हिंजवडी-शिवाजीनगर मेट्रो 3 नोव्हेंबरला सुरू होणार; पहिल्या टप्प्यात 17 स्थानकांवरच थांबे
छायाचित्रे सत्यापित केलेली नाहीत
पंतप्रधान नरेंद्र मोदी यांच्या हस्ते 3 नोव्हेंबर रोजी व्हर्च्युअल लोकार्पण होणार आहे. मात्र 23 पैकी 6 स्थानके सुरुवातीला बंद राहतील, त्यात शिवाजीनगरचाही समावेश आहे.
पुणे आणि पिंपरी-चिंचवडमधील आयटी कर्मचारी तसेच सर्वसामान्य प्रवासी ज्या मेट्रोची कित्येक दिवस वाट पाहत होते, ती प्रतीक्षा आता संपत आली आहे. पुणे महानगर प्रदेश विकास प्राधिकरणाकडून (PMRDA) सार्वजनिक-खासगी भागीदारीतून उभारल्या जाणाऱ्या हिंजवडी ते शिवाजीनगर 'मेट्रो मार्गिका 3' चे काम अंतिम टप्प्यात आले आहे. येत्या 3 नोव्हेंबर रोजी पंतप्रधान नरेंद्र मोदी यांच्या हस्ते व्हर्च्युअल पद्धतीने या मेट्रोचे अधिकृत लोकार्पण करण्याचे नियोजन आहे. या कार्यक्रमाला मुख्यमंत्री देवेंद्र फडणवीस उपस्थित राहण्याची शक्यता आहे.
गेले अनेक दिवस या मार्गावर मेट्रोची चाचणी सुरू होती आणि गाड्या रिकाम्या धावत होत्या. दुसरीकडे आयटी कर्मचारी रस्त्यावरच्या प्रचंड वाहतूक कोंडीत अडकत होते. ही सेवा सुरू झाल्यावर हिंजवडी आयटी पार्कसह वाकड, बालेवाडी, बाणेर आणि शिवाजीनगर परिसरातील लाखांवर प्रवाशांचा वेळ वाचणार असून प्रवास सोपा होणार आहे. पण उद्घाटनाच्या दिवशीच संपूर्ण मार्ग पूर्ण क्षमतेने प्रवाशांसाठी खुला होणार नाही, हे स्पष्ट झाले आहे.
माण ते शिवाजीनगर हा मार्ग 13.2 किलोमीटर लांबीचा असून त्यावर एकूण 23 स्थानके आहेत. पहिल्या टप्प्यात मात्र फक्त 17 स्थानकांवरूनच प्रत्यक्ष प्रवासी वाहतूक सुरू होईल. उरलेल्या 6 स्थानकांवर बांधकामाची कामे अजून बाकी आहेत आणि आवश्यक सुरक्षा मंजुरीची प्रक्रियाही पूर्ण झालेली नाही. त्यामुळे तिथे प्रवाशांना चढता किंवा उतरता येणार नाही.
पहिल्या टप्प्यात बंद राहणारी स्थानके अशी आहेत: बालेवाडी हाय स्ट्रीट, बालेवाडी फाटा, बाणेर गाव, बाणेर-पाषाण लिंक रोड, भोसले नगर आणि शिवाजीनगर.
पहिल्या टप्प्यात मेट्रो थांबणारी 17 स्थानके अशी आहेत: माण, माण-एमआयडीसी सर्कल, माण बस डेपो, हिंजवडी फेज दोन-सर्कल दोन, हिंजवडी फेज दोन-सर्कल एक, पद्मभूषण चौक, श्री शिवछत्रपती शिवाजी महाराज चौक-हिंजवडी, हिंजवडी फेज एक, वाकड चौक, श्री शिवछत्रपती क्रीडा संकुल-म्हाळुंगे, मायकॉन-बालेवाडी, आर. के. लक्ष्मण म्युझियम-बालेवाडी, औंध, सकाळनगर, सावित्रीबाई फुले पुणे विद्यापीठ, कृषी महाविद्यालय आणि जिल्हा न्यायालय, पुणे.
सर्वात मध्यवर्ती आणि महत्त्वाचे ठिकाण असलेले शिवाजीनगर स्थानकच सुरुवातीला बंद राहणार असल्याने प्रवाशांची मोठी गैरसोय होणार आहे. न्यायालय परिसर, शासकीय कार्यालये, शैक्षणिक संस्था आणि इतर सार्वजनिक वाहतुकीशी जोडणी यासाठी शिवाजीनगर हे अत्यंत मोक्याचे ठिकाण आहे. आता प्रवाशांना सुरू असलेल्या दुसऱ्या एखाद्या स्थानकावर उतरून पुढे बस, रिक्षा किंवा स्वतःच्या वाहनाने जावे लागेल.
बालेवाडी आणि बाणेर भागातली प्रमुख स्थानकेही बंद राहिल्याने प्रवासाची साखळी तुटणार आहे. मेट्रो स्थानक जवळ असूनही सलग सेवा मिळणार नाही. त्यामुळे स्थानकापर्यंत पोहोचण्यासाठी आणि पुढच्या प्रवासासाठी नागरिकांना पर्यायी वाहतुकीवरच अवलंबून राहावे लागेल.
सुमारे 8,313 कोटी रुपयांच्या या हिंजवडी-शिवाजीनगर मेट्रो प्रकल्पाचे भूमिपूजन 8 डिसेंबर 2018 रोजी पंतप्रधान नरेंद्र मोदी यांच्या हस्ते झाले होते. सुरुवातीच्या वेळापत्रकानुसार काम पूर्ण होण्यास उशीर झाल्याने मुदत अनेकदा वाढवावी लागली.
याआधी 6 मार्च 2022 रोजी पुणे मेट्रोच्या पहिल्या टप्प्याचे उद्घाटन घाईघाईने उरकण्यात आले होते. त्यात वनाज ते गरवारे महाविद्यालय आणि पिंपरी-चिंचवड महापालिका ते फुगेवाडी अशी एकूण 10 स्थानके होती. आता हिंजवडी-शिवाजीनगर मार्गाच्या उद्घाटनालाही सर्व स्थानके सुरू होत नसल्याने अपूर्ण कामांमध्ये उद्घाटन उरकल्याची चर्चा पुन्हा रंगू लागली आहे.
3 नोव्हेंबर रोजीच पंतप्रधान मोदी यांच्या हस्ते पुणे मेट्रोच्या दुसऱ्या टप्प्यातील 4 नव्या मार्गिकांचे भूमिपूजनही केले जाणार आहे. या मार्गिका अशा आहेत: मार्गिका 2 ए (वनाज ते चांदणी चौक), मार्गिका 2 बी (रामवाडी ते वाघोली), मार्गिका 4 (खडकवासला ते खराडी) आणि मार्गिका 4 ए (नळस्टॉप ते वारजे-माणिकबाग).
कमेंट
अजून कमेंट नाही. पहिली तुम्ही लिहा.