नागपूरच्या सदरमधील अचरज टॉवरमध्ये स्पाच्या नावाखाली देहव्यापार; तीन तरुणींची सुटका, संचालिका फरार

नागपूर शहरात पोलिसांनी स्पाच्या नावाखाली चालणाऱ्या देहव्यापाराचा पर्दाफाश केला आहे. नागपुरातील पॉश आणि अतिसंवेदनशील भाग म्हणून ओळखल्या जाणाऱ्या सदर परिसरात अचरज टॉवर आहे. या टॉवरमधील 'ग्रेप्स स्पा अँड सलून'मध्ये पोलिसांनी धाड टाकली. या बातमीमुळे शहरात मोठी खळबळ उडाली आहे.

ही कारवाई गुन्हे शाखेच्या सामाजिक सुरक्षा विभागाने (SSB) केली. गुप्त माहितीच्या आधारे हा छापा टाकण्यात आला. अचरज टॉवरमधील या स्पाच्या आड वेश्या व्यवसाय चालतो, अशी पक्की खबर पोलिसांना मिळाली होती, असे पोलिसांनी दिलेल्या माहितीत सांगितले आहे.

पोलिसांनी आधी डमी ग्राहक पाठवून ही माहिती खरी आहे का, हे तपासले. खात्री पटल्यानंतर अचानक छापा टाकण्यात आला. या कारवाईत देहव्यापारात जबरदस्तीने ढकलल्या गेलेल्या तीन तरुणींची पोलिसांनी सुटका केली. सुटका झालेल्या तरुणींपैकी एक तरुणी गोंदिया जिल्ह्यातील आहे. बाकीच्या दोघी नागपूर शहरातल्याच रहिवासी आहेत.

या अवैध धंद्यात सक्रिय सहभाग असलेला आणि स्पामध्ये कर्मचारी म्हणून काम करणारा आरोपी हार्दिक नितीन नागपुरे याला पोलिसांनी घटनास्थळावरून रंगेहाथ पकडले. त्याला अटक करण्यात आली आहे.

प्राथमिक तपासात असे समोर आले आहे की, आरोपी गरजू आणि हवालदिल महिलांना कमी वेळात जास्त पैसे मिळवून देण्याचे मोठे आमिष दाखवायचे. त्याच पैशांच्या लालसेने या महिलांना या दलदलीत ढकलण्यात आले होते.

पोलीस छापा टाकणार याची कुणकुण लागताच स्पाची मुख्य संचालिका गुंजन आसरे आणि व्यवस्थापक अन्नू जहीर हे दोघे घटनास्थळावरून पसार झाले. पोलीस सध्या या दोघांचा कसून शोध घेत आहेत.

गुन्हे शाखेच्या या कारवाईनंतर सदर पोलीस स्टेशनमध्ये सर्व आरोपींविरुद्ध अनैतिक मानवी व्यापार प्रतिबंधक कायद्यानुसार (PITA) विविध कलमांखाली गुन्हे नोंदवण्यात आले आहेत. या रॅकेटचे जाळे आणखी कुठे पसरले आहे का, याचा पुढील तपास सदर पोलीस करत आहेत.