कोंढाळी-काटोल मार्गावर क्रुझरची दुचाकीला धडक, तीन तरुणांचा जागीच मृत्यू; चालकाला अटक

कोंढाळी-काटोल मार्गावरील कलकुही शिवारात क्रुझर आणि दुचाकी यांच्यात झालेल्या भीषण धडकेत तीन तरुणांचा जागीच मृत्यू झाला. शनिवारी, १७ तारखेला मध्यरात्रीच्या सुमारास हा अपघात झाला. मृतांमध्ये तीन महिन्यांपूर्वीच लग्न झालेल्या लोकेश जगदीश बारंगे याचाही समावेश आहे. देवीदर्शन करून परतत असतानाच या तिघांवर काळाने घाला घातला आणि त्यांच्या कुटुंबांवर दुःखाचा डोंगर कोसळला आहे.

दीपांशु दामोदर चाफले (२५), रोशन मारोती चाफले (२५) आणि लोकेश जगदीश बारंगे (२५) हे तिघे एकाच दुचाकीवरून काटोल येथे देवीदर्शनासाठी गेले होते. दर्शन झाल्यानंतर ते कोंढाळीकडे परत येत होते. त्या वेळी कलकुही शिवारात क्रुझरने त्यांच्या दुचाकीला जोरदार धडक दिली. मिळालेल्या माहितीनुसार, ही क्रुझर कोंढाळीहून मोहगाव येथील भाविकांना घेऊन काटोल-पारहसिंगा परिसरात देवीदर्शनासाठी निघाली होती. धडकेनंतर दुचाकीवरील तिघेही रस्त्यावर कोसळले आणि धडक इतकी जोरदार होती की त्यांचा घटनास्थळीच मृत्यू झाला.

लोकेश बारंगे यांचे लग्न अवघ्या तीन महिन्यांपूर्वी झाले होते. नव्या संसाराची स्वप्ने पाहत असतानाच त्यांचा मृत्यू झाल्याने पत्नीवर दुःखाचा डोंगर कोसळला आहे. मित्रांसोबत देवीदर्शनासाठी घराबाहेर पडलेला लोकेश परत आलाच नाही. त्याचे पार्थिव घरी पोहोचल्यावर कुटुंबात शोककळा पसरली. रोशन चाफले विवाहित होते आणि त्यांना एक मुलगा व एक मुलगी आहे. दीपांशु चाफले अविवाहित होते.

हे तिघेही मूळचे वर्धा जिल्ह्यातील कारंजा घाडगे येथील रहिवासी होते. ते कोंढाळीतील विकासनगर परिसरात भाड्याने राहत होते आणि एका खासगी कंपनीत कामगार म्हणून काम करत होते.

माहितीनुसार, अपघातानंतर क्रुझरचालकाने जखमींना मदत केली नाही आणि वाहनासह काटोलच्या दिशेने निघून गेला. त्याच वेळी कामावरून दुचाकीने कोंढाळीकडे येणारे जुबेर शेख आणि सागर भारसाकळे यांनी अपघात पाहिला आणि मदतीसाठी धाव घेतली. त्यांनी सामाजिक कार्यकर्ते संजय गायकवाड आणि कोंढाळी पोलिसांना घटनेची माहिती दिली. कळताच कोंढाळीचे ठाणेदार सुमित परतेकी आणि संजय गायकवाड रुग्णवाहिकेसह घटनास्थळी पोहोचले. पण तोपर्यंत तिन्ही तरुणांचा मृत्यू झाला होता. मृतदेह शवविच्छेदनासाठी काटोल ग्रामीण रुग्णालयात पाठवण्यात आले.

या प्रकरणी कोंढाळी पोलिसांनी अपघाताचा गुन्हा दाखल केला असून क्रुझरचालक हेमराज गणपत उईके याला अटक केली आहे. ठाणेदार सुमित परतेकी पुढील तपास करत आहेत.

क्रुझरने दुचाकीला धडक नेमकी कशामुळे दिली, याचे कारण अजून स्पष्ट झालेले नाही. चालकाला डुलकी लागली होती का, की अपघातामागे दुसरे काही कारण होते, याचा तपास पोलीस करत आहेत. तपासातूनच अपघाताचे नेमके कारण समोर येणार आहे.