घसा खवखवतोय? तुळस-मिरीचा काढा, मिठाच्या गुळण्या आणि मधाचे घरगुती उपाय

सर्दी आणि खोकल्यासोबतच हवामानातील बदल, ॲलर्जी आणि संसर्ग यांसारख्या कारणांमुळे घसा खवखवू शकतो. त्यामुळे घशात वेदना होतात, खाण्यापिण्याला त्रास होतो आणि बोलतानाही अडचण येऊ शकते.

घसादुखी नेहमीच जिवाणू संसर्गामुळे होते, असे नाही. काही वेळा विषाणू संसर्गामुळेही घशाचा त्रास होऊ शकतो. अशा परिस्थितीत अँटीबायोटिक्स नेहमीच आवश्यक नसतात, असे यात म्हटले आहे. ही औषधे फक्त डॉक्टरांच्या सल्ल्यानुसारच वापरावीत, असेही सांगण्यात आले आहे.

काही घरगुती उपाय घसादुखी आणि वेदनेपासून तात्पुरता आराम देण्यास मदत करू शकतात. आयुर्वेदात तुळस, हळद आणि मध यांचा वापर पारंपरिक पद्धतीने केला जातो. सर्दी, खोकला आणि घसादुखीत आराम मिळवण्यासाठी कोणते उपाय सांगितले जातात, ते पाहू.

पहिला उपाय आहे तुळस आणि काळी मिरीचा काढा. या दोन्ही गोष्टी घालून केलेले गरम पेय प्यायल्याने सर्दी, खोकला किंवा घसादुखी असलेल्या काही लोकांना आराम मिळू शकतो. आयुर्वेदात तुळशीला पारंपरिक पद्धतीने उपयुक्त औषधी वनस्पती मानले जाते. हे गरम पेय घशाला आराम देते आणि घसादुखीमुळे होणारा त्रास कमी करण्यास मदत करते, असे सांगितले आहे.

हा काढा करण्यासाठी एका कप पाण्यात तुळशीची पाच-सहा पाने आणि चार-पाच काळी मिरी घालून पाणी उकळायचे आहे. त्यानंतर ते गाळून घ्यायचे आणि कोमट झाल्यावर प्यायचे. घशाच्या सामान्य त्रासांपासून आराम मिळवण्यासाठी हा एक फायदेशीर मार्ग ठरू शकतो.

दुसरा उपाय आहे मिठाच्या पाण्याने गुळण्या करणे. कोमट मिठाच्या पाण्याने गुळण्या केल्याने घसादुखी आणि वेदनेपासून आराम मिळू शकतो. घशातील खवखवपणा कमी करण्यास हा सोपा घरगुती उपाय मदत करू शकतो.

त्यासाठी एका ग्लास कोमट पाण्यात सुमारे अर्धा चमचा मीठ मिसळायचे आहे. मीठ पूर्णपणे विरघळले की पाणी चमच्याने ढवळून घ्यायचे आणि त्या पाण्याने गुळण्या करायच्या. गरजेनुसार हे दिवसातून दोन ते तीन वेळा करता येते, असे यात म्हटले आहे.

तिसरा उपाय म्हणजे मध. मधाचे सेवन केल्याने घसादुखी आणि खोकल्यापासून काही प्रमाणात आराम मिळू शकतो. मध घशाला आराम देतो आणि खोकला कमी करण्यास मदत करतो. घसा खवखवत असेल तर थोड्या प्रमाणात मधाचे सेवन करता येते. एक चमचा मध आणि आंबे हळद एकत्र करून खाल्ल्यानेही घशाचा त्रास कमी होऊ शकतो.

मात्र हा त्रास कायम राहिला आणि सामान्य उपायांनी आराम मिळत नसेल, तर डॉक्टरांचा सल्ला घ्यावा, असे यात स्पष्ट सांगितले आहे. हा मजकूर केवळ सामान्य माहितीसाठी असून त्यात कोणत्याही उपचाराचा दावा केलेला नाही. कोणताही उपाय करण्यापूर्वी आपल्या डॉक्टरांचा सल्ला घ्यावा, असेही त्यात नमूद आहे.