रिसोडमध्ये घरगुती वादातून पत्नीवर चाकूने वार करून खून; आरोपी पती पोलिसांच्या ताब्यात

रिसोड शहरात रविवारी सकाळी सहा ते साडेसहा वाजण्याच्या सुमारास कौटुंबिक वादातून एका महिलेचा चाकूने वार करून खून करण्यात आल्याची धक्कादायक घटना घडली. कल्पना योगेश ढवळे (३५) असे मृत महिलेचे नाव आहे. त्यांचे पती योगेश ढवळे यांच्यावर हल्ल्याचा आरोप आहे.

प्राथमिक माहितीनुसार, घरगुती वाद आणि पत्नीच्या चारित्र्यावरील संशय यातून योगेश यांनी कल्पना यांच्यावर धारदार चाकूने वार केले, असा आरोप आहे. या हल्ल्यात गंभीर जखमी झालेल्या कल्पना यांना उपचारासाठी रुग्णालयात दाखल करण्यात आले. मात्र ग्रामीण रुग्णालयात उपचार सुरू असतानाच त्यांचा मृत्यू झाला.

माहितीनुसार, कल्पना उच्चशिक्षित होत्या. त्यांना एक मुलगा आणि एक मुलगी, अशी दोन लहान मुले आहेत. त्यांचे माहेर दाताडा बुद्रुक येथे असून त्यांचे आई-वडील शेती करतात. ढवळे कुटुंब काही महिन्यांपूर्वीच रिसोड शहरातील हिंगोली मार्गावरील छत्रपती संभाजीनगर परिसरात भाड्याच्या घरात राहायला आले होते. रविवारी सकाळी पती-पत्नीमध्ये झालेल्या वादाची माहिती पुढे आली आहे.

घटनेनंतर आरोपी पती घटनास्थळावरून पसार झाला होता. मात्र रिसोड पोलीस ठाण्याचे ठाणेदार रामेश्वर चव्हाण यांच्या मार्गदर्शनाखाली पोलिसांनी तपास वेगाने सुरू केला. त्यानंतर आरोपी पतीला ताब्यात घेण्यात आल्याची माहिती समोर आली आहे. या घटनेमुळे रिसोड शहरात तसेच छत्रपती संभाजीनगर भागात खळबळ उडाली आहे.

मृत महिलेचे भाऊ दत्ता लक्षण कंकाळ यांनी या प्रकरणी पोलिसांकडे रीतसर तक्रार दिली आहे. तक्रारीतील तपशील, पोलिसांची अधिकृत भूमिका आणि पुढील कायदेशीर कारवाई याबाबत अधिकृत माहिती मिळणे अपेक्षित आहे.

मिळालेल्या माहितीनुसार, आरोपीचे साडू नंदू सुदामा तहकीक (मसला) आणि दीपक मगर (मकोडी) यांनी यापूर्वीही त्याला अनेकदा समजावून सांगितले होते. मात्र घरातील वादाचे नेमके स्वरूप काय होते आणि या घटनेमागची परिस्थिती काय होती, याचा उलगडा तपासातूनच होणे आवश्यक आहे.

या दुर्दैवी घटनेमुळे दोन लहान मुलांच्या आयुष्यातून आईचे प्रेम आणि आधार हरपला आहे. उच्चशिक्षित असलेल्या कल्पना यांच्या मृत्यूने त्यांच्या माहेरच्या कुटुंबावरही दुःखाचा डोंगर कोसळला आहे. सध्या या प्रकरणातील पुढील तपास आणि कायदेशीर प्रक्रिया महत्त्वाची असून, पोलिसांच्या अधिकृत तपासातून घटनेचे नेमके कारण स्पष्ट होणार आहे.