कपाळाकडचे केस कमी होऊन हेअरलाईन मागे जाण्याची कारणे कोणती?

केस सुंदर आणि मजबूत असावेत, असे सगळ्याच महिलांना वाटते. केस दाट वाढावेत म्हणून काहीतरी करत राहिले जाते. कधी बाजारातले महागडे शाम्पू वापरले जातात, तर कधी केस मऊ दिसावेत म्हणून कंडिशनर लावले जाते. तरीही अनेकदा कपाळाच्या दोन्ही बाजूंचे केस कमी होतात आणि भांग रुंद दिसू लागतो. काही जणांच्या बाबतीत पुढच्या बाजूची केसांची घनता कमी होते.

हेअरलाईन कमी झाल्यावर सुरुवातीच्या दिवसांत फारसा फरक जाणवत नाही. मात्र काही काळाने केस खूपच विरळ दिसतात आणि कपाळावर टक्कल पडल्यासारखे वाटते. कपाळही मोठे दिसू लागते. म्हणूनच केसांच्या बाबतीत दिसणाऱ्या लक्षणांकडे दुर्लक्ष न करता वेळीच योग्य उपचार करणे आवश्यक आहे, असे यात म्हटले आहे.

कपाळाच्या वरच्या भागात आणि दोन्ही कानांच्या दिशेने असलेल्या केसांच्या पुढच्या भागाला हेअरलाईन म्हणतात. केस हळूहळू कमी होत गेले की ही रेषा मागे सरकू लागते. काहींच्या कपाळावरचे केस कमी होतात, तर काहींचा भांग अरुंद दिसू लागतो. ही समस्या फक्त महिलांमध्येच नाही, तर पुरुषांमध्येही दिसते. प्रत्येकाची हेअरलाईन वेगळी असते. त्यामुळे केस खूप विरळ झाले तर मेडिकलमधले कोणतेही प्रॉडक्ट वापरण्याऐवजी डॉक्टरांच्या सल्ल्याने उपचार करावेत, असे सांगितले आहे.

हेअरलाईन मागे जाण्यामागे आनुवंशिकता हेही एक कारण असू शकते. कुटुंबातील इतर व्यक्तींचे केस विरळ असतील आणि हेअरलाईन मागे असेल, तर घरातल्या लहानांपासून मोठ्यांपर्यंत सगळ्यांच्या हेअरलाईनमध्ये बदल होऊ शकतात. शरीरातील हार्मोनल बदल आणि केसांच्या मुळांची विशिष्ट हार्मोन्सप्रती असलेली संवेदनशीलता अशा अनेक गोष्टींचा केसांच्या वाढीवर परिणाम होतो.

याशिवाय शरीरात लोहाची कमतरता, थायरॉईडचे विकार, पुरेशी प्रथिने न मिळणे आणि कमी वेळात वजन घटणे या कारणांमुळेही केस गळण्याची शक्यता असते. ताप, मोठा आजार, शस्त्रक्रिया, मानसिक ताण आणि अपुरी झोप यांचाही परिणाम होऊन केसांच्या समस्या वाढू लागतात.

केस खूप घट्ट बांधणे, वेणी किंवा अंबाडा घालणे, केस वारंवार ओढले जाणे आणि केमिकल ट्रीटमेंट यांमुळेही केसांच्या समस्या वाढतात. केस मोठ्या प्रमाणावर गळत असतील तर डॉक्टरांचा सल्ला घेणे फार आवश्यक आहे, असे यात नमूद आहे.

केसांची काळजी घेताना मुळांवर ताण येणार नाही याकडे लक्ष द्यावे, केस अगदी सैल बांधावेत आणि केस सरळ किंवा कुरळे करण्यासाठी कमीत कमी उष्णता असलेले यंत्र वापरावे, असेही सांगण्यात आले आहे. हा मजकूर केवळ सामान्य माहितीसाठी असून त्यात कोणत्याही उपचाराचा दावा केलेला नाही. कोणताही उपाय करण्यापूर्वी आपल्या डॉक्टरांचा सल्ला घ्यावा.