नेरळ पोलिसांचा बाईक चोर टोळीला दणका! मुख्य आरोपी अटकेत, दोन अल्पवयीन ताब्यात
नेरळ आणि कर्जत तालुक्याच्या हद्दीत दुचाकी चोरी करणाऱ्या एका टोळीला नेरळ पोलिसांच्या गुन्हे प्रकटीकरण पथकाने जेरबंद केले आहे. या पथकाने केलेल्या कारवाईत पोलिसांनी मुख्य आरोपीला अटक केली असून त्याच्या दोन अल्पवयीन साथीदारांना ताब्यात घेतले आहे. आरोपींकडून एकूण ६५ हजार रुपये किमतीच्या दोन चोरीच्या दुचाकी जप्त करण्यात आल्या आहेत. या कारवाईमुळे नेरळ आणि कर्जत पोलीस स्टेशनमधील दुचाकी चोरीचे दोन गुन्हे उघडकीस आले आहेत, असे पोलिसांनी सांगितले.
ही घटना मुरबाड येथे राहणाऱ्या समीर पांडुरंग भोईर यांच्या तक्रारीवरून समोर आली. त्यांनी त्यांची टीव्हीएस कंपनीची एन्टॉर्क-१२५ स्कुटी (क्रमांक एमएच ०५ एफटी ०८७७) रोजच्या वापरासाठी आणली होती. ही स्कुटी डिक्सळ-नेरळ येथील रोहित ढाब्यासमोर रस्त्याच्या कडेला उभी केली असताना अज्ञात चोरट्यांनी ती चोरून नेली. भोईर यांनी याबाबत नेरळ पोलीस स्टेशनमध्ये तक्रार दिल्यानंतर, या तक्रारीवरून भारतीय न्याय संहिता (बीएनएस) २०२३ च्या कलम ३०३(२) अन्वये गुन्हा दाखल करण्यात आला होता.
हा गुन्हा गंभीर स्वरूपाचा असल्याचे लक्षात घेऊन रायगड जिल्ह्याच्या पोलीस अधीक्षक श्रीमती आंचल दलाल, अपर पोलीस अधीक्षक अभिजित शिवथरे आणि उपविभागीय पोलीस अधिकारी राहुल गायकवाड या वरिष्ठ अधिकाऱ्यांच्या मार्गदर्शनाखाली नेरळ पोलीस स्टेशनचे सहाय्यक पोलीस निरीक्षक राहुल वरोटे यांच्या पथकाने या प्रकरणाचा तपास हाती घेतला.
तपासादरम्यान गोपनीय बातमीदारांकडून मिळालेली माहिती आणि तांत्रिक विश्लेषणाच्या आधारे पोलिसांनी आरोपी इलियास फ्रान्सिस मिरांडा (वय १८ वर्षे, राहणार गावदेवी बुवापाडा, अंबरनाथ, जिल्हा ठाणे) याची ओळख पटवली. हा आरोपी सतत राहण्याचे ठिकाण बदलत असल्याने त्याला पकडणे अवघड जात होते, मात्र पोलिसांनी अंबरनाथमध्ये सापळा रचून अखेर त्याला ताब्यात घेतले.
पोलिसांनी केलेल्या सखोल चौकशीत आरोपी इलियास फ्रान्सिस मिरांडा याने आपल्या दोन अल्पवयीन साथीदारांच्या मदतीने दुचाकी चोरी केल्याची कबुली दिली, असे पोलिसांनी सांगितले. या तिघांकडून पोलिसांनी नेरळ परिसरातून चोरीला गेलेली सुमारे ४० हजार रुपये किमतीची एन्टॉर्क स्कुटी, तसेच कर्जत पोलीस स्टेशनच्या हद्दीतून चोरी झालेली २५ हजार रुपये किमतीची होंडा डिओ (क्रमांक एमएच ४६ एए २३३१) जप्त केली. जप्त करण्यात आलेल्या या दोन्ही वाहनांची एकूण किंमत ६५ हजार रुपये इतकी आहे.
ही यशस्वी कारवाई नेरळ पोलीस स्टेशनचे पोलीस उपनिरीक्षक सुशांत वरक, पोलीस हवालदार सचिन वाघमारे आणि पोलीस अंमलदार राजेभाऊ केकान, आशु बेंद्रे व विनोद वांगणेकर यांच्या पथकाने केली.
