या नोटांसारखी छपाई असलेले कागद पसरलेले दिसले आणि त्यांना संशय आला. त्यांनी लगेच वाठोडा पोलिसांना कळवलं. त्यानंतर पोलिसांनी फ्लॅटवर छापा टाकला आणि हा सगळा प्रकार उघडकीस आला.

छाप्यात पोलिसांना नोटांसारखी छपाई असलेले कागद, लॅपटॉप, कलर प्रिंटर, पेपर कटर, शाईच्या बाटल्या आणि इतर साहित्य सापडलं. या सगळ्या साहित्याची एकूण किंमत 36 लाख 83 हजार 600 रुपये असल्याचं पोलिसांनी सांगितलं. या प्रकरणी 29 वर्षांच्या पुष्पम बंडाने याच्याविरुद्ध भारतीय न्याय संहितेच्या कलम 178, 180 आणि 181 अंतर्गत गुन्हा दाखल करण्यात आला आहे.

जप्त केलेले कागद खरंच बनावट चलनी नोटा आहेत की फक्त नोटांसारखी छपाई केलेले कागद आहेत, हे अजून स्पष्ट झालेलं नाही. वाठोडा पोलीस या कथित प्रकाराचा पुढचा तपास करत आहेत.

या कारवाईनंतर अनेक प्रश्न उभे राहिले आहेत. नोटांसारखी छपाई करण्यामागचा उद्देश काय होता? हा प्रकार नेमका कधीपासून सुरू होता? यात एखादं मोठं रॅकेट आहे का? संशयित आरोपीची पार्श्वभूमी काय आहे? असे अनेक प्रश्न आता निर्माण झाले आहेत. पोलिसांच्या तपासातून या प्रश्नांची उत्तरं मिळतील, अशी अपेक्षा आहे.