सिडनीत 37 अंश तापमानाचा अंदाज, जंगलातील वणव्याच्या भीतीने प्रशासन सतर्क

ऑस्ट्रेलियात गेल्या काही दशकांत विशेषतः ऑक्टोबरच्या उष्णतेच्या काळात जंगलात वणवा पेटण्याच्या अनेक घटना घडल्या आहेत. त्यातल्या काही घटना इतक्या भीषण होत्या की त्यांची झळ आसपासच्या शहरांनाही बसली होती. याच पार्श्वभूमीवर तिथल्या प्रशासनाने राजधानी सिडनी आणि तिच्या जवळपासच्या परिसरात वाढत्या तापमानाबद्दल हाय अलर्ट जारी केला आहे.

हवामान खात्याने सोमवारी सिडनीच्या पश्चिम भागात तापमान 37 डिग्री सेल्सियसपर्यंत जाण्याचा अंदाज वर्तवला होता. उकाडा आणि दमट हवामान यामुळे जंगलात वणवा पेटण्याचा धोका आणखी वाढला आहे.

न्यू साउथ वेल्स राज्यातील ग्रामीण अग्निशमन विभागाने ग्रेटर सिडनी आणि ग्रेटर हंटर भागात आग प्रतिबंधक उपाय पूर्णपणे लागू केले आहेत. त्यानुसार मोकळ्या जागेत आग लावण्यावर बंदी आहे. काही विशिष्ट इंधनावर चालणारे बारबेक्यू वापरणे, तसेच ग्राइंडिंग आणि वेल्डिंगसारखी कामे करणे यावरही बंदी घालण्यात आली आहे.

हवामान विभागाच्या म्हणण्यानुसार सोमवारचा दिवस गेल्या अनेक महिन्यांतील सर्वात उष्ण दिवस ठरू शकतो. तापमान खरोखर 37 डिग्रीपर्यंत गेले, तर ते ऑक्टोबरच्या सरासरीपेक्षा 10 ते 11 डिग्री जास्त असेल. सिडनीत यापूर्वी फेब्रुवारीमध्ये याहून जास्त तापमानाची नोंद झाली होती.

न्यूकॅसलच्या उत्तरेपासून वोलाँगाँगपर्यंतच्या भागात तापमान 34 ते 36 डिग्रीच्या दरम्यान राहण्याचा अंदाज आहे. दुपारच्या सुमारास त्यात बदल होऊन वेगाने दमट वारे वाहू शकतात, असेही हवामान विभागाने म्हटले आहे.

न्यू साउथ वेल्स ग्रामीण अग्निशमन सेवेचे आयुक्त ट्रँट कर्टिन यांनी इशारा दिला आहे की राज्यातील अनेक भागांत जोरदार वादळी वारे, विजांचा कडकडाट आणि मेघगर्जनेसह वादळे येऊ शकतात. मात्र त्यातून पुरेसा पाऊस पडण्याची शक्यता नाही. उलट तिथे अतिउष्ण किंवा अतिदमट वारे वाहतील. अशा स्थितीत 'ड्राय लाइटनिंग' म्हणजे कोरडी वीज पडून आग लागण्याचा धोका कायम राहतो.

कोरडी वीज म्हणजे काय, तर गडगडणाऱ्या ढगांतून जमिनीवर वीज कोसळते, पण पाऊस जमिनीपर्यंत पोहोचत नाही. पोहोचलाच तर तो आग विझवायला उपयोगी पडत नाही. अशा वेळी वीज कोसळून जंगलात किंवा गवताळ भागात आग झपाट्याने भडकते.

कर्टिन यांनी नागरिकांना मोकळ्या मैदानात आग किंवा ज्वलनशील पदार्थ न ठेवण्याचे आवाहन केले. ते म्हणाले की यंदा अनुकूल परिस्थिती असल्यामुळे अग्निशमन विभाग मागील वर्षांपेक्षा अधिक सुसज्ज तंत्र वापरून जंगलातील आगीचा धोका कमी करण्यासाठी परिस्थितीवर लक्ष ठेवून आहे.

याच दरम्यान ऑस्ट्रेलियाच्या संघीय आपत्कालीन व्यवस्थापन मंत्री क्रिस्टी मॅकबेन यांनी आपत्कालीन इशारा प्रणालीचा विस्तार करण्यावर भर दिला. या प्रणालीत आपत्कालीन स्थितीत बाधित भागाजवळच्या मोबाइल फोनवर अलार्म वाजतो आणि संदेशही येतो. सध्या विक्टोरिया आणि पश्चिम ऑस्ट्रेलिया या राज्यांनी ही प्रणाली वापरायला सुरुवात केली आहे.

सप्टेंबरमध्ये ऑस्ट्रेलियाच्या अनेक भागांत अतिउष्ण वारे वाहिले होते. त्यामुळे तेव्हापासूनच तिथले प्रशासन ऑक्टोबरच्या उष्णतेच्या दृष्टीने अलर्ट मोडवर आले होते.