खंडाळ्यात भोसले की गाढवे? सातारा जिल्हा बँकेच्या निवडणुकीत तिरंगी लढत

सातारा जिल्हा मध्यवर्ती सहकारी बँकेच्या निवडणुकीत खंडाळा तालुक्यातील विकास सेवा सोसायटी मतदारसंघाची लढत चांगलीच रंगली आहे. मतदान शांततेत पार पडले असले, तरी या मतदारसंघात नेमका कोण बाजी मारणार, याची उत्सुकता राजकीय वर्तुळात निर्माण झाली आहे.

या मतदारसंघातून राष्ट्रवादी काँग्रेसतर्फे (अजित पवार गट) अजय भोसले, भाजपतर्फे अनिरुद्ध गाढवे, तर अपक्ष म्हणून ॲड. शामराव गाढवे निवडणुकीच्या रिंगणात उतरले होते. म्हणजेच तीन उमेदवार समोरासमोर होते आणि तिरंगी सामना रंगला. उमेदवार तिघे असले, तरी मुख्य सामना राष्ट्रवादी काँग्रेस आणि भाजप यांच्यातच असल्याचे चित्र पाहायला मिळाले.

सहकार क्षेत्रात प्रतिनिधित्व मिळवण्याबरोबरच स्थानिक राजकीय नेत्यांची प्रतिष्ठाही या निवडणुकीत पणाला लागली होती. त्यामुळे मतदारांना आपल्या बाजूला वळवण्यासाठी दोन्ही बाजूंकडून जोरदार प्रयत्न करण्यात आले. भोसले आणि गाढवे यांच्यात प्रतिष्ठेची लढाई रंगली.

मदत व पुनर्वसन मंत्री मकरंद पाटील आणि ग्रामविकास मंत्री जयकुमार गोरे या दोघांचीही राजकीय ताकद या निवडणुकीच्या निमित्ताने पणाला लागली. आपल्या समर्थित उमेदवाराला विजय मिळवून देण्यासाठी दोन्ही नेत्यांनी स्थानिक पातळीवर मोठी मोर्चेबांधणी केली होती.

मतदानाच्या दिवशी राजकीय हालचालींनाही आणखी वेग आला. सहलीवर गेलेल्या मतदारांसह मंत्री मकरंद पाटील सकाळी साडेअकराच्या सुमारास खंडाळ्यात पोहोचले. दुसरीकडे ग्रामविकास मंत्री जयकुमार गोरे हेही आपल्या बाजूच्या मतदारांसह छत्रपती शिवाजी महाराज चौकात आले. दोन्ही बाजूंचे नेते उपस्थित असल्यामुळे परिसरातले राजकीय वातावरण तापले. राष्ट्रवादी आणि भाजपकडून शक्तिप्रदर्शन झाल्याची चर्चा सुरू झाली.

खंडाळ्यात दिवसभर मतदानाची प्रक्रिया शांततेत पार पडली. सोसायटीसह अन्य संस्थांमधील एकूण ८८ मतदारांनी मतदानाचा हक्क बजावला. मतदान केंद्रावर कुठलाही अनुचित प्रकार घडू नये, म्हणून पोलीस प्रशासनाने चोख बंदोबस्त ठेवला होता.

मतदान प्रक्रिया पूर्ण झाल्यानंतर तिन्ही उमेदवार आणि त्यांचे समर्थक आपापल्या विजयाचे दावे करत आहेत. मात्र मतदारांनी नेमका कोणाच्या बाजूने कौल दिला आहे, हे निकालानंतरच स्पष्ट होणार आहे. अजय भोसले आपले वर्चस्व सिद्ध करणार, अनिरुद्ध गाढवे बाजी मारणार, की अपक्ष उमेदवार शामराव गाढवे निकालात अनपेक्षित उलटफेर घडवणार, याकडे आता खंडाळा तालुक्याचे लक्ष लागले आहे.