पन्हाळ्यात काकांचे १५ तोळे सोने चोरून पुतण्याने घेतली थार, पोलिसांनी ४८ तासांत पकडले

कोल्हापूर जिल्ह्यातल्या पन्हाळा तालुक्यात एक अजब चोरी समोर आली आहे. एकोणीस वर्षांच्या तरुणाने स्वतःच्या चुलत चुलत्यांच्या घरातून १५ तोळे सोने उडवले, त्या पैशांतून नवी कोरी महिंद्रा थार घेतली आणि गाडीच्या पूजेला त्याच चुलत्यांना बोलावले. कोडोली पोलिसांनी अवघ्या ४८ तासांत या प्रकरणाचा उलगडा करून त्याला अटक केली आहे.

आरोपी समर पोपट चव्हाण (वय १९) हा सातवे गावातला रहिवासी असून डिप्लोमा इंजिनिअरिंगला शिकतो. त्याच्या घराशेजारीच उमेश मारुती चव्हाण यांचे घर आहे. जवळचे नाते असल्यामुळे समरचे त्यांच्याकडे सारखे येणे-जाणे होते. त्याचाच फायदा घेऊन साधारण महिनाभरापूर्वी त्याने संधी साधली आणि तिजोरीतले सुमारे १४.५ लाख रुपये किमतीचे १५ तोळे दागिने गायब केले.

हे दागिने त्याने सांगली जिल्ह्यातल्या शिराळा तालुक्यातील देववाडी येथे राहणाऱ्या सराफ संग्राम बाबासो मोरे याला विकले आणि त्याबदल्यात सुमारे १० लाख रुपये मिळवले. दसऱ्याच्या मुहूर्तावर त्याने त्या पैशांतून नवी थार घरी आणली आणि गाडीच्या स्वागताचा, पूजेचा मोठा बेत आखला.

यात सर्वात धक्कादायक गोष्ट अशी की, ज्यांच्या घरी चोरी झाली होती, त्या उमेश चव्हाण आणि त्यांच्या कुटुंबाला समरने प्रमुख पाहुणे म्हणून आदराने बोलावले. चुलत्यांनीही आनंदाने पूजा केली आणि नारळ फोडला. पूजा झाल्यावर उमेश यांच्या पत्नीने दागिने घालायला तिजोरी उघडली, तेव्हा सोन्याचा डबाच जागेवर नव्हता. आजीचे जुने दागिने मात्र जसेच्या तसे होते. फक्त उमेश आणि त्यांच्या पत्नीचेच दागिने गेल्याने घरातल्या किंवा अगदी जवळच्या कुणाला तरी तिजोरीची माहिती असावी, असा संशय कुटुंबाला आला. त्यांनी लगेच कोडोली पोलीस स्टेशनला जाऊन लेखी तक्रार दिली.

पोलिसांनी तपास सुरू केला आणि समरने अचानक महागडी थार घेतल्याचे त्यांच्या लक्षात आले. एवढे पैसे कुठून आले, असे विचारल्यावर त्याने शेअर मार्केटमध्ये नफा झाल्याचे सांगून पोलिसांना भरकटवण्याचा प्रयत्न केला, पण त्याला काहीही पुरावा दाखवता आला नाही. पोलिसांनी त्याचे बँक खाते तपासले, तेव्हा सराफ मोरे याच्याकडून ३ लाख ४० हजार रुपये त्यात जमा झाल्याचे दिसले. हीच त्याची मोठी चूक ठरली. पोलिसांनी खाक्या दाखवताच समरने चोरीची कबुली दिली.

कागदपत्रे न तपासता स्वस्तात सोने घेतल्याबद्दल संग्राम मोरे यालाही सह-आरोपी म्हणून अटक झाली आहे. पोलिसांनी नवी थार, सोने आणि एक मोटरसायकल असा एकूण ३० लाख ५१ हजार रुपयांचा माल जप्त केला. पन्हाळा न्यायालयाने दोघांनाही ३ दिवसांची पोलीस कोठडी दिली आहे.

ही कारवाई प्रशिक्षणार्थी पोलीस उपअधीक्षक श्रीकांत ठिकणे यांच्या मार्गदर्शनाखाली झाली. पोलीस हवालदार युवराज पाटील आणि बाबासो कीटे, तसेच पोलीस कॉन्स्टेबल महेश कदम, अमोल चव्हाण आणि महेश शिंदे यांच्या पथकाने तपास पार पाडला. काकांच्या घरचे दागिने चोरून त्याच पैशांतून थार घेणारा आणि पूजेला काकांनाच बोलावणारा पुतण्या, हा विषय सातवे गावात तसेच संपूर्ण कोल्हापूर जिल्ह्यात चर्चेचा झाला आहे. कोडोली पोलीस पुढील तपास करत आहेत.