गोंदियात विजेचा करंट सोडून चितळाची शिकार; कातडी, मांस जप्त, पाच जणांवर गुन्हा दाखल

गोंदिया जिल्ह्यातील सालेकसा वनपरिक्षेत्रांतर्गत येणाऱ्या बाकलसर्रा जंगलात विजेचा करंट सोडून एका संरक्षित वन्यजीवाची, म्हणजेच चितळाची, शिकार करण्यात आल्याचा खळबळजनक प्रकार समोर आला आहे. वन विभागाच्या पथकाने तातडीने कारवाई करून चितळाची ताजी कातडी, मांस आणि शिकारीसाठी वापरलेले साहित्य जप्त केले आहे. या प्रकरणी पाच जणांविरुद्ध वन्यजीव (संरक्षण) अधिनियम, 1972 नुसार गुन्हा नोंदवण्यात आला असून, त्यापैकी दोन आरोपी सध्या फरार असल्याचे सांगितले जाते.

मिळालेल्या माहितीनुसार, 28 ऑक्टोबर 2026 रोजी वन विभागाला एक गोपनीय खबर मिळाली होती. मौजा बाकलसर्रा येथील जंगलात विजेचा प्रवाह सोडून वन्यजीवांची शिकार केली जात आहे, असे त्या खबरीत म्हटले होते. खबरीचे गांभीर्य लक्षात घेऊन वन विभागाचे पथक तातडीने घटनास्थळी पोहोचले आणि तिथे छापा टाकला. जागेची तपासणी सुरू असताना अधिकाऱ्यांना चितळाची ताजी ठिपकेदार कातडी, मांस आणि शिकारीशी संबंधित साहित्य सापडले.

त्यानंतर तपास अधिकारी असलेल्या वनपाल यांच्या उपस्थितीत आणि पंचांसमक्ष घटनास्थळाचा पंचनामा करण्यात आला आणि सगळा माल जप्त करण्यात आला. जप्त केलेल्या मांसाचे आणि कातडीचे नमुने वैद्यकीय तपासणीसाठी तसेच फॉरेन्सिक चाचणीसाठी पशुधन विकास अधिकारी (LDO) आणि न्यायवैद्यक प्रयोगशाळेकडे पाठवण्याची प्रक्रिया सुरू करण्यात आली आहे.

वन विभागाने वन्यजीव (संरक्षण) अधिनियम, 1972 च्या कलम 9, 39, 48, 50 आणि 51 अन्वये गुन्हा दाखल केला आहे. गुन्हा दाखल झालेल्या आरोपींची नावे नरेंद्र श्रीराम चौडाये (26), दिनेश भरतलाल मेश्राम (26), राजू भागचंद उईके (30), भरतलाल किसनलाल मेश्राम (60) आणि कृष्णा बिसराम चौडाये (55) अशी आहेत. हे सर्वजण बाकलसर्रा, तालुका सालेकसा, जिल्हा गोंदिया येथील रहिवासी आहेत. त्यापैकी काही आरोपी फरार असून त्यांचा शोध घेण्यासाठी वन विभागाची पथके कामाला लागली आहेत.

ही संपूर्ण कारवाई उपवनसंरक्षक पवन कुमार जोग आणि सहायक वनसंरक्षक सचिन डोंगरवार यांच्या मार्गदर्शनाखाली, सालेकसा वनपरिक्षेत्र अधिकारी अतुल वालके यांच्या नेतृत्वात करण्यात आली. क्षेत्र सहायक जे.जी. खान, चौव्हान, प्रदीप भंडारकर, किशोर फुंडे, विनोद भेंडारकर, पाऊलझगडे, सुलाखे आणि सुनील बारसे यांच्यासह इतर वनरक्षक व वन कर्मचारीही या मोहिमेत सहभागी झाले होते. या कडक कारवाईमुळे परिसरातील शिकाऱ्यांमध्ये खळबळ उडाली आहे. प्रकरणाचा पुढील तपास सालेकसा वनपरिक्षेत्र कार्यालयाकडून केला जात आहे.