मुंबईतील १०,२०० अंगणवाडी सेविका आणि मदतनीसांना दिवाळीआधी भाऊबीज भेट, पैसे थेट बँक खात्यात

दिवाळीचा सण म्हटला की आनंद, उत्साह आणि भेटवस्तूंची रेलचेल असते. वर्षभर महिला आणि बालकांच्या आरोग्यापासून पोषणापर्यंत महत्त्वाची जबाबदारी पार पाडणाऱ्या अंगणवाडी सेविका आणि मदतनीसांसाठी मात्र यंदाची दिवाळी आणखी खास ठरणार आहे.

मुंबईतील तब्बल १० हजार २०० अंगणवाडी सेविका आणि मदतनीसांना यंदाची भाऊबीज भेट दिवाळीपूर्वीच मिळाली आहे. विशेष म्हणजे, ही रक्कम थेट त्यांच्या बँक खात्यांमध्ये जमा करण्यात आली आहे. त्यांच्या कामाची दखल घेऊन सणानिमित्त ही भेट देण्यात आली आहे.

बाल विकास प्रकल्प अधिकारी भाऊसाहेब तोरकर यांनी प्रसिद्धीपत्रकाद्वारे ही माहिती दिली. दिवाळीपूर्वीच ही रक्कम मिळाल्यामुळे अंगणवाडी सेविका आणि मदतनीसांमध्ये आनंदाचे वातावरण आहे.

याआधी अंगणवाडी सेविका आणि मदतनीसांना भाऊबीज भेटीचे वाटप जिल्हास्तरावरून करण्यात येत होते. मात्र, यंदा एकात्मिक बाल विकास सेवा योजना आयुक्तालयामार्फत ही रक्कम थेट त्यांच्या बँक खात्यांमध्ये जमा करण्यात आली. त्यामुळे वाटपाची प्रक्रिया अधिक सोपी आणि पारदर्शक झाली आहे. लाभार्थ्यांना कोणत्याही मध्यस्थाशिवाय थेट आर्थिक लाभ मिळाला आहे.

अंगणवाडी सेविका महिला व बालविकास विभागाच्या विविध योजना तळागाळातील लाभार्थ्यांपर्यंत पोहोचवण्याचे काम करतात. गरोदर माता, स्तनदा माता, नवजात बालके आणि सहा वर्षांखालील मुलांचे पोषण व आरोग्य संवर्धन ही त्यांची महत्त्वाची जबाबदारी आहे.

याशिवाय बालकांचे वजन आणि उंची मोजणे, कुपोषणाचे सर्वेक्षण करणे, माता आणि बालकांना आरोग्यविषयक मार्गदर्शन देणे आणि पूर्वप्राथमिक शिक्षण देणे हेही काम त्या करतात. पोषण ट्रॅकर प्रणालीवर लाभार्थ्यांची नोंदणी करणे, बालकांच्या वाढीचे निरीक्षण करणे आणि पोषण आहार वितरणाची नोंद ठेवणे ही जबाबदारीही त्या पार पाडतात. या संपूर्ण प्रक्रियेत अंगणवाडी मदतनीसांचेही योगदान महत्त्वाचे आहे.

हा उपक्रम सेविका आणि मदतनीसांच्या योगदानाचा सन्मान करणारा असल्याचे बाल विकास प्रकल्प अधिकारी भाऊसाहेब तोरकर यांनी नमूद केले. दिवाळीपूर्वीच भाऊबीज भेट मिळाल्याने सेविका आणि मदतनीसांचा उत्साह वाढण्यास मदत होणार आहे, असेही त्यांनी सांगितले.