शिवाजी पार्कात CJP चे आंदोलन; दीपके म्हणाले, फडणवीसांनी महाराष्ट्राचा वारसा विसरू नये

मुख्य निवडणूक आयुक्त ज्ञानेश कुमार यांनी राजीनामा द्यावा, या मागणीसाठी CJP ने मुंबईत आंदोलनाची घोषणा केली होती. आज, २ ऑक्टोबरपासून हे आंदोलन सुरू झाले आहे. दादर येथील छत्रपती शिवाजी महाराज पार्कच्या गेट क्रमांक ६ जवळ हे आंदोलन होत आहे.

सीजेपीचे अध्यक्ष अभिजीत दिपके यांनी यावेळी भाषण केले. आपल्या अधिकारांसाठी लढणे हीच महात्मा गांधींना खरी श्रद्धांजली आहे, असे ते म्हणाले. इंग्रजांनी गांधींना जितका त्रास दिला नव्हता, तितका त्रास या संघी लोकांनी आपल्याला दिला आहे, अशी टीका त्यांनी केली. पण गांधी कधी मरू शकत नाहीत, गांधी या देशाचा आत्मा आहेत, असेही दिपके म्हणाले.

दिपके यांच्या म्हणण्यानुसार, गोडसेंसारखे हजारो लोक येतील आणि जातील, पण गोडसेसारखे लोक भित्रे आहेत. हा देश गांधींच्या विचारांचा आहे, असे सांगून त्यांनी गोडसेंच्या विचारधारेच्या लोकांना उद्देशून म्हटले की गांधींना कोणी संपवू शकत नाही. एक महाभाग स्वत:ला नॉनबायोलॉजीकल म्हणवतो, आम्हाला माहितीये तुम्ही माणूस नाही आहात, असेही ते म्हणाले. गांधी, नेहरू, आंबेडकर यांच्याशी तुलना करण्याची यांची लायकीही नाही, असे त्यांचे म्हणणे होते.

गांधी या देशाचा आत्मा असतील तर आंबेडकर भारताच्या पाठीचा कणा आहेत आणि जवाहरलाल नेहरू देशाचे मन आहेत, असे दिपके म्हणाले. निवडणूक जिंकून तुम्ही त्यांच्याहून मोठे होऊ शकत नाही, असे त्यांनी सांगितले. गांधी, नेहरू, आंबेडकर हे देशासाठी त्याग करून आणि आंदोलने करून मोठे झाले, असे ते म्हणाले. ज्यांना आपले अधिकारही माहीत नव्हते, त्यांना या नेत्यांनी ते अधिकार दिले, पण आजचे सरकार नागरिकांचे अधिकार हिसकावू लागले आहे, असा आरोप दिपके यांनी केला. तुम्ही देशाला अजून किती लुटणार आहात, असा सवालही त्यांनी केला. नोटबंदी आणि कोरोनाच्या काळात नागरिकांना रस्त्यावर रांगेत उभे केले, अशी टीकाही त्यांनी केली.

मुख्यमंत्री देवेंद्र फडणवीस यांच्याबद्दल बोलताना दिपके म्हणाले की, फडणवीस यांनी प्रोटेस्टला गेलात तर तीन दिवस जेलमध्ये जावे लागेल, असे म्हटले होते. तुम्ही महाराष्ट्राचे मुख्यमंत्री आहात आणि या महाराष्ट्राला एक परंपरा आहे, असे सांगून त्यांनी म्हटले की, फडणवीस साहेब, या महाराष्ट्राचा वारसा विसरू नका. तुम्ही विसरले असाल, आम्ही नाही. फडणवीस साहेब, तुम्हाला आम्हाला जेलमध्ये टाकायचे होते ना, मग आता टाका, असे आव्हान त्यांनी राज्य सरकारला दिले.

या देशात जनता सरकार निवडते, पण या नॉनबायोलॉजिकल महामानवाच्या मते सरकार ठरवणार की त्यांचे मतदार कोण असतील आणि कोण नसतील, असेही दिपके म्हणाले. हेच जर आधीच्या सरकारने केले असते, तर तुम्ही आजही चहाच्या दुकानात चहा विकला असता, असे ते म्हणाले.