जय भारत नाक्यावरील अडथळे हटले, पनवेलकरांना कोंडीतून दिलासा; आयुक्त मंगेश चितळे यांची कारवाई

पनवेल शहरातील जय भारत नाक्यावर रोज होणाऱ्या वाहतूक कोंडीतून आता नागरिकांची सुटका झाली आहे. आयुक्त मंगेश चितळे यांनी कडक भूमिका घेत रस्त्यात अडथळा ठरणारे बांधकाम हटवले. त्यामुळे नाक्याच्या परिसरातील लोकांनी सुटकेचा निःश्वास सोडला आहे.

स्वातंत्र्य चळवळीच्या काळात आणि त्यानंतरही देशभक्तीच्या भावनेतून अनेक चौक आणि नाक्यांना नावे देण्यात आली. 'जयभारत' हे नाव त्याच राष्ट्रीय भावनेचे प्रतीक आहे. त्या काळातल्या स्थानिक कार्यकर्त्यांच्या बैठका आणि आंदोलने याच ठिकाणी होत असत. पण पनवेल शहराचा विस्तार वाढत गेला आणि जय भारत नाक्यावर वाहतूक कोंडी मोठ्या प्रमाणात होऊ लागली.

जय भारत नाक्याच्या आसपास जुनी पेठ, कापड बाजार आणि महत्त्वाची मंदिरे आहेत. जुन्या पनवेलमधला हा मध्यवर्ती भाग असल्याने सण-उत्सव, राजकीय सभा आणि सामाजिक चळवळींचे केंद्र हे ठिकाण नेहमीच राहिले आहे.

पनवेल पालिकेने शहरातले बहुतेक रस्ते २० ते ३० फुटी केले आहेत. लाईन आळी, झवेरी बाजार, व्ही. के. हायस्कूल रस्ता, महात्मा फुले रोड आणि टिळक रोड हे त्यात येतात. महापालिका झाल्यानंतर हे रस्ते अपुरे पडत असून रुंदीकरणाची गरज भासत आहे. बाजारपेठेत तर कापड गल्ली आणि मिरची गल्ली असे काही रस्ते आहेत, जे आजही १५ ते २० फुटांचेसुद्धा नाहीत.

पनवेलमध्ये बाहेरून येणाऱ्या-जाणाऱ्यांची संख्या मोठी आहे. शहरातच मोठी लोकवस्ती आहे आणि वाहनेही कमी नाहीत. सगळ्यात महत्त्वाचा मुद्दा म्हणजे बहुतांश सोसायट्यांमध्ये पार्किंगची सोय नाही. त्यामुळे इमारतीत राहणारे रहिवासी आपली वाहने रस्त्यावरच पार्क करतात. याचा वाहतूक कोंडीवर मोठा परिणाम होतो, म्हणून आयुक्त मंगेश चितळे यांनी रस्ते रुंदीकरणाची मोहीम हाती घेतली आहे.

पनवेल महानगरपालिकेने या रस्त्याच्या रुंदीकरणासंदर्भात तिथल्या घरमालकांना वाढीव एफएसआयचा प्रस्ताव दिला होता. मात्र भाडेकरूंच्या अवास्तव मागण्यांमुळे मालक आणि भाडेकरू यांच्यात वाद निर्माण झाला आणि तो प्रस्ताव प्रलंबित राहिला. दरम्यान टपाल नाका येथे वाहतुकीची कोंडी दिवसेंदिवस वाढत होती, त्यामुळे तिथे रस्ता रुंद करणे महत्त्वाचे होते.

काही महिन्यांपूर्वी या कामात अडथळा ठरणाऱ्या सहा गाळ्यांवर पालिकेतर्फे जेसीबीच्या साहाय्याने मोठी निष्कासन कारवाई करण्यात आली होती. तसेच तिथली ८०-९० वर्षे जुनी, धोकादायक अशी एक मजली लाकडी इमारत अतिक्रमण विभागाने जेसीबीने पाडली. या कारवायांमुळे टपाल नाका येथील वाहतूक कोंडी फोडण्यात पालिका प्रशासनाला यश आले आहे.