मूलमध्ये नवरात्रीचा गरबा रंगला; प्रार्थना बेहेरे आणि सुधीर मुनगंटीवार उपस्थित

मूल येथे स्व. चांगुणाबाई सच्चिदानंद मुनगंटीवार सेवा समितीतर्फे 'भाऊंचा गरबा' हा दांडिया उत्सव आयोजित करण्यात आला होता. नवरात्रोत्सवानिमित्त झालेल्या या कार्यक्रमात मूलवासीयांनी गरब्याचा आनंद घेतला. नवरात्रीचा उत्साह, गरब्याच्या तालावर थिरकणारी पावले आणि संस्कृतीच्या रंगांनी सजलेला परिसर, अशा वातावरणात हा सोहळा रंगला.

कार्यक्रमाला आमदार सुधीर मुनगंटीवार उपस्थित होते. अभिनेत्री प्रार्थना बेहेरे यांचे मूलवासीयांतर्फे स्वागत करण्यात आले. वाघांच्या भूमीत त्यांचे आगमन झाले, असे सांगत मुनगंटीवार यांनी त्यांचे स्वागत केले. मूलवासीयांना नवरात्रोत्सवाच्या शुभेच्छा देतानाच त्यांनी या सोहळ्याचे उत्कृष्ट आयोजन करणाऱ्या आयोजकांचे अभिनंदन केले.

मूलवासीयांच्या चेहऱ्यावरील हास्य आणि मनातील समाधान पाहून आनंद वाटतो, अशी भावना मुनगंटीवार यांनी व्यक्त केली. नवरात्रोत्सवाच्या माध्यमातून नारीशक्तीचा सन्मान करण्याचा आणि प्रत्येक मुलीला सुरक्षित वातावरण देण्याचा संकल्प करावा, असे आवाहन त्यांनी केले.

मुनगंटीवार म्हणाले, मूल ही थोर माजी मुख्यमंत्री मा.सा. कन्नमवार यांची भूमी आहे. या भूमीला ऐतिहासिक आणि सांस्कृतिक वारसा लाभला आहे. भारत-चीन युद्धाच्या काळात देशासाठी सुवर्णदान करणाऱ्या जिल्ह्यांमध्ये चंद्रपूर जिल्ह्याचे योगदान अभिमानास्पद आहे. देशाप्रती समर्पणाची भावना, सामाजिक बांधिलकी आणि सांस्कृतिक परंपरांचा सन्मान ही आपल्या भूमीची ओळख आहे.

नवरात्रोत्सव हा केवळ धार्मिक उत्सव नसून, शक्तीची उपासना करण्यासोबतच नारीशक्तीचा सन्मान करण्याची प्रेरणा देणारा पवित्र पर्व आहे, असे ते म्हणाले. स्त्रीच्या सन्मानातूनच कुटुंब, समाज आणि राष्ट्राची प्रगती साध्य होते, म्हणून प्रत्येकाने या नवरात्रोत्सवात नारी सन्मानाचा संकल्प करावा, असे त्यांनी सांगितले. नारीशक्ती ही समाजाच्या प्रगतीचा भक्कम आधार असून महिलांना सन्मान आणि समान संधी उपलब्ध करून देणे ही काळाची गरज आहे. स्त्रीचा सन्मान केवळ शब्दांपुरता न राहता तो कृतीतूनही व्यक्त झाला पाहिजे, असेही मुनगंटीवार यांनी सांगितले.

'भाऊंचा गरबा' या उत्सवामुळे मूलच्या सांस्कृतिक परंपरेला नवी झळाळी मिळाली. गरब्याचा उत्साह, नवरात्रोत्सवाचा आनंद आणि नारीशक्तीच्या सन्मानाचा संदेश यांचा सुंदर संगम या सोहळ्यात अनुभवायला मिळाला.

प्रार्थना बेहेरे यांनी सुधीरभाऊंचे आभार मानले. मूल येथे येण्याची आणि सर्वांना भेटण्याची संधी दिल्याबद्दल त्या आभारी आहेत, असे त्यांनी सांगितले. मूल येथे येण्याची त्यांची ही पहिलीच वेळ आहे. भाऊंच्या घरी गेल्यानंतर त्यांनी अतिशय प्रेमाने आणि आपुलकीने स्वागत केले, असे बेहेरे म्हणाल्या. त्यांना विविध विषयांचे सखोल ज्ञान असून त्यांच्याकडून खूप काही शिकण्यासारखे आहे, असेही त्यांनी सांगितले.

आजच्या काळात मुलींनी निर्भयपणे घराबाहेर पडून आत्मविश्वासाने आपल्या स्वप्नांच्या दिशेने वाटचाल केली पाहिजे, असे मत प्रार्थना बेहेरे यांनी व्यक्त केले. मुलींची सुरक्षितता सुनिश्चित करणे ही केवळ एका व्यक्तीची नव्हे, तर संपूर्ण समाजाची सामूहिक जबाबदारी आहे. मुलींना सुरक्षित वातावरण उपलब्ध करून देणे आणि त्यांच्या मनात आत्मविश्वास निर्माण करणे, हे समाजातील प्रत्येकाचे कर्तव्य आहे, असेही त्या म्हणाल्या.