"शेतकऱ्यांना त्रास दिला तर आडवं करू", उपमुख्यमंत्री शिंदे यांचा नांदेडमध्ये मायक्रो फायनान्स कंपन्यांना इशारा

उपमुख्यमंत्री एकनाथ शिंदे यांनी नांदेडमध्ये शेतकऱ्यांना त्रास देणाऱ्या मायक्रो फायनान्स कंपन्यांना थेट इशारा दिला आहे. नांदेड जिल्ह्यातील विधानसभा मतदारसंघात विविध विकासकामांचे उद्घाटन आणि लोकार्पण त्यांच्या हस्ते झाले. त्या वेळी बोलताना त्यांनी फायनान्स कंपन्यांना सक्त ताकीद दिली. शेतकऱ्यांसाठी शिंदे यांनी आक्रमक पवित्रा घेतला असून त्यांनी कंपन्यांना थेट सुनावले आहे.

राज्यात दुष्काळी परिस्थितीमुळे भीषण स्थिती निर्माण झाली आहे. पाऊस अपुरा पडल्यामुळे शेतकरी बांधव हवालदिल झाले आहेत. या पार्श्वभूमीवर राज्य सरकार शेतकऱ्यांना मदत देण्याचा प्रयत्न करत आहे. दुष्काळग्रस्त भागात शेतकऱ्यांना 5 हजार रुपयांची अग्रीम मदतही सरकारकडून देण्यात आली आहे.

हा कार्यक्रम नांदेड उत्तर विधानसभा मतदारसंघातील विविध विकासकामांचा होता. या कामांचे उद्घाटन आणि लोकार्पण एकनाथ शिंदे यांच्या हस्ते झाले. कार्यक्रमाला खासदार अशोक चव्हाण, हेमंत पाटील आणि आमदार बालाजी कल्याणकर यांच्यासह अनेक पदाधिकारी उपस्थित होते.

बोलताना शिंदे यांनी सांगितले की, नांदेडच्या विकासकामांसाठी सरकारकडून निधी उपलब्ध करून देण्यात आला आहे. आरोग्य सुविधा, पाणीपुरवठा आणि चारा व्यवस्थेच्या कामांचाही त्यांनी उल्लेख केला.

कार्यक्रमात शेतकऱ्यांच्या कर्जवसुलीचा मुद्दा मांडत शिंदे म्हणाले की, आधीच दुष्काळामुळे शेतकरी अडचणीत आहेत. अशा वेळी फायनान्स कंपन्यांच्या कर्मचाऱ्यांनी वसुलीसाठी त्यांच्यावर दबाव टाकू नये. "शेतकऱ्यांना त्रास देऊ नका, अन्यथा मायक्रो फायनान्स कंपनीला आडवं करू," असा स्पष्ट इशारा त्यांनी दिला. शेतकऱ्यांना त्रास देणाऱ्या कर्मचाऱ्यांवर कठोर कारवाई केली जाईल, असेही त्यांनी सांगितले.

दुष्काळामुळे शेतकरी संकटात आहेत आणि सरकार त्यांच्या पाठीशी आहे, असे शिंदे यांनी स्पष्ट केले. पात्र दुष्काळग्रस्त शेतकऱ्यांना 5 हजार रुपयांची अग्रीम मदत देण्याच्या निर्णयाला मंत्रिमंडळाने मंजुरी दिली आहे. ही रक्कम थेट बँक खात्यात जमा करण्याची तरतूद आहे. या मदतीसाठी सरकारने 7,500 कोटी रुपयांची तरतूद केली आहे.

विरोधकांवर टीका करताना शिंदे यांनी लाडकी बहीण योजना बंद होणार नाही, असे ठामपणे सांगितले. महिलांना मिळणारा दीड हजार रुपयांचा लाभ सुरू राहील, असे ते म्हणाले.

शेतकऱ्यांच्या मुलींसाठी सामूहिक विवाह मेळावे आयोजित करण्यात येणार असल्याची माहितीही शिंदे यांनी दिली. दिवाळीच्या काळात शेतकरी कुटुंबांना दिलासा मिळावा, यासाठी सरकार प्रयत्न करत आहे, असेही त्यांनी सांगितले.