'कापूसकोंडा' चित्रपटाचा टीझर प्रदर्शित, सचिन पिळगांवकर-मधुराणी गोखले २३ ऑक्टोबरला पडद्यावर

'कापूसकोंडा' या आगामी मराठी चित्रपटाचा टीझर नुकताच लाँच करण्यात आला आहे. मानवी नातेसंबंध, कुटुंब आणि भावभावना यांची गुंफण असलेला हा चित्रपट येत्या २३ ऑक्टोबरला चित्रपटगृहात प्रदर्शित होणार आहे. मराठी अभिनेते सचिन पिळगांवकर या चित्रपटातून लवकरच प्रेक्षकांना भेटणार आहेत. चित्रपटाची कथा सत्यघटनेवरून प्रेरित आहे आणि कलाकारांचा संचही दमदार आहे, त्यामुळे चित्रपटाबद्दलची उत्सुकता वाढली आहे.

टीझरवरून कथा वेगळी आणि रंजक असल्याचे दिसते. राजा, राणी आणि राजकुमारी असलेल्या एका 'हॅपी गो लकी' कुटुंबाची ही गोष्ट आहे. एक निवृत्त कर्मचारी आणि त्याला भेट म्हणून मिळालेला कुत्रा यांच्यातील नात्याभोवती चित्रपट फिरतो. 'A Family Dog Film' अशी या चित्रपटाची टॅगलाइन आहे. एका कुत्र्यामुळे कुटुंबात आणि नात्यांमध्ये कोणत्या घडामोडी घडतात आणि त्यातून मानवी भावना व नात्यांचे वेगवेगळे पैलू कसे समोर येतात, हे चित्रपटात पाहायला मिळणार आहे.

चित्रपटात ज्येष्ठ अभिनेते सचिन पिळगांवकर आणि अभिनेत्री मधुराणी गोखले यांच्यासह नव्या पिढीतील अभिनेत्री अक्षता पाडगांवकर, जान्हवी तांबट आणि अभिनेता भूषण पाटील यांच्या प्रमुख भूमिका आहेत. विशेष म्हणजे सचिन पिळगांवकर आणि मधुराणी गोखले हे बऱ्याच काळानंतर पुन्हा एकदा एकत्र पडद्यावर दिसणार आहेत.

पॅनोरामा स्टुडिओज प्रस्तुत व्हीपी माऊली ग्रुप ऑफ कंपनीज आणि स्टोरीवाला फिल्म सादर करत असलेल्या या चित्रपटाची निर्मिती जास्वंद एंटरटेन्मेंट्स प्रा. लि. यांनी केली आहे. चित्रपटाचे लेखन आणि दिग्दर्शन सचिन मोहिते यांचे आहे. पटकथा आणि संवादलेखन सचिन मोहिते, गणेश पंडित आणि ऋषिकेश तुरई यांनी केले आहे. छायांकनाची जबाबदारी सचिन पाटेकर यांनी सांभाळली आहे.

संगीतकार ए. व्ही. प्रफुल्लचंद्र यांनी चित्रपटातील गाणी संगीतबद्ध केली आहेत, तर पार्श्वसंगीत अभिजीत हेगडेपाटील यांनी दिले आहे. गाण्यांना गायक अवधूत गुप्ते आणि पद्मनाभ गायकवाड यांचा स्वर लाभला आहे. ध्वनी तंत्रज्ञ म्हणून सुहास राणे यांनी काम पाहिले आहे.

चित्रपटाचे बरेचसे चित्रीकरण लातूर जिल्ह्यातील अंधोरी या गावात झाले आहे. कथानकाची गरज लक्षात घेऊन हे गाव निवडण्यात आले होते. त्यामुळे चित्रपटात ग्रामीण वातावरणाला आणि कुटुंबाच्या भावविश्वाला विशेष महत्त्व मिळणार असल्याचे दिसते.

वेगळे कथानक, कौटुंबिक भावविश्व, प्राण्याशी असलेले नाते आणि अनुभवी कलाकारांचा अभिनय यामुळे हा चित्रपट प्रेक्षकांसाठी मनोरंजनाची पर्वणी ठरण्याची शक्यता आहे. टीझरमुळे प्रेक्षकांची उत्सुकता आणखी वाढली आहे. नात्यांचा हा 'कापूसकोंडा' मोठ्या पडद्यावर पाहण्यासाठी आता २३ ऑक्टोबरची वाट पाहावी लागणार आहे.