कॉलेजच्या आवारात वडिलांची मुलीला विनवणी, तिने प्रियकराची साथ निवडली; व्हिडिओ चर्चेत

सोशल मीडियावर सध्या एका व्हिडिओची मोठी चर्चा सुरू आहे. कॉलेजच्या आवारात घडलेल्या एका घटनेचा हा व्हिडिओ असल्याचे सांगण्यात येत आहे. त्यातील काही दृश्यांनी नेटकऱ्यांचे लक्ष वेधून घेतले असून, त्यावर वेगवेगळ्या प्रतिक्रिया उमटत आहेत.

व्हिडिओमध्ये एक वृद्ध वडील आपल्या मुलीची समजूत काढताना दिसतात. मुलगी आपले काहीच ऐकून घ्यायला तयार नाही, हे लक्षात आल्यावर ते अक्षरश: तिच्या हाता-पाया पडू लागतात. माहितीनुसार, प्रियकराला सोडून द्यावे यासाठी ते मुलीला समजावण्याचा प्रयत्न करत होते. इज्जत वाचवण्यासाठी तिने प्रियकराची साथ सोडावी, अशी विनवणी ते तिच्याकडे करतात.

मात्र मुलगी वडिलांचे म्हणणे ऐकून घेत नाही. त्यांच्या भावनांकडे दुर्लक्ष करून ती प्रियकराची निवड करते. वडिलांची हतबलता आणि त्यांच्या चेहऱ्यावरील भाव पाहून आता अनेकजण भावूक होत आहेत.

तिथे उपस्थित असलेल्या काही जणांनी ही घटना मोबाईल फोनमध्ये कैद केली आणि त्याचा व्हिडिओ सोशल मीडियावर शेअर केला. तो इन्स्टाग्रामवर टाकण्यात आला असून, तिथून तो चांगलाच व्हायरल झाला आहे. या व्हिडिओमुळे वैयक्तिक निर्णय, कौटुंबिक बंध आणि पालक व मुलांमधील नातेसंबंध याबाबत ऑनलाइन चर्चा रंगली आहे.

आजही देशाच्या काही भागांत प्रेमविवाहाला कुटुंबाची संमती मिळत नाही, त्यामुळे मुलं आणि आई-वडिलांमध्ये संघर्ष निर्माण होतो. बऱ्याचदा प्रेम आणि पालक यांपैकी एक निवडायची वेळ आली की मुलं प्रेमाची निवड करतात आणि इथूनच नात्यात दुरावा येतो, असे या निमित्ताने बोलले जात आहे. असेच हे प्रकरण सोशल मीडियावर व्हायरल झाले असून, त्यातील दृश्यांनी अनेकांना हादरवून सोडले.

व्हिडिओ पाहिल्यानंतर नेटकऱ्यांनी मुलीच्या वागण्यावर नाराजी व्यक्त केली आणि पालकांच्या दु:खाबद्दल सहानुभूती दाखवली. कमेंट सेक्शनमध्ये अनेक यूजर्सनी आपली मते मांडली आहेत. एका यूजरने म्हटले, "तिने तिच्या आईवडिलांना रडवले आहे, कर्म फिरुन पुन्हा तिच्याकडे परत येईल". दुसऱ्या यूजरने लिहिले, "मला वाटते की हे एक नाटक आहे आणि ते महाविद्यालयाच्या वर्गात सादर केले जात आहे". आणखी एका यूजरने लिहिले, "हा सर्व फालतूपणा करण्यापेक्षा वडिल आनंदाने मुलीचे लग्न का लावून देत नाही?"

या घटनेतील मुलगी, वडील आणि प्रियकर यांची नावे किंवा कॉलेजचे नाव समोर आलेले नाही. त्यामुळे नेमके काय घडले, याबाबत व्हिडिओतील दृश्ये आणि त्यावरील प्रतिक्रिया याशिवाय अधिक माहिती उपलब्ध नाही.