अफेअरच्या चर्चांवर गोविंदा अखेर बोलला, सुनीतासोबतच्या नात्याबद्दल पहिल्यांदाच उघड भाष्य

गेल्या काही महिन्यांपासून गोविंदा आणि त्याची बायको सुनीता आहुजा यांच्यात काहीतरी बिनसलंय, अशी चर्चा सगळीकडे सुरू होती. दोघंही सोशल मीडियावर एकमेकांना टोमणे मारताना दिसत होते. सुनीता तर पापाराझींसमोरसुद्धा गोविंदाला उघडपणे टोले मारायची. एवढं सगळं होऊनही गोविंदा मात्र गप्प राहिला होता. त्याने कधीच समोर येऊन उत्तर दिलं नव्हतं. आता त्याने अखेर मौन सोडलं आहे.

नुकत्याच दिलेल्या एका जाहीर मुलाखतीत गोविंदाने स्वतःच्या आणि सुनीताच्या नात्यावर पहिल्यांदाच उघडपणे भाष्य केलं. त्याला सरळ विचारलं गेलं की तुमचं आणि सुनीताजींचं नातं कोणामुळे बिघडलं? या प्रश्नावर त्याने दिलेल्या उत्तराने सगळेच चकित झाले. गोविंदा म्हणाला, "तुमचं नशीब चोरायला लोक तुमची बाई चोरतात."

या एका वाक्यातून त्याने बरंच काही सांगितलं. त्याचा रोख असा होता की काही लोक मुद्दाम त्याच्या कुटुंबात फूट पाडण्याचा प्रयत्न करत आहेत. त्याच्या सुखी संसाराला कोणाची तरी वाईट नजर लागली आहे, असं त्याला म्हणायचं होतं.

पुढे त्याला विचारण्यात आलं की तुम्ही सध्या एका सौंदर्यामागे लागलाय, म्हणून तुम्हाला कुटुंब दिसत नाही का? हा प्रश्न कोमल राणी स्वर्णकार हिच्यासोबत त्याचं नाव जोडलं जातंय, त्याबद्दल होता. यावर गोविंदा हसला आणि म्हणाला, "माझ्या करिअरमध्ये चार-चार मिस युनिव्हर्स माझ्या हिरोईन म्हणून आल्या, मी त्यांनाच नीट भेटलो नाही. तर मग आता मी कशाला असं करेन?"

अफेअरच्या सगळ्या बातम्या खोट्या आहेत, असं त्याने स्पष्ट केलं. जे लोक दुसऱ्याचं घर फोडतात, त्यांना मी चपलेने मारेन, असंही तो रागात म्हणाला.

वाद नेमका कसा सुरू झाला, तेही बघूया. काही दिवसांपूर्वी गोविंदा त्याच्या नवीन सिनेमाची हिरोईन कोमल राणी स्वर्णकार हिच्यासोबत अनेक ठिकाणी दिसला होता. दोघांचे फोटो आणि व्हिडिओ व्हायरल झाले, आणि त्यावरून गोविंदाचं कोमलसोबत अफेअर चालू आहे, असं लोक म्हणू लागले.

त्यानंतर सुनीता आहुजाने काही पोस्ट टाकल्या आणि अप्रत्यक्षपणे गोविंदाला टोमणे मारले. काही लोक वय झालं तरी सुधरत नाहीत, असं ती म्हणाली होती. तेव्हापासून दोघांमधला वाद चव्हाट्यावर आला. गोविंदाने आधी सुनीताला समजावलं होतं की उगाच बोलून माझी बदनामी करू नकोस, पण सुनीता ऐकायला तयार नव्हती.

आता मुलाखतीत गोविंदाने सगळं स्पष्ट केलं आहे. त्याचं लक्ष फक्त त्याच्या कामावर आणि कुटुंबावर आहे, असं त्याने सांगितलं. बाहेरच्या लोकांनी त्यांच्या नात्यात विष कालवलं आहे, असंही तो म्हणाला.

गोविंदाचा हा खुलासा आल्यानंतर आता सुनीता काय बोलणार, याकडे सगळ्यांचं लक्ष लागलं आहे. हे भांडण लवकर मिटेल, अशी आशा चाहते करत आहेत. कारण गोविंदा आणि सुनीता ही बॉलिवूडमधली सगळ्यात जुनी आणि क्युट जोडी मानली जाते.