सेल्फ-ड्राइव्ह कार भाड्याने घेताय? स्क्रीनवरच्या भाड्यापेक्षा बिल वाढू शकतं
ऑनलाइन दिसणारं भाडं आणि प्रत्यक्षात भरावी लागणारी रक्कम यात फरक पडू शकतो. नुकसान, इंधन, वाहतूक दंड आणि उशिरा येणारी इनव्हॉइस यामुळे बिल वाढतं, म्हणून बुकिंगआधी अटी वाचणं महत्त्वाचं आहे.
छायाचित्रे सत्यापित केलेली नाहीत
ऑनलाइन बुकिंग केलं की गाडी पटकन बुक होते आणि न्यायला येते. समोर दिसलेली गाडी लगेच बुक करण्याची अनेकांची सवय असते. पण स्क्रीनवर दिसणारी किंमत आणि शेवटी प्रत्यक्षात भरावी लागणारी रक्कम सारखीच असेल असं नाही. गाडी परत केल्यानंतर झालेलं नुकसान, वाहतुकीचा दंड आणि इंधन यांसारखे खर्च संपूर्ण बजेट बिघडवू शकतात.
सेल्फ-ड्राइव्ह कार बुक करताना ग्राहक बहुतेक वेळा रोजच्या भाड्याकडेच बघतात. मात्र बुकिंगच्या अटी आणि शर्तींमध्ये काही विशिष्ट परिस्थितीत लागू होणारी वेगवेगळी शुल्कं दिलेली असतात. त्याकडे आपलं लक्षच जात नाही. म्हणून बुकिंग करण्यापूर्वी अटी आणि शर्ती काळजीपूर्वक वाचणं गरजेचं आहे.
रेव्हचे संस्थापक आणि सीईओ अनुपम अग्रवाल यांच्या मते, ग्राहकांनी आधी हे समजून घ्यायला हवं की कार विमा आणि भाडेकरूची जबाबदारी या दोन वेगळ्या गोष्टी आहेत. बुकिंगच्या वेळी दिला जाणारा डॅमेज वेव्हर हे ठरवतो की गाडीचं नुकसान झालं तर ग्राहकाला किती रक्कम भरावी लागेल.
गाडीला स्क्रॅचेस पडले किंवा दुसरं काही नुकसान झालं, तर किती पैसे द्यावे लागतील हे डॅमेज वेव्हर आणि लायबिलिटी कॅप यावर अवलंबून असतं. त्यामुळे आपली कमाल जबाबदारी किती आहे आणि कोणत्या परिस्थितीत वेव्हर लागू होणार नाही, हे बुकिंगआधी नक्की तपासा. उदाहरणार्थ, दारू पिऊन गाडी चालवल्यास नुकसानीपासून मिळणारं संरक्षण उपलब्ध नसू शकतं. रेव्हच्या मते, किरकोळ ओरखड्यांसाठी साधारणपणे शुल्क लावलं जात नाही.
भाड्याचा कालावधी संपला की जबाबदारीही संपली, असं नसतं. प्रवासात तयार होणारी स्वयंचलित ई-इनव्हॉइस ग्राहकापर्यंत उशिरा पोहोचू शकतात. शिवाय काही कंपन्या ही इनव्हॉइस ग्राहकाच्या नावावर वर्ग करण्यासाठी प्रशासकीय शुल्कही लावू शकतात.
इंधनाचाही बिलावर परिणाम होतो. गाडी परत करताना टाकीत आवश्यक तेवढं इंधन नसेल, तर कंपनी स्वतः इंधन भरून त्याचा खर्च ग्राहकाकडून वसूल करू शकते. काही भाडे योजनांमध्ये इंधनाच्या खर्चाबरोबरच इंधन भरण्याच्या सेवेचं वेगळं शुल्कही धरलेलं असू शकतं.
गाडी भाड्याने घेण्यापूर्वी डॅमेज वेव्हर, दायित्व मर्यादा, अपवाद, रद्द करण्याचं शुल्क, इंधन धोरण आणि वाहतूक दंडाचे नियम नक्की वाचा. तुम्ही बुक केलेलं मॉडेल उपलब्ध नसेल, तर कंपनीचं बदली धोरण काय आहे ते समजून घ्या. काही प्रकरणांत त्याच सेगमेंटमधली बदली गाडी किंवा अपग्रेड केलेली गाडी दिली जाऊ शकते.
म्हणजेच भाड्याच्या गाडीची खरी किंमत म्हणजे फक्त ऑनलाइन दाखवलेलं भाडं नव्हे. बुकिंग निश्चित करण्यापूर्वी बारीक अक्षरातला मजकूर वाचला, तर नंतर येणाऱ्या मोठ्या बिलापासून वाचता येतं.
