तीन फुटी कैलासच्या आयुष्यात अमेरिकेची संधी; 'कोलंबस' ११ डिसेंबरला चित्रपटगृहांत

मराठी मनोरंजनविश्वात विविध विषयांवर आधारित चित्रपट नेहमीच प्रेक्षकांच्या भेटीला येत असतात. यातच आता 'कोलंबस' हा नवा मराठी चित्रपट येत आहे. शिक्षण, बेरोजगारी आणि सरकारी नोकरी मिळवण्यासाठी तरुणांना करावा लागणारा संघर्ष या चित्रपटातून अधोरेखित केला आहे. रंजक कथानक आणि दमदार कलाकारांची फळी असलेला हा चित्रपट येत्या ११ डिसेंबरला संपूर्ण महाराष्ट्रात प्रदर्शित होणार आहे. चित्रपटाचे टीझर पोस्टर नुकतेच सोशल मीडियावर लाँच करण्यात आले.

कथा पश्चिम महाराष्ट्रातील एका गावातली आहे. कैलास नावाचा सुशिक्षित तरुण तिथे राहतो. त्याची उंची अवघी तीन फूट आहे, तरीही शिक्षक व्हायचे हे स्वप्न त्याने उराशी बाळगले आहे. मात्र शिक्षणाचे खासगीकरण आणि सरकारी शिक्षक भरतीतल्या अडचणींमुळे त्याच्या स्वप्नपूर्तीच्या वाटेत अडथळे उभे राहतात.

शिक्षण घेऊनही अपेक्षित नोकरी न मिळाल्याने अनेक तरुण संघर्ष करताना दिसतात. कैलासची गोष्टही याच वास्तवाशी जोडलेली आहे. अशातच त्याच्या आयुष्यात थेट अमेरिकेतून एक अनपेक्षित संधी चालून येते. या संधीमुळे कैलासच्या आयुष्यात काय बदल घडतात आणि त्याच्या स्वप्नांना नवी दिशा मिळते का, या प्रश्नांची उत्तरे चित्रपटातून उलगडणार आहेत.

एस. एस. आर. फिल्म्स प्रस्तुत या चित्रपटाची निर्मिती सतीश नाईक, रोहित गुप्ता आणि सनोबर लाकडावाला यांनी केली आहे. दिग्दर्शन रवींद्र शिवाजी यांनी केले असून छायालेखनाची जबाबदारी गौरव कुलकर्णी यांनी सांभाळली आहे. संकलन रोहन पाटील आणि सुयश जाधव यांनी केले आहे, तर संगीत दिग्दर्शन वैभव शिरोळे यांचे आहे.

चैतन्य पिसाळ यांनी चित्रपटाचे लेखन आणि क्रिएटिव्ह दिग्दर्शन केले आहे. पार्श्वसंगीत रोहित नागभिडे यांनी दिले आहे. आनंद शिंदे आणि कैलास वाघमारे यांनी चित्रपटातली गाणी गायली आहेत. कार्यकारी निर्माता म्हणून मुकुंद हंगेकर यांनी काम पाहिले आहे.

या चित्रपटात अंकुर वाढवे, रोहित माने आणि 'सातारचा बच्चन' म्हणून ओळखले जाणारे किरण माने महत्त्वाच्या भूमिकांमध्ये दिसणार आहेत.

शिक्षण, रोजगार आणि सरकारी नोकरीसाठी सुरू असलेली धडपड हे आजच्या तरुणाईशी संबंधित विषय आहेत. याच पार्श्वभूमीवर एका ग्रामीण तरुणाचा संघर्ष आणि त्याला मिळणारी अनपेक्षित संधी 'कोलंबस'मधून मांडली जाणार आहे. आगळेवेगळे कथानक आणि ग्रामीण भागातल्या तरुणाच्या आयुष्यात घडणाऱ्या नाट्यमय घडामोडींमुळे हा चित्रपट लक्षवेधी ठरण्याची शक्यता आहे. आता ११ डिसेंबरला चित्रपटगृहांत प्रदर्शित होणाऱ्या 'कोलंबस'ला प्रेक्षकांचा कसा प्रतिसाद मिळतो, हे पाहणे उत्सुकतेचे ठरेल.