स्टोरी टीव्हीवर 'स्कॅम २०२४'; विद्या मालवडे पहिल्यांदाच मायक्रोड्रामात

मुंबई, १९ ऑक्टोबर २०२६: मोबाईलवरून होणाऱ्या फसवणुकीच्या घटना सध्या वाढत आहेत. सरकारी अधिकारी असल्याचं सांगून लोकांना घाबरवायचं आणि त्यांच्याकडून पैसे उकळायचे, अशा प्रकारांना अनेक जण बळी पडत आहेत. याच विषयावर आधारित 'स्कॅम २०२४ - द डिजिटल अरेस्ट स्टोरी' ही 'स्टोरी टीव्ही'ची नवी मायक्रोड्रामा मालिका प्रेक्षकांसमोर आली आहे.

या मालिकेत 'चक दे! इंडिया' फेम विद्या मालवडे, प्रतीक सहजपाल आणि विनीत रैना प्रमुख भूमिकांत आहेत. स्मॉल टाउन बॉईज यांनी मालिकेची निर्मिती केली असून, अलोक शर्मा यांनी दिग्दर्शन केलं आहे. ही मालिका फक्त स्टोरी टीव्ही ॲपवर पाहता येईल.

विद्या मालवडे या मालिकेत प्रिया शर्मा ही भूमिका करत आहे. मायक्रोड्रामा या माध्यमात ती पहिल्यांदाच काम करत आहे. प्रिया ही नोकरी करणारी एक सामान्य महिला आहे. डिजिटल अरेस्टच्या नावाखाली तिची फसवणूक होते आणि तिचं आयुष्य पूर्णपणे बदलून जातं. त्यानंतर अशा प्रकारे अनेकांना फसवणाऱ्या एका मोठ्या टोळीबद्दल तिला समजतं. खोटी ओळख सांगून, भीती दाखवून आणि धमक्या देऊन लोकांकडून पैसे कसे उकळले जातात, हे कथेतून दाखवलं आहे. या फसवणुकीविरुद्ध प्रिया कशी लढते, हे मालिकेत पाहायला मिळेल.

आपल्या भूमिकेबद्दल विद्या म्हणाली, "मी याआधी मैदानावर लढणाऱ्या आणि शेवटपर्यंत हार न मानणाऱ्या महिलांच्या भूमिका केल्या आहेत. पण प्रियाची भूमिका करताना मला जाणवलं की, तिच्या जागी आपल्यापैकी कोणीही असू शकतं. आपले आई-वडील, शेजारी किंवा ओळखीची व्यक्तीही अशा फसवणुकीला बळी पडू शकते. प्रिया शिकलेली आहे, सावध आहे आणि प्रत्येक गोष्टीची काळजी घेते. तरीही काही तासांत तिचं सर्व काही हिरावून घेतलं जातं. मग ज्यांना डिजिटल जगाची फारशी माहिती नाही, त्यांचं काय? म्हणूनच ही गोष्ट लोकांपर्यंत पोहोचणं गरजेचं आहे. हा शो पाहून एखाद्या कुटुंबाने तरी असा संशयास्पद फोन आल्यावर सावध राहण्याचा निर्णय घेतला, तर मला वाटेल की या कथेचा उपयोग झाला."

मायक्रोड्रामाबद्दल विद्या पुढे म्हणाली, "मी आतापर्यंत मायक्रोड्रामापासून दूर राहिले होते. पण या कथेने माझं लक्ष वेधून घेतलं. या माध्यमातून थेट लोकांपर्यंत पोहोचता येतं, ही गोष्टही मला आवडली. ही मालिका लोक मोबाईलवर पाहणार आहेत आणि अशा फसवणुकीचे फोनही मोबाईलवरच येतात. त्यामुळे या कथेचा विषय आणि ती दाखवण्याचं माध्यम यांचा चांगला मेळ आहे."

'बिग बॉस १५'चा उपविजेता प्रतीक सहजपाल या मालिकेत विकी मंडलची भूमिका करत आहे. फसवणूक करणाऱ्या टोळीचा तो मुख्य माणूस आहे. प्रतीक म्हणाला, "या गुन्ह्यांमागे असलेल्या व्यक्तीची भूमिका करताना अशा प्रकारची फसवणूक किती विचारपूर्वक केली जाते, हे समजलं. हे केवळ एक-दोन लोक नसतात, तर लोकांना काही क्षणांत फसवण्यासाठी काम करणारी मोठी टोळी असते. विकी या पात्राचा प्रेक्षकांना राग यावा, असं मला वाटतं. कारण अशा व्यक्तींबद्दल राग निर्माण झाला, तर लोक आपल्या आजूबाजूला असलेल्या फसवणूक करणाऱ्यांना ओळखण्याचा प्रयत्न करतील. माझ्या मते, मायक्रोड्रामा हे मनोरंजनाच्या क्षेत्रातील पुढचं मोठं पाऊल आहे."

विनीत रैना राज ठाकूर या निलंबित अधिकाऱ्याची भूमिका करत आहे. तो या फसवणूक करणाऱ्या टोळीविरुद्ध लढतो. विनीत म्हणाला, "राजने आपलं काम प्रामाणिकपणे केलं, तरी त्याला त्याची शिक्षा मिळाली. आजही असे अनेक अधिकारी या गुन्ह्यांविरुद्ध शांतपणे लढत आहेत. त्यांच्याबद्दल मला आदर आहे." लोकांना गुंतवून ठेवणारी आणि त्यांना सावध करणारी गोष्ट साकारण्याची संधी मिळाली, म्हणून ही भूमिका स्वीकारल्याचंही त्याने सांगितलं.

या मालिकेत संदीप अरोरा आनंदच्या भूमिकेत दिसेल. प्रियांशी त्रिपाठी, पूजा झा, आयुषी त्यागी, शीतल तेजवानी, अशोक के. झा आणि योगेश पवार यांच्याही महत्त्वाच्या भूमिका आहेत.

२०२५ मध्ये भारतात सायबर फसवणुकीमुळे २२,४९५ कोटी रुपयांचं नुकसान झालं आणि सायबर गुन्ह्यांसंबंधी २८.१५ लाख तक्रारी नोंदवण्यात आल्या. सरकारने आयोजित केलेल्या सायबर सुरक्षेसंबंधी कार्यशाळेत मांडलेल्या आकडेवारीनुसार, मागील वर्षाच्या तुलनेत तक्रारींमध्ये सुमारे २४ टक्क्यांनी वाढ झाली होती.

सरकारी अधिकारी असल्याचं खोटं सांगणं, बनावट कागदपत्रं दाखवणं आणि धमक्या देऊन पैसे मागणं, अशा फसवणुकीच्या पद्धती मालिकेत दाखवल्या आहेत. अशा फोनपासून सावध राहण्याचा आणि फसवणूक ओळखण्याचा संदेश या कथेतून दिला आहे. मालिका आता फक्त स्टोरी टीव्ही ॲपवर पाहता येईल.