नात्यातील मुलीचा आंतरजातीय विवाह जुळवला म्हणून भटजीचा खून; सदलगा पोलिसांनी काही तासांत आरोपीला पकडले

नात्यातील मुलीचा आंतरजातीय विवाह लावून दिला, याचा राग मनात धरून एका भटजीचा निर्घृण खून करण्यात आला. इचलकरंजीत राहणारे मंदार अजित रानडे (वय ३५) हे या हल्ल्यात ठार झाले. हा खून माणकापूर (ता. निपाणी) येथे झाला. सदलगा पोलिसांनी या प्रकरणाचा अवघ्या काही तासांत छडा लावला आणि मारेकऱ्याला अटक केली. या घटनेमुळे कोल्हापूर आणि निपाणी परिसरात मोठी खळबळ उडाली आहे.

मंदार रानडे हे पुरोहिताचे म्हणजेच भटजीचे काम करत होते. शिरडवाड येथे राहणाऱ्या बाबुसाहेब उर्फ दीपक अण्णा मगदूम याच्या नात्यातील एका मुलीने १३ जानेवारी २०२६ रोजी घरातून निघून जाऊन आंतरजातीय विवाह केला होता. हा विवाह मंदार रानडे यांनी जुळवून दिला होता, असे सांगितले जाते. त्याचा तीव्र राग बाबुसाहेबच्या मनात होता आणि त्याच रागातून त्याने मंदार यांचा काटा काढायचे ठरवले.

३१ ऑक्टोबर रोजी बाबुसाहेबने दुसऱ्या नंबरवरून मंदार यांच्याशी संपर्क साधला. आणखी एका विवाहासाठी स्थळ जुळवायचे आहे, असे त्याने सांगितले. त्यानंतर त्याने मंदार यांना इचलकरंजीहून माणकापूर (ता. निपाणी) येथील बाहेरच्या परिसरात बोलावून घेतले. ठरल्याप्रमाणे मंदार तिथे पोहोचले, तेव्हा बाबुसाहेबने अचानक त्यांच्या डोळ्यात मिरचीपूड फेकली.

डोळ्यात मिरचीपूड गेल्यामुळे मंदार यांना कोणताही प्रतिकार करता आला नाही. त्याच संधीचा फायदा घेत आरोपीने कोयत्याने त्यांच्या मानेवर आणि गळ्यावर सपासप वार केले. या भीषण हल्ल्यात मंदार रानडे यांचा जागीच मृत्यू झाला. याप्रकरणी इचलकरंजी येथील केदार चंद्रकांत कुलकर्णी यांनी सदलगा पोलीस ठाण्यात फिर्याद दिली.

घटनेचे गांभीर्य लक्षात घेऊन जिल्हा पोलीस अधीक्षक रामराजन आणि पोलीस उपअधीक्षक गोपाळकृष्ण गौडार यांच्या मार्गदर्शनाखाली विशेष तपास पथक तयार करण्यात आले. चिक्कोडीचे मंडळ पोलीस निरीक्षक विश्वनाथ चौगुला, सदलगा पोलीस ठाण्याचे उपनिरीक्षक बसगौडा नेर्ली आणि त्यांच्या पोलीस पथकाने लगेच तपास सुरू केला. त्यातून संशयित बाबुसाहेब मगदूम याला ताब्यात घेण्यात आले.

संशयिताला ताब्यात घेतल्यानंतर पोलिसांनी त्याची कसून चौकशी केली. त्यानंतर बाबुसाहेबने गुन्ह्याची कबुली दिली. विवाहाला मदत केल्याच्या रागातूनच आपण खून केला, असे त्याने सांगितले. गुन्ह्यात वापरलेला कोयताही पोलिसांनी जप्त केला आहे. मारेकऱ्याला पकडण्यात पोलिसांना अवघ्या काही तासांत यश आले, हे या तपासाचे वैशिष्ट्य ठरले आहे.